ନୂଆଦିଲ୍ଲୀ ୦୪/୦୨: ମହାକୁମ୍ଭରେ ମୌନୀ ଅମାବାସ୍ୟା ସ୍ନାନ ପୂର୍ବରୁ ଘଟିଥିବା ଦଳାଚକଟାର ନୂଆ ଦିଗ ସାମ୍ନାକୁ ଆସୁଛି । ଏହି ଅଘଟଣରେ ଷଡ୍ଯନ୍ତ୍ରର ଆଶଙ୍କା କରାଯାଉଛି । ଗଣମାଧ୍ୟମର ରିପୋର୍ଟ ଅନୁସାରେ, ୟୁପି ଏସ୍ଟିଏଫ୍ ଓ ମହାକୁମ୍ଭ ମେଳାର ପୁଲିସ ଅଘଟଣକୁ ଷଡ୍ଯନ୍ତ୍ର ଦିଗରୁ ଯାଞ୍ଚ୍ କରୁଛି ।
ସୂତ୍ର ଅନୁସାରେ, ଘଟଣା ସମୟରେ ଥିବା ୨ ଜଣ ଲୋକ କହିଛନ୍ତି, ଗେରୁଆ ରଙ୍ଗର ପତାକା ଧରି କିଛି ଲୋକ ହଠାତ୍ ଭିଡ଼ ଭିତରକୁ ପଶିଆସିଥିଲେ । ସେମାନଙ୍କ ଯୋଗୁ ଦଳଚକଟା ଆରମ୍ଭ ହେଲା । ଏହି ଦାବିର ସତ୍ୟତା ଲାଗି ସିସିଟିଭି ଫୁଟେଜ୍ର ଯାଞ୍ଚ୍ କରାଯାଉଛି । ସେହି ସମୟରେ ସକ୍ରିୟ ଥିବା କିଛି ମୋବାଇଲ ଫୋନ୍ ଲଗାତାର ବନ୍ଦ ଥିବା ଏସ୍ଟିଏଫ୍ ଜାଣିବାକୁ ପାଇଛି । ଏଥିରୁ ଷଡ୍ଯନ୍ତ୍ର ଆଶଙ୍କାକୁ ବଳ ମିଳୁଛି । ଏସ୍ଟିଏଫ୍ ସଙ୍ଗମ ନୋଜ୍ରେ ସକ୍ରିୟ ୧୬ ହଜାରରୁ ଅଧିକ ମୋବାଇଲ ଫୋନ୍ର ଯାଞ୍ଚ୍ କରୁଛି । ତନ୍ମଧ୍ୟରେ ୧୦୦ରୁ ଅଧିକ ନମ୍ବର ଉପରେ ୨୪ ଘଣ୍ଟା ନଜର ରଖାଯାଇଛି ।
ସୂଚନାଯୋଗ୍ୟ, ମହାକୁମ୍ଭରେ ଗତ ୨୮ ତାରିଖ ବିଳମ୍ବିତ ରାତି ପ୍ରାୟ ୧.୩୦ରେ ସଙ୍ଗମ ନୋଜ୍ ଅଞ୍ଚଳରେ ଦଳାଚକଟା ସ୍ଥିତି ଉପୁଜିଥିଲା । ସରକାରୀ ତଥ୍ୟ ଅନୁସାରେ, ଏଥିରେ ୩୦ ଜଣଙ୍କ ମୃତ୍ୟୁ ଓ ୬୦ ଲୋକ ଆହତ ହୋଇଛନ୍ତି । ଏସ୍ଟିଏଫ୍ର ଜଣେ ଅଧିକାରୀ କହିଛନ୍ତି, ଘଟଣାସ୍ଥଳରେ ଲାଗିଥିବା କ୍ୟାମେରାଗୁଡ଼ିକର ଫୁଟେଜ୍ର ଫରେନ୍ସିକ ଯାଞ୍ଚ୍ ଚାଲିଛି । ସୂତ୍ର ଅନୁସାରେ, ୧୨୦ ସନ୍ଦିଗ୍ଧ ଚେହେରାକୁ ଏଆଇ ଟେକ୍ନୋଲୋଜିରେ ଚିହ୍ନଟ କରାଯାଇଛି । ତେବେ ଅଦ୍ୟାବଧି କାହାକୁ ଗିରଫ କରାଯାଇ ନାହିଁ । ଯେଉଁ ଭିଡିଓ ସାମ୍ନାକୁ ଆସିଛି, ସେଗୁଡ଼ିକର ମଧ୍ୟ ଫରେନ୍ସିକ ବିଶ୍ଳେଷଣ କରାଯାଉଛି ।
ଏସ୍ଟିଏଫ୍ର ଏଡିଜି ଅମିତାଭ ୟଶ ନିଜ ଟିମ୍ ସହ ଗତ ରବିବାର ମହାକୁମ୍ଭ ପହଞ୍ଚିଥିଲେ । ସେ ସଙ୍ଗମ ନୋଜ୍ର ସ୍ଥିତି ବୁଲି ଦେଖିଲେ । ବୋଟ୍ରେ ସଙ୍ଗମର ବ୍ୟବସ୍ଥା ଦେଖିଲେ ଏବଂ ପୁଲିସ ଅଧିକାରୀଙ୍କ ସହ କଥା ହେଲେ । ଦଳାଚକଟା ପରେ ମହାକୁମ୍ଭ ମେଳା କିଛି ପରିମାଣରେ ଖାଲି ହୋଇଥିଲା । କିନ୍ତୁ ବସନ୍ତ ପଞ୍ଚମୀର ଅମୃତ ସ୍ନାନ ପାଇଁ ପୁଣି ଶ୍ରଦ୍ଧାଳୁଙ୍କ ଭିଡ଼ ଜମିଲା । ଗତ ରବିବାର ୧ କୋଟିରୁ ଅଧିକ ଶ୍ରଦ୍ଧାଳୁ ସଙ୍ଗମରେ ବୁଡ଼ ପକାଇଥିଲେ ।
