ନୂଆଦିଲ୍ଲୀ: ମେଟା ମାଲିକ ମାର୍କ ଜୁକରବର୍ଗ ମେଟାରେ ହେବାକୁ ଥିବା ନୀତିପରିବର୍ତ୍ତନ ପାଇଁ ନିକଟରେ ଏକ ଭିଡିଓ ପୋଷ୍ଟ କରିଥିଲ। ଏବେ ଏହି ଭିଡିଓ ଭାଇରାଲ ହେବାକୁ ଲାଗିଛି କାରଣ ସେ ପୋଷ୍ଟ କରିଥିବା ଭିଡିଓରେ ତାଙ୍କ ହାତରେ ଏକ ମହଙ୍ଗା ଘଣ୍ଟା ପିନ୍ଧିଥିବାର ଦେଖାଯାଉଛି। ଯାହାର ମୂଲ୍ୟ ୯ ଲକ୍ଷ ଡଲାର ଅର୍ଥାତ୍ ଭାରତୀୟ ମୁଦ୍ରାରେ ପ୍ରାୟ ୭.୭ କୋଟି ଟଙ୍କା ହେବ ବୋଲି ଅନୁମାନ କରାଯାଉଛି।
ଏହି ଘଣ୍ଟା ବିଷୟରେ ସୋସିଆଲ ମିଡିଆରେ ଅନେକ ପ୍ରକାରର ମନ୍ତବ୍ୟ ଆସୁଛି। ଜଣେ ଉଦ୍ୟୋଗପତି ଟୁଇଟ୍ କରି କହିଛନ୍ତି, “ଜୁକରବର୍ଗ ଫେସବୁକର କମ୍ୟୁନିଟି ନୋଟ୍ସ ଘୋଷଣା ଭିଡିଓରେ ଏହି ମିଲିୟନ୍ ଡଲାରର ଘଡି ପିନ୍ଧିଥିଲେ। ଅଧିକାଂଶ ଲୋକଙ୍କ ଘର ଅପେକ୍ଷା ଏହି ଘଡି ମହଙ୍ଗା ଅଟେ” ବୋଲି ସେ କହିଛନ୍ତି।
“ଅନନ୍ତ ଅମ୍ବାନିଙ୍କ ବାହଘର ସମୟରେ ଜୁକରବର୍ଗ ଅନନ୍ତ ପିନ୍ଧିଥିବା ଘଡିକୁ ପ୍ରଶଂସା କରିଥିବା କଥା କ’ଣ ଆପଣମାନଙ୍କର ମନେ ଅଛି” ବୋଲି ଆଉଜଣେ ୟୁଜର ଏହି ପୋଷ୍ଟରେ କମେଣ୍ଟ କରିଛନ୍ତି।
ଆପଣଙ୍କୁ ଜଣାଇରଖୁ କି, ଅନନ୍ତ ଅମ୍ବାନି ଓ ରାଧିକା ମର୍ଚ୍ଚାଣ୍ଡଙ୍କ ବିବାହରେ ଯୋଗ ଦେବାକୁ ମାର୍କ ଜୁକରବର୍ଗ ଓ ତାଙ୍କ ପତ୍ନୀ ପ୍ରିସିଲା ଚାନ ଭାରତରେ ଆସି ପହଞ୍ଚିଥିଲେ। ଏକ ବାଇରାଲ ଭିଡିଓରେ ଉଭୟ ଜୁକରବର୍ଗ ଓ ତାଙ୍କ ପତ୍ନୀ ଅନନ୍ତ ଅମ୍ବାନି ପିନ୍ଧିଥିବା ଘଡ଼ିର ପ୍ରଶଂସା କରୁଥିବା ଦେଖାଯାଇଥିଲା।
ବ୍ଲୁମବର୍ଗର ପ୍ରକାଶିତ ଏକ ରିପୋର୍ଟ ଅନୁଯାୟୀ, ଜୁକରବର୍ଗ ପିନ୍ଧିଥିବା ଘଣ୍ଟାଟି ଏକ ଗ୍ରୁଏବେଲ ଫୋର୍ସେ 'ହ୍ୟାଣ୍ଡ ମେଡ୍ ୧' ଘଡ଼ି ଥିଲା। ଏହି ଘଡ଼ିଟି ଅତ୍ୟନ୍ତ ବିରଳ ଏବଂ ମହଙ୍ଗା ଘଡ଼ି ଅଟେ। ଗୋଟିଏ ବର୍ଷରେ କେବଳ ଦୁଇ ବା ତିନୋଟି ଘଡ଼ିର ପ୍ରସ୍ତୁତି କରିଥାଏ ଗ୍ରୁଏବେଲ ଫୋର୍ସେ।ଏହାପୂର୍ବରୁ ଜୁକରବର୍ଗ ପଟେକ ଫିଲିପେ ଏବଂ ଏଫପି ଜର୍ନି ପରି ବିଳାସପୂର୍ଣ୍ଣ ବ୍ରାଣ୍ଡରୁ ଘଣ୍ଟା ପିନ୍ଧିଥିବାର ନଜର ଆସିଛନ୍ତି।
