ନୂଆଦିଲ୍ଲୀ: ସୋନିଆ ଗାନ୍ଧୀ ମହାମହିମ ରାଷ୍ଟ୍ରପତି ଦ୍ରୌପଦି ମୁର୍ମୁଙ୍କୁ ‘ବିଚାରୀ’ କହିବା ପରେ ସମଗ୍ର ଦେଶରେ ଏହାକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି। ଶୁକ୍ରବାର ପାର୍ଲାମେଣ୍ଟର ମିଳିତ ଅଧିବେଶନରେ ସୋନିଆ ଗାନ୍ଧୀ ମୁର୍ମୁଙ୍କୁ ନେଇ ବିବାଦିୟ ମନ୍ତବ୍ୟ ଦେବାପରେ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ଟାର୍ଗେଟ କରିଛନ୍ତି। ସୋନିଆଙ୍କ ଏହି ‘ବିଚାରୀ’ ଟିପ୍ପଣୀ ଆଦିବାସି ସମ୍ପ୍ରଦାୟରୁ ଆସିଥିବା ରାଷ୍ଟ୍ରପତିଙ୍କ ପାଇଁ ଏକ ଅପମାନ ବୋଲି ମୋଦି କହିଛନ୍ତି।
ଶୁକ୍ରବାର ଏକ ନିର୍ବାଚନି ରାଲିରେ ଯୋଗ ଦେବା ପାଇଁ ପିଏମ ମୋଦି ଦିଲ୍ଲୀର ଦ୍ୱାରକା ଅଞ୍ଚଳ ଗସ୍ତରେ ଅଛନ୍ତି। ଏହି ରାଲିରେ ଯୋଗ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ‘କଂଗ୍ରେସ ସବୁବେଳେ ରାଷ୍ଟ୍ରପତି ଦ୍ରୌପଦି ମୁର୍ମୁଙ୍କ ପ୍ରତି ଅହଙ୍କାର ଓ ଅସମ୍ମାନ ସୂଚକ ମନ୍ତବ୍ୟ ଦେଉଛି’ ବୋଲି ନିଜ ଭାଷଣରେ କହିଛନ୍ତି।
“ଆପଣ ମାନେ ଟିକେ ରାଜ ପରିବାରର ଅହଙ୍କାରକୁ ଦେଖନ୍ତୁ। ସେମାନେ ଆଦିବାସୀ ସମ୍ପ୍ରଦାୟରୁ ଆସିଥିବା ରାଷ୍ଟ୍ରପତି ଦ୍ରୌପଦି ମୁର୍ମୁଙ୍କୁ ବାରମ୍ବାର ଅପମାନ କରୁଛନ୍ତି। ରାଜ ପରିବାରର ଜଣେ ସଦସ୍ୟ ରାଷ୍ଟ୍ରପତିଙ୍କ ଭାଷଣକୁ ବିରକ୍ତିକର କହିବା ସହ ତାଙ୍କୁ ବିଚାରୀ ବୋଲି ମଧ୍ୟ କହିପାରୁଛନ୍ତି। ଏହା କେବଳ ତାଙ୍କର ନୁହେଁ ସମଗ୍ର ଆଦିବାସୀ ସମ୍ପ୍ରଦାୟର ଅପମାନ” ବୋଲି ପିଏମ ମୋଦି ନିଜ ଭାଷଣରେ କହିଛନ୍ତି।
ସୂଚନା ମୁତାବକ, ରାଷ୍ଟ୍ରପତି ମୁର୍ମୁ ବଜେଟ୍ ଅଧିବେଶନର ପ୍ରଥମ ଦିନ ସଂସଦର ଉଭୟ ଗୃହକୁ ସମ୍ୱୋଧିତ କରି ଥିଲେ। ନିଜ ସ୍ୱାଗତ ସମ୍ଭାଷଣରେ ସେ ସରକାରଙ୍କର ଉପଲବ୍ଧି ଗୁଡ଼ିକୁ ଉଲ୍ଲେଖ କରି ଥିଲେ। ତେବେ ଏହାକୁ ନେଇ ସୋନିଆ ରାଷ୍ଟ୍ରପତି ମୁର୍ମୁ ସମ୍ୱୋଧନର ଶେଷରେ ଥକି ଯାଇ ଥିଲେ ଏବଂ ବିଚାରୀ ବହୁତ ମୁସ୍କିଲରେ କଥା କହି ପାରୁ ଥିଲେ ବୋଲି ମନ୍ତବ୍ୟ ଦେଇଥିଲେ। ଅନ୍ୟପଟେ ରାହୁଲ ଗାନ୍ଧୀ ଏହି ସମ୍ଭାଷଣକୁ ବିରକ୍ତିକର ମଧ୍ୟ କହିଥିଲେ।
ରାଷ୍ଟ୍ରପତି ମୁର୍ମୁଙ୍କ ଅଭିଭାଷଣ ଉପରେ ପ୍ରତିକ୍ରିୟା ଦେଇ ସୋନିଆ ଗାନ୍ଧୀ “ସେ ନିଜର ସମ୍ୱୋଧନର ଶେଷ ଯାଏ ଥକି ଯାଇ ଥିଲେ ଏବଂ ବହୁତ ମୁସ୍କିଲରେ କଥା କହି ପାରୁ ଥିଲେ। ଶେଷରେ ରାଷ୍ଟ୍ରପତି ବହୁତ ଥକି ଯାଇଥିଲେ ,ସେ ମୁସ୍କିଲରେ କଥା କହୁଥିଲେ, ବିଚାରୀ” ବୋଲି ସୋନିଆ ସଂସଦ ପରିସରରେ କହିଥିଲେ। ସୋନିଆଙ୍କର ଏହି ଭିଡିଓ ବର୍ତ୍ତମାନ ବିଭିନ୍ନ ସୋଶିଆଲ ମିଡିଆରେ ଭାଇରାଲ ହେବାରେ ଲାଗିଛି।
