ନୂଆଦିଲ୍ଲୀ,୮।୧: ଆମେରିକୀୟ ଦେଶ କାର୍ଲିଫର୍ଣ୍ଣିଆରେ ଭୟଙ୍କର ଅଗ୍ନିକାଣ୍ଡ। ନିଆଁରେ ପ୍ରଭାବିତ ହୋଇଛି ଆବାସିକ ଅଞ୍ଚଳ। ଶତାଧିକ ଘର ପୋଡି ହୋଇଯାଇଛି ପାଉଁଶ। ଆବାସିକ ଅଞ୍ଚଳ ଓ ଆଖପାଖରେ ଲାଗିଥିବା ଭୀଷଣ ନିଆଁରୁ ବଞ୍ଚିବା ପାଇଁ ହଜାର ହଜାହର ଲୋକ ନିଜ ଘର ଛାଡି ପଳାୟନ କରୁଛନ୍ତି। ଲସ୍ ଆଞ୍ଜେଲସ୍ର ପାସିଫିକ୍ ପୋଲିସେଡସ୍ ଅଞ୍ଚଳର ବହୁ ଘର ମାତ୍ର କିଛି ମିନିଟ୍ ଭିତରେ ପୋଡି ପାଉଁଶ ହୋଇଯାଇଛି। ତାଙ୍କ ଆଗରେ ରଖାଯାଇଥିବା ଶତାଧିକ ଗାଡି ମଧ୍ୟ କିଛି କ୍ଷଣରେ ପୋଡି ଯାଇଥିଲା।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ନିଆଁର କରାଳ ରୂପ ଦେଖି ଲୋକେ ଭୟଭୀତ ହୋଇ ପଳାୟନ କରିଥିଲେ। ହଠାତ ଘଟିଥିବା ଏହି ଅଗ୍ନିକାଣ୍ଡରେ ପ୍ରବଳ ଟ୍ରାଫିକ୍ ଜାମ୍ ଲାଗି ଯାଇଥିଲା, କାରଣ ବହୁ ସଂଖ୍ୟାରେ ଲୋକେ ନିଜ ଘର ଖାଲି କରିବାକୁ ଚେଷ୍ଟା କରିଥିଲେ। ଫଳରେ ସ୍ଥିତି ଖୁବ୍ ଖରାପ ହୋଇଯାଇଥିଲା। ବର୍ତ୍ତମାନ କାର୍ଲିଫର୍ଣ୍ଣିଆରେ ତିନୋଟି ଅଗ୍ନିକାଣ୍ଡ ଘଟଣା ଦେଖିବାକୁ ମିଳିଛି। ଏଥିରେ ପାସିଫିକ୍ ପୋଲିସେଣ୍ଡସ୍ର ନିଆଁ ଖୁବ୍ ବିପଦଜନକ ରହିଛି। ସିଏନ୍ଏନ୍ର ରିପୋର୍ଟ ଅନୁସାରେ ସଡକରେ ନିଆଁର ପ୍ରଭାବ ଥିବାରୁ ଲୋକମାନେ ସମୁଦ୍ର କୂଳରେ ଶରଣ ନେବାକୁ ବାଧ୍ୟ ହୋଇଛନ୍ତି।
କାର୍ଲିଫର୍ଣ୍ଣିଆର ଗର୍ଭନର ଗୋଭିନ୍ ନ୍ୟୁସମ୍ ଦକ୍ଷିଣ କାର୍ଲିଫର୍ଣ୍ଣିଆର ଜଙ୍ଗଲରେ ଲାଗିଥିବା ନିଆଁ ଭିତରେ ଜରୁରୀକାଳୀନ ସ୍ଥିତି ଘୋଷଣା କରିଛନ୍ତି। ଅଗ୍ନିକାଣ୍ଡ ସ୍ଥିତିକୁ ଦେଖି ଗର୍ଭନର ତୁରନ୍ତ ୩୦ ହଜାର ଲୋକଙ୍କୁ ସେଠାରୁ ସ୍ଥାନାନ୍ତର କରିବାକୁ ନିର୍ଦେଶ ଦେଇଛନ୍ତି। ମଙ୍ଗଳବାର ସନ୍ଧ୍ୟାରୁ ଜଙ୍ଗଲରେ ନିଆଁ ଲାଗିବା ପରେ ଏବେ ତାହା ଚାରିଆଡକୁ ବ୍ୟାପି ଯାଇଛି। ପବନ ଜୋରରେ ବୋହରୁ ଥିବାରୁ ତାହା ଆହୁରି ବ୍ୟାପିବାର ଆଶଙ୍କା ବଢିଯାଇଛି। ସୋସିଆଲ ମିଡିଆରେ ଭୟଙ୍କର ଅଗ୍ନିକାଣ୍ଡର ଫଟୋ ଓ ଭିଡିଓ ଭାଇରାଳ ହେଉଛି।
