ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) କେତେ ଖର୍ଚ୍ଚ କରିଥିଲା ସେନେଇ ଶୁକ୍ରବାର ଦଳ ପକ୍ଷରୁ ନିର୍ବାଚନ ଆୟୋଗଙ୍କୁ ରିପୋର୍ଟ ଦିଆଯାଇଛି । ଏହି ରିପୋର୍ଟ ଅନୁସାରେ, ଗତ ଲୋକସଭା ନିର୍ବାଚନରେ ବିଜେପି ମୋଟ ୧୭୩୭.୬୮ କୋଟି ଟଙ୍କା ଖର୍ଚ୍ଚ କରିଛି । ଏହି ଅର୍ଥକୁ ଦଳ ଦୁଇ ଭାଗରେ ବିଭକ୍ତ କରିଛି । ଦଳୀୟ ପ୍ରଚାର ପ୍ରସାର ଲାଗି ୮୮୪.୪୫ କୋଟି ଟଙ୍କା ଏବଂ ନିର୍ବାଚନ ଲଢ଼ିବାକୁ ପ୍ରାର୍ଥୀଙ୍କୁ ୮୫୩.୨୩ କୋଟି ଟଙ୍କା ଦେଇଥିଲା ବିଜେପି । ମିଡିଆରେ ବିଜ୍ଞାପନ, ଏସଏମଏସ୍, ଓ୍ବେବସାଇଟ୍ ଏବଂ ଟିଭି ଚ୍ୟାନେଲ୍ରେ କଣ୍ଟେଣ୍ଟ ପ୍ରସାରଣ ଲାଗି ଦଳ ପକ୍ଷରୁ ୬୧୧.୫୦ କୋଟି ଟଙ୍କା ଆବଣ୍ଟନ କରାଯାଇ ଥିବା ବେଳେ ପୋଷ୍ଟର, ବ୍ୟାନର, ହୋର୍ଡିଂସ୍ ଏବଂ ପତାକା ଲଗାଇବାରେ ଦଳ ୫୫.୭୫ କୋଟି ଟଙ୍କା ଲଗାଇଥିଲା ।
ସେହିଭଳି ଜନ ସମାବେଶ, ରାଲି, ଶୋଭାଯାତ୍ରା, ଷ୍ଟେଜ୍, ବ୍ୟାରିକେଡସ୍ ଏବଂ ଗାଡ଼ି ପାଇଁ ୧୯.୮୪ କୋଟି ଟଙ୍କା ଖର୍ଚ୍ଚ ହୋଇଥିଲା । ଦଳ ମୁଖ୍ୟାଳୟ ଷ୍ଟାର ପ୍ରଚାରକମାନଙ୍କ ଭ୍ରମଣ ଏବଂ ଅନ୍ୟାନ୍ୟ ଆନୁଷଙ୍ଗିକ ଖର୍ଚ୍ଚ ବାବଦକୁ ୧୬୮.୯୨ କୋଟି ଟଙ୍କା ମଞ୍ଜୁର କରିଥିବା ବେଳେ ଅନ୍ୟ ନେତାଙ୍କ ଭ୍ରମଣ ବାବାଦକୁ ୨.୫୩ କୋଟି ଟଙ୍କା ଖର୍ଚ୍ଚ କରିଥିଲା ବିଜେପି । ଲାଗାତର ତୃତୀୟ ଥର ଲୋକସଭା ନିର୍ବାଚନରେ ବିଜୟୀ ହୋଇ କେନ୍ଦ୍ରରେ ସରକାର କରିଥିବା ବିଜେପି ପ୍ରଚାର ପ୍ରସାର ଲାଗି ଅଧିକ ଖର୍ଚ୍ଚ କରିଛି । ଏନେଇ ଦଳ ପକ୍ଷରୁ ଇସିଙ୍କୁ ଦିଆଯାଇଥିବା ରିପୋର୍ଟରୁ ଜଣାପଡ଼ିଛି ।
ସେପଟେ କଂଗ୍ରେସ ୨୦୨୪ ଲୋକସଭା ଏବଂ ୪ ରାଜ୍ୟ ଆନ୍ଧ୍ର ପ୍ରଦେଶ, ଓଡ଼ିଶା, ଅରୁଣାଚଳ ପ୍ରଦେଶ ଏବଂ ସିକ୍କିମ ବିଧାନସଭା ନିର୍ବାଚନ ଲାଗି ୫୮୪.୬୫ କୋଟି ଟଙ୍କ ଖର୍ଚ୍ଚ କରିଥିଲା । ଏନେଇ ନିର୍ବାଚନ ଆୟୋଗ ଅକ୍ଟୋବରରେ ପ୍ରକାଶ କରିଥିବା ରିପୋର୍ଟରୁ ଜଣାପଡ଼ିଛି । ତେବେ ବିଜେପି ବିଳମ୍ବରେ ଇସିଙ୍କ ନିକଟରେ ରିପୋର୍ଟ ଦାଖଲ କରିଥିବାରୁ ଦୁଃଖ ପ୍ରକାଶ କରିଛି । ନିର୍ବାଚନ ଶେଷ ହେବାର ୯୦ ଦିନ ଭିତରେ ଖର୍ଚ୍ଚ ସଂପର୍କରେ ସବୁ ଦଳଗୁଡ଼ିକୁ ଇସିଙ୍କୁ ତଥ୍ୟ ଦେବା ପାଇଁ ଗାଇଡ୍ ଲାଇନ୍ ରହିଛି ।
