ନୂଆଦିଲ୍ଲୀ: ପ୍ରେମିକାର ବାହାଘର ସ୍ଥିର ହୋଇଗଲା ବୋଲି ସହିପାରିଲାନି ପ୍ରେମିକ। ପେଟ୍ରୋଲ ଢାଳି ନିଜେ ଜଳିଲା, ପ୍ରେମିକାକୁ ବି ଜାଳିଲା। ଘଟଣାରେ ୨୨ ବର୍ଷୀୟା ପ୍ରେମିକା ନିଲୁ ଯାଦବଙ୍କର ମୃତ୍ୟୁ ହୋଇଥିବା ବେଳେ ପ୍ରେମିକ ଏବେ ଡାକ୍ତରଖାନାରେ ମରଣ ସହ ସଂଗ୍ରାମ କରୁଛି।
ଘଟଣା ଘଟିଛି ଉତ୍ତର ପ୍ରଦେଶର ପ୍ରତାପଗଡ଼ରେ। ଖବର ମୁତାବକ ଆସନ୍ତା ମାର୍ଚ୍ଚ ୨ ତାରିଖରେ ନିଲୁଙ୍କର ବିବାହ ଠିକ୍ ହୋଇଥିଲା। ହେଲେ ଏହି ଖବର ପ୍ରେମିକ ବିକାଶ ପାଖରେ ପହଞ୍ଚିବା ପରେ ସେ ହଠାତ୍ ଏକଥାକୁ ବିଶ୍ୱାସ କରିପାରିଲା ନାହିଁ। ମନ ଭିତରେ ଅନେକ କିଛି ଯୋଜନା କରିଥିଲା ବିକାଶ।
ଶୁକ୍ରବାର ସକାଳେ ନିଲୁ ସ୍କୁଲକୁ ପାଠ ପଢାଇବାକୁ ବାହାରିଥିବା ବେଳେ ଯୋଜନା ମୁତାବକ କାମ କରିଥିଲା ବିକାଶ। ନିଲୁଙ୍କୁ ଅଧାରାସ୍ତାରେ ଅଟକାଇ ନିଜ ଫାର୍ମକୁ ଡାକି ନେଇଥିଲା। ନିଲୁ ଫାର୍ମରେ ପହଞ୍ଚିବା ପରେ ପୂର୍ବରୁ ପ୍ରସ୍ତୁତ ହୋଇ ରହିଥିବା ବିକାଶ ଉଭୟଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା। ଭୀଷଣ ନିଆଁରେ ଦୁଇ ଜଣଙ୍କ ଶରୀର ଜଳି ଯାଇଥିଲା। ଘଟଣାରେ ପ୍ରେମିକା ନିଲୁଙ୍କର ମୃତ୍ୟୁ ହୋଇଥିବା ବେଳେ ୨୯ ବର୍ଷୀଯ ବିକାଶର ଅବସ୍ଥା ଗୁରୁତର ରହିଛି। ବର୍ତ୍ତମାନ ସେ କୌଣସି ବିବୃତ୍ତି ଦେଇପାରିବେ ନାହିଁ ବୋଲି ପୋଲିସ କହିଛି।
ଏହି ମାମଲାର ତଦନ୍ତ କରିବାକୁ ଯାଇଥିବା ପୋଲିସକୁ ଘଟଣାସ୍ଥଳରୁ ଏକ ବଟଲ ଭର୍ତ୍ତି ପେଟ୍ରୋଲ ମିଳିଛି। ଏହା ସହ ବିକାଶଙ୍କ ବାଇକ ସମେତ ଉଭୟଙ୍କ ମୋବାଇଲ ଫୋନ ମଧ୍ୟ ପୋଲିସ ଘଟଣାସ୍ଥଳରୁ ଜବତ କରିଛି। ତେବେ ଏହି ମାମଲାର ତଦନ୍ତ ଚାଲୁ ରହିଥିବା ବେଳେ ବିକାଶ ସୁସ୍ଥ ହେଲେ ସବୁ ତଥ୍ୟ ଜଣାପଡିବ ବୋଲି ପୋଲିସ କହିଛି।
