ପିପିଲି,୧୩/୦୫: ପିପିଲି ଏନ୍ଏସି ଅଞ୍ଚଳରେ ଜଣେ ୮ ବର୍ଷୀୟ ନାବାଳିକାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ପୁଲିସ୍ ଘଟଣାର ତଦନ୍ତ ଜାରି ରଖିଛି ।
ରବିବାର ପୂର୍ବାହ୍ଣରେ ନାବାଳିକା ଘର ନିକଟରେ ଖେଳୁଥିଲେ । ସେଠାରେ ଭଡ଼ା ରହୁଥିବା ମେଦିନପୁର ଅଞ୍ଚଳର ଜଣେ ୬୭ ବର୍ଷୀୟ ଫେରିବାଲା ଦୁଷ୍କର୍ମ କରିଥିଲା । ଘଟଣା ସମ୍ପର୍କରେ କାହାକୁ ଜଣାଇଲେ ଜୀବନରେ ମାରି ଦେବାକୁ ଧମକ ଦେଇଥିଲା । ରାତିରେ ଯନ୍ତ୍ରଣା ହେବାରୁ ନାବାଳିକା ମା'ଙ୍କୁ ସବୁ କହିଥିଲେ । ସୋମବାର ସକାଳେ ପରିବାର ଲୋକେ ନାବାଳିକାଙ୍କୁ ପିପିଲି ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ପ୍ରାଥମିକ ଚିକିତ୍ସା ପରେ ପିପିଲି ଥାନାରେ ଅଭିଯୋଗ କରିଥିଲେ । ଥାନା ଅଧିକାରୀ ସୌମେନ୍ଦୁ ଶେଖର ତ୍ରିପାଠୀ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରି ଫେରିଥିଲେ । ଏନେଇ ପିପିଲି ଥାନାରେ ୨୯୩/୨୫ରେ ଏକ ମାମଲା ରୁଜୁ କରାଯାଇଛି । ଅଭିଯୁକ୍ତକୁ ଥାନାରେ ଅଟକ ରଖାଯାଇ ପଚରାଉଚରା କରାଯାଉଥିବା ଥାନା ଅଧିକାରୀ ସୂଚନା ଦେଇଛନ୍ତି ।
