ମାଲକାନଗିରି, ୨୭/୧ : ମାଲକାନଗିରି ଜିଲ୍ଲା ଓ ଦୌରା ଜଜ ଡ଼ଃ ପ୍ରସନ୍ନ କୁମାର ପଣ୍ଡା ଏକ ପତ୍ନୀ ହତ୍ୟା ମାମଲାର ବିଚାର କରି ଅଭିଯୁକ୍ତ ସ୍ୱାମୀକୁ ଆଜୀବନ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥି ସହିତ ୧୦ହଜାର ଟଙ୍କା ଜରିମାନା ଦେବାକୁ ରାୟରେ ଦର୍ଶାଇଛନ୍ତି। ମୋଟ ୧୩ଜଣ ସାକ୍ଷ୍ୟ ପ୍ରମାଣକୁ ଭିତ୍ତି କରି ଜିଲ୍ଲା ଜଜ ଏହି ଦଣ୍ଡାଦେଶ ଶୁଣାଇଛନ୍ତି।
ମାଲକାନଗିରି ଥାନା ଅଧୀନ ପାଣ୍ଡ୍ରିପାଣି ପଞ୍ଚାୟତ ସିନ୍ଧିବେଟା ଗ୍ରାମର ରତନ ନାୟକ ଗତ ୨୦୧୯ ମସିହା ନଭେମ୍ବର ମାସ ୯ତାରିଖ ସନ୍ଧ୍ୟାରେ ତାଙ୍କ ସ୍ତ୍ରୀ ଗଙ୍ଗାୟୀ ନାୟକଙ୍କ ସହ ତାଙ୍କ ଶଶୁର ଘର ପାଣ୍ଡ୍ରିପାଣି ଯାଇଥିଲେ। ସେଠାରେ ଖାଇ ସାରି ନିଜ ଘରକୁ ଫେରି ବାରଣ୍ଡାରେ ଶୋଇ ପଡ଼ିଥିଲେ। କୌଣସି କାରଣକୁ ନେଇ ଉଭୟ ସ୍ୱାମୀ ସ୍ତ୍ରୀଙ୍କ ମଧ୍ୟରେ ଝଗଡା ହୋଇଥିଲା। ରତନ ଉତ୍ତ୍ୟକ୍ତ ହୋଇ ନିକଟରେ ଥିବା ଏକ ଟାଙ୍ଗିଆରେ ଗାଙ୍ଗେଇକୁ ଆକ୍ରମଣ କରିଥିଲେ। ଘଟଣା ସ୍ଥଳରେ ଗାଙ୍ଗେଇଙ୍କ ମୃତ୍ୟୁ ଘଟିଥିଲା । ଏ ସମ୍ପର୍କରେ ମାଲକାନଗିରି ଥାନାରେ ଗାଙ୍ଗେଇଙ୍କ ପୁଅ ଏତଲା ଦେଇଥିଲା। ମାଲକାନଗିରି ପୁଲିସ ତଦନ୍ତ କରି ଅଭିଯୁକ୍ତ ରତନଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଜିଲ୍ଲା ଦୌରା ଜଜ ଡ଼ଃ ପ୍ରସନ୍ନ କୁମାର ପଣ୍ଡା ସାକ୍ଷୀ ପ୍ରମାଣକୁ ଭିତ୍ତି କରି ଉପରୋକ୍ତ ରାୟ ପ୍ରଦାନ କରିଛନ୍ତି। ଏହି ମାମଲାକୁ ପିପି ମହେନ୍ଦ୍ର କୁମାର ନାଗ ପରିଚାଳନା କରିଥିଲେ।