ପ୍ରୟାଗରାଜ ୦୭/୦୨: ମହାକୁମ୍ଭରେ ଚର୍ଚ୍ଚାର ବିଷୟ ହୋଇଛନ୍ତି ସାଧ୍ୱୀ ଇଶିକା ତନେଜା । ଦିଲ୍ଲୀ ବାସିନ୍ଦା ଇଶିକା ମିସ୍ ଇଣ୍ଡିଆ ଓ ମିସ୍ ୱର୍ଲଡ୍ ଟୁରିଜମ୍ ଟାଇଟଲ ପାଇଥିଲେ । ରାଷ୍ଟ୍ରପତି ସମ୍ମାନ ଦ୍ୱାରା ମଧ୍ୟ ସେ ସମ୍ମାନିତ । କିନ୍ତୁ ଏବେ ସେ ଗ୍ଲାମର୍ ଦୁନିଆକୁ ଅଲ୍ବିଦା କହି ଆଧ୍ୟାତ୍ମ ମାର୍ଗ ଚୟନ କରିଛନ୍ତି । ଇଶିକା ଏବେ ଶ୍ରୀ ଲକ୍ଷ୍ମୀ ହୋଇ ସନାତନ ଧର୍ମର ପ୍ରଚାର-ପ୍ରସାର କରୁଛନ୍ତି । ସେ ଦ୍ୱାରକା-ଶାରଦା ପୀଠର ଶଙ୍କରାଚାର୍ଯ୍ୟ ସଦାନନ୍ଦ ସରସ୍ୱତୀଙ୍କଠୁ ଗୁରୁ ଦୀକ୍ଷା ନେଇଛନ୍ତି ।
ଏକ ଗଣମାଧ୍ୟମ ସହ ବାର୍ତ୍ତାଳାପରେ ଇଶିକା କହିଛନ୍ତି, ଖ୍ୟାତି ଓ ପ୍ରସିଦ୍ଧି ସତ୍ତେ୍ୱ ତାଙ୍କ ଜୀବନ ଅପୂର୍ଣ୍ଣ ମନେହେଉଥିଲା । ଜୀବନରେ ସୁଖ-ଶାନ୍ତି ସହିତ ବାସ୍ତବ ଜୀବନକୁ ମଧ୍ୟ ସୁନ୍ଦର କରିବା ଜରୁରି । ଧର୍ମ ରକ୍ଷା ଓ ଏହାର ପ୍ରଚାର ପାଇଁ ସବୁ ଝିଅଙ୍କୁ ଆଗକୁ ଆସିବା ଉଚିତ୍ । ସେ କହିଛନ୍ତି, ଜଣେ ସନାତନୀ ସାଧ୍ୱୀ ଭାବେ ସେ ଗର୍ବିତ । ମହାକୁମ୍ଭରେ ଦିବ୍ୟ ଶକ୍ତି ଅଛି । ଶଙ୍କରାଚାର୍ଯ୍ୟଙ୍କଠୁ ଗୁରୁ ଦୀକ୍ଷା ମିଳିବା ତାଙ୍କ ଜୀବନର ସବୁଠୁ ବଡ଼ ଉପଲବ୍ଧି । କାରଣ ଗୁରୁ ଥିଲେ ଜୀବନକୁ ମାର୍ଗ ମିଳେ । ସେ ଗିନିଜ୍ ରେକର୍ଡ ଅଧିକାରିଣୀ । ଅନେକ ଟି-ସିରିଜ୍ ଗୀତରେ ମଧ୍ୟ କାମ କରିଛନ୍ତି । କିନ୍ତୁ ଠିକ୍ ସମୟରେ ସେ ଘରକୁ ଫେରିଥିବା କହିଛନ୍ତି । ତାଙ୍କ ମତରେ, ମହିଳାମାନେ ଛୋଟ ପୋଷାକ ପିନ୍ଧି ନୃତ କରିବାକୁ ଜନ୍ମ ହୋଇନାହାନ୍ତି । ସେମାନେ ସନାତନର ସେବା ପାଇଁ ଉତ୍ସର୍ଗୀକୃତ ।
ନିଜର ଟିଆର୍ପି ବଢ଼ାଇବାକୁ ସେ ମହାକୁମ୍ଭକୁ ଆସିଛନ୍ତି କି ଏବଂ ଏହା ପରେ ସେ ପୁଣି ଥରେ ଗ୍ଲାମର୍ ଦୁନିଆକୁ ଯିବେ କି? ଏହାର ଉତ୍ତରରେ ଇଶିକା କହିଛନ୍ତି ‘ମୋର ଯାତ୍ରା ବହୁ ପୂର୍ବରୁ ଆରମ୍ଭ ହୋଇଥିଲା । ମୁଁ ଆର୍ଟ ଅଫ୍ ଲିଭିଙ୍ଗ୍ର ଅଂଶ ମଧ୍ୟ ରହିଛି ।’ ୬ ମାସ ପରେ ତାଙ୍କ ସୋସିଆଲ ମିଡିଆ ପ୍ରୋଫାଇଲ୍ରେ କ’ଣ ଏହି ରୂପ ଦେଖିବାକୁ ମିଳିବ? ଏହାର ଜବାବରେ ଇଶିକା କହିଲେ ‘ମୁଁ କଦାପି ପୁରୁଣା ଦିଗକୁ ଯିବି ନାହିଁ । ହଁ, ଫିଲ୍ମ ପ୍ରଯୋଜନାର ମଉକା ମିଳିଲେ, କେବଳ ସନାତନର ପ୍ରଚାର ଲାଗି ନିଶ୍ଚୟ କରିବି ।’ ସନାତନରେ ଫ୍ୟାଶନ୍ର ଆବଶ୍ୟକତା କ’ଣ? ଏହାର ଉତ୍ତରରେ ଇଶିକା କହିଲେ ‘ଗେରୁଆକୁ ଯେପର୍ଯ୍ୟନ୍ତ ଆପଣ ଫ୍ୟାଶନେବଲ ଉପାୟରେ ଧାରଣ କରିବେ ନାହିଁ, ତାହା ଦିଶିବ ନାହିଁ । ଏହା ଗର୍ବର କଥା । ଯୁବପିଢ଼ି ଯଦି ସୁନ୍ଦର ଭାବେ ଶାଢ଼ି ପିନ୍ଧିବେ, ଏହି ରଙ୍ଗକୁ ଧାରଣ କରିବେ ତେବେ ଏହାର ପ୍ରଚାର ହେବ । ସନାତନ ଫ୍ୟାଶନେବଲ ହେବା ଉଚିତ୍ ଏବଂ ସତ୍ତାରେ ବି ରହିବା ଉଚିତ୍ । ନିର୍ବାଚନ ଲଢ଼ିବା ବିଷୟରେ ଇଶିକା କହିଛନ୍ତି, ରାଜନୀତି ଅଭିଳାଷ ମୋର ନାହିଁ । ବିଗ୍ ବସ୍ ବି ଯିବେ ନାହିଁ । ପୂର୍ବରୁ ବିଗ୍ ବସ୍ରୁ ତାଙ୍କୁ ଅଫର୍ ଆସିଥିଲା, କିନ୍ତୁ ସେ ଯାଇନଥିଲେ ।
