ମାଲକାନଗିରି,୩୦/୧ ; ବୟସରେ ଛୋଟ ହେଲେ ବି ଉପସ୍ଥିତ ବୁଦ୍ଧି ଖଟାଇ ଭାଲୁ ସହିତ ଲଢ଼ି ବାପାର ଜୀବନ ବଞ୍ଚାଇ ପ୍ରଶଂସାର ପାତ୍ର ସାଜିଛି ୧୦ବର୍ଷର ପୁଅ । ଏପରି ଘଟଣା ଆଜି ଦେଖିବାକୁ ମିଳିଛି ମାଲକାନଗିରି ଜିଲ୍ଲା ସୀମାନ୍ତ ଦନ୍ତେୱାଡ଼ା ଜିଲ୍ଲାରେ ।
ଅବୁଜାମାଡ଼ ଗ୍ରାମର ବଞ୍ଜରା ନେତାମା ଓ ତାଙ୍କର ୧୦ବର୍ଷର ପୁଅ ଦେବେନ୍ଦ୍ର ନିକଟସ୍ଥ ଜଙ୍ଗଲକୁ ବାଉଁଶ କାଟିବାକୁ ଯାଇଥିଲେ । ହଠାତ୍ ଏକ ବଣୁଆ ଭାଲୁ ଆସି ବଞ୍ଜା ରାମଙ୍କୁ ଆକ୍ରମଣ କରିଥିଲା । ସେ ଚିତ୍କାର କରିବାରୁ ନିକଟରେ ଥିବା ପୁଅ ଦେବେନ୍ଦ୍ର ଉପସ୍ଥିତ ବୁଦ୍ଧି ଖଟାଇ ନିକଟରେ ପଡ଼ିଥିବା ଏକ ବାଉଁଶ ବାଡ଼ିରେ ଭାଲୁର ମୁହଁ ଓ ଆଖିକୁ ମାଡ଼ ଦେଇ ଚିତ୍କାର କରିଥିଲା ।
ତଥାପି ଭାଲୁ ଟି ଦେବେନ୍ଦ୍ରକୁ ଆକ୍ରମଣ କରିବାରୁ ଦେବେନ୍ଦ୍ର ମଧ୍ୟ ଭାଲୁ ଟିର ମୁହଁ ଓ ଆଖିକୁ ଜାବୁଡ଼ି ଧରିଥିଲା । ବାପା ପୁଅ ଭାଲୁ ସହ ଖଣ୍ଡ ଯୁଦ୍ଧ ଲାଗି ଯାଇଥିଲେ । ଭାଲୁଟି ଶେଷରେ ହାର୍ ମାନି ଜଙ୍ଗଲକୁ ପଳାଇଥିଲା । ଏମାନଙ୍କ ଚିତ୍କାର ଶୁଣି ଗ୍ରାମବାସୀ ବାପ ପୁଅଙ୍କ ନିକଟରେ ପହଁଚି ଉଭୟଙ୍କୁ ଆହତ ଅବସ୍ଥାରେ ଦାନ୍ତେୱାଡ଼ା ଜିଲ୍ଲା ହସ୍ପିଟାଲକୁ ଚିକିତ୍ସା ପାଇଁ ପଠାଇଛନ୍ତି । ପୁଅର ଉପସ୍ଥିତ ବୁଦ୍ଧି ଯୋଗୁଁ ବାପାର ଜୀବନ ବଞ୍ଚିଯାଇଥିବା ବନ ବିଭାଗ ଓ ଗ୍ରାମବାସୀ ଦେବେନ୍ଦ୍ରକୁ ବାହା ବାହା ଦେଇଛନ୍ତି ।
