ନୂଆଦିଲ୍ଲୀ: ମଧ୍ୟପ୍ରଦେଶର ବାଲାଘାଟ ଜିଲ୍ଲାରେ ପୋଲିସ ଏବଂ ନକ୍ସଲଙ୍କ ମଧ୍ୟରେ ଏନକାଉଣ୍ଟର ହୋଇଛି। ବୁଧବାର ହୋଇଥିବା ଏହି ଏନକାଉଣ୍ଟରରେ ପୋଲିସକୁ ଏକ ବଡ଼ ସଫଳତା ମିଳିଛି । ପୋଲିସ ଏନକାଉଣ୍ଟରରେ ୩ ଜଣ ମହିଳା ନକ୍ସଲଙ୍କୁ ହତ୍ୟା କରିଛି । ସୂଚନା ଅନୁଯାୟୀ, ପୋଲିସର ଏହି ଅପରେସନରେ ଅନେକ ନକ୍ସଲ ଆହତ ହୋଇଥିବା ଜଣାପଡିଛି । ଜଣେ ଅଧିକାରୀ ଏହି ଘଟଣା ବିଷୟରେ ସମ୍ପୂର୍ଣ୍ଣ ବିବରଣୀ ସେୟାର କରିଛନ୍ତି।

ଅତିରିକ୍ତ ପୋଲିସ ଅଧୀକ୍ଷକ ବିଜୟ ଡାବରଙ୍କ ଅନୁଯାୟୀ, ମଧ୍ୟପ୍ରଦେଶ ପୋଲିସର ନକ୍ସଲ ବିରୋଧୀ 'ହକ୍ ଫୋର୍ସ' ଏବଂ ସ୍ଥାନୀୟ ପୋଲିସ ଟିମ୍ ଛତିଶଗଡ଼ ରାଜ୍ୟ ସୀମା ନିକଟସ୍ଥ ଜଙ୍ଗଲ ଅଞ୍ଚଳରେ ଏହି ଅପରେସନ ଆରମ୍ଭ କରିଥିଲେ । ବାଲାଘାଟ ଜିଲ୍ଲାର ମୁଖ୍ୟାଳୟରୁ ୯୦ କିଲୋମିଟର ଦୂରରେ ପୋଲିସ ଏବଂ ନକ୍ସଲଙ୍କ ମଧ୍ୟରେ ଏକ ଏନକାଉଣ୍ଟର ହୋଇଥିଲା। ଏହି ଏନକାଉଣ୍ଟରରେ ତିନି ଜଣ ମହିଳା ନକ୍ସଲ ନିହତ ହୋଇଛନ୍ତି । ଏ ସମ୍ପର୍କରେ ଅଧିକ ସୂଚନାକୁ ଅପେକ୍ଷା କରାଯାଇଛି।

ପୋଲିସ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ, ପୋଲିସ ଘଟଣାସ୍ଥଳରୁ ଗୋଟିଏ INSAS ରାଇଫଲ୍, ଗୋଟିଏ ସେଲ୍ଫ-ଲୋଡିଂ ରାଇଫଲ୍ (SLR) ଏବଂ ଗୋଟିଏ 303 ରାଇଫଲ୍ ଏବଂ ଦୈନନ୍ଦିନ ବ୍ୟବହାରର ଜିନିଷପତ୍ର ଜବତ କରିଛି। ଏହି ଏନକାଉଣ୍ଟର ସମୟରେ କିଛି ନକ୍ସଲ ମଧ୍ୟ ଆହତ ହୋଇଛନ୍ତି। ତଥାପି, ସେମାନେ ଖସି ପଳାଇବାରେ ସଫଳ ହୋଇଥିଲେ। ତେବେ ଫେରାର ନକ୍ସଲଙ୍କୁ ଧରିବା ପାଇଁ ୧୨ଟି ପୋଲିସ ଦଳ ସର୍ଚ୍ଚ ଅପରେସନ୍ ଚଳାଇଛନ୍ତି।