ନୂଆଦିଲ୍ଲୀ: କୁମ୍ଭମେଳାକୁ ନେଇ ଫୁଣି ଆଉ ଏକ ଦୁଃଖଦ ଖବର ସାମ୍ନାକୁ ଆସିଛି। ଖବର ମୁତାବକ ଉତ୍ତରପ୍ରଦେଶର ଗାଜିପୁର ଅଞ୍ଚଳରେ ଶୁକ୍ରବାର ସକାଳେ କୁମ୍ଭମେଳାରେ ଯୋଗଦେଇ ଫେରୁଥିବା ଭକ୍ତଙ୍କ ଗାଡି ଉପରେ ଏକ ଟ୍ରକ ମାଡିଯାଇଛି। ଏହି ଦୁର୍ଘଟଣାରେ ଅନେକ ଲୋକଙ୍କ ମୃତ୍ୟୁ ହୋଇଥିବା ବେଳେ ଅନେକ ଲୋକ ଗୁରୁତର ଆହାତ ହୋଇଥିବା ନେଇ ଆଧିକାରିକ ସ୍ତରରେ ସୂଚନା ମିଳିଛି।
ସୂଚନା ମୁତାବକ, ଗାଡିରେ ଥିବା ସମସ୍ତ ଭକ୍ତ ଉତ୍ତରପ୍ରଦେଶର ହୋଇଥିବା ବେଳେ ସେମାନେ କୁମ୍ଭରେ ଯୋଗ ଦେଇ ଏକ ପିକଅପ ଗାଡି ଯୋଗେ ଘରକୁ ଫେରୁଥିଲେ। ହଠାତ୍ ଏହି ସମୟରେ ଏକ ଟ୍ରକ ନିୟନ୍ତ୍ରଣ ହରାଇ ଉକ୍ତ ଗାଡିକୁ ଧକ୍କା ଦେଇଥିଲା। ଏହି ଧକ୍କା ଏତେ ଭୟଙ୍କର ଥିଲା ଯେ ଘଟଣାସ୍ଥଳରେ ୬ ଜଣଙ୍କ ପ୍ରଣବାୟୁ ଉଡିଯାଇଥିଲା। ତେବେ ଖବର ଲେଖାହେବାଯାଏ ଏହି ଦୁର୍ଘଟଣାରେ ୨୦ ଜଣ ଗୁରୁତର ଆହତ ହୋଇ ଗାଜିପୁର ମେଡିକାଲ କଲେଜରେ ଭର୍ତ୍ତି ହୋଇଥିବା ନେଇ ସୂଚନା ମିଳିଛି।
ପ୍ରାରମ୍ଭିକ ସ୍ତରରେ ଏହି ଦୁର୍ଘଟଣା ନନ୍ଦଗଞ୍ଜ ପୋଲିସ ଥାନା ଅଧିନ କୁସୁମି କାଲା ଅଞ୍ଚଳରେ ଘଟିଥିବା ନେଇ ସୂଚନା ମିଳିଛି। ତେବେ ଦୁର୍ଘଟମା ଘଟେଇ ସାରିବା ପରେ ଟ୍ରକ ଡ୍ରାଇଭର ଜଣଙ୍କ ଘଟଣାସ୍ଥଳରୁ ଫେରାର ହୋଇଯାଇଛି। ଦୁର୍ଘଟଣାରେ ଆହତ ମାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିବା ପାଇଁ ସ୍ଥାନିୟ ପ୍ରଶାସନ ସହ ସ୍ଥାନିୟ ଲୋକମାନେ ସହଯୋଗ କରିଥିଲେ।
କୁମ୍ଭମେଳାରେ ଦଳାଚକଟା ହୋଇ ୩୦ ଜଣଙ୍କ ମୃତ୍ୟୁ ହେବା ସହ ୬୦ ଜଣ ଆହତ ହେବା ଘଟଣାର ଦିନକ ପରେ ଏହି ଦୁର୍ଘଟଣା ସମଗ୍ର ଦେଶରେ ଅଲଡୋନ ସୃଷ୍ଟି କରିଛି। ତେବେ ଘଟଣା ମୁତାବକ ପବିତ୍ର ମୌନି ଅମାବାସ୍ୟାରେ ଅମୃତ ସ୍ନାନ ପାଇଁ ଲକ୍ଷଲକ୍ଷ ଭକ୍ତ ପ୍ରୟାଗରାଜରେ ଏକାଠି ହୋଇଥିଲେ। ଠେଲାପେଲାରେ ହଠାତ ବ୍ୟରିକେଡ ଭାଙ୍ଗି ଯିବାରୁ ହଠାତ ଦଳାଚକଟା ଆରମ୍ଭ ହୋଇଯାଇଥିଲା। ଏହି ଘଟଣା ପରେ ବର୍ତ୍ତମାନ ଉତ୍ତରପ୍ରଦେଶ ସରକାର ବାହାର ରାଜ୍ୟର ଗାଡିକୁ ପ୍ରୟାଗରାଜରେ ପ୍ରବେଶ ଅନୁମତି ଦେବା ବନ୍ଦ କରିଦେଇଛନ୍ତି।
