ନୂଆଦିଲ୍ଲୀ, ୩୧।୧: ମମତା କୁଲକର୍ଣ୍ଣୀକୁ ବଡ଼ ଝଟକା । କିନ୍ନର ଆଖଡ଼ାରେ ତେଜିଲା ବିବାଦ । ମହାମଣ୍ଡଳେଶ୍ୱର ପଦରୁ ହଟିଲେ ମମତା କୁଲକର୍ଣ୍ଣୀ । ଲକ୍ଷ୍ମୀ ନାରାୟଣ ତ୍ରିପାଠୀଙ୍କୁ ଆଚାର୍ଯ୍ୟ ମହାମଣ୍ଡଳେଶ୍ୱର ପଦବୀରୁ ହଟାଇ ଦିଆଯାଇଛି । ଉଭୟଙ୍କୁ କିନ୍ନର ଆଖଡ଼ାରୁ ବହିଷ୍କାର କରିଥିବା ଜଣାପଡ଼ିଛି । ଏନେଇ ସୂଚନା ଦେଇଛନ୍ତି କିନ୍ନର ଆଖଡ଼ାର ସଂସ୍ଥାପକ ଋଷି ଅଜୟ ଦାସ । ତେବେ ମମତା କୁଲକର୍ଣ୍ଣି ଲଣ୍ଡା ହୋଇନଥିବାରୁ ତାଙ୍କ ବିରୁଦ୍ଧରେ ଏଭଳି ପଦକ୍ଷେପ ନିଆଯାଇଥିବା କୁହାଯାଉଛି ।
କିଛି ଦିନ ପୂର୍ବରୁ ମମତା ମହାକୁମ୍ଭରେ ସନ୍ୟାସିନୀ ଗ୍ରହଣ କରିଥିବା ଘୋଷଣା କରିଥିଲେ । କିନ୍ନର ଆଖଡ଼ାରେ ସେ ଆଚାର୍ଯ୍ୟ ମହାମଣ୍ଡଳେଶ୍ୱର ଲକ୍ଷ୍ମୀ ନାରାୟଣ ତ୍ରିପାଠୀଙ୍କୁ ଭେଟିଥିଲେ । ଯାହା ପରେ ମମତା ସଙ୍ଗମରେ ନିଜର ପିଣ୍ଡଦାନର ବିଧି କରିବା ସହ କିନ୍ନର ଆଖଡ଼ାରେ ତାଙ୍କର ରାଜ୍ୟାଭିଷେକ ମଧ୍ୟ ହୋଇଥିଲା । ମହାକୁମ୍ଭରେ ସନ୍ୟାସ ଗ୍ରହଣ କରିବା ପରେ, ମମତାଙ୍କୁ 'ଶ୍ରୀ ଯମୟୀ ମମତା ନନ୍ଦ ଗିରି' ନାମକ ଏକ ନୂତନ ନାମ ଦିଆଯାଇଥିଲା । ଏହା ସହିତ, ତାଙ୍କୁ କିନ୍ନର ଆଖଡ଼ାର ମହାମଣ୍ଡଳେଶ୍ୱର ଭାବରେ ନିଯୁକ୍ତ କରାଯାଇଥିଲା । କିନ୍ତୁ, ବର୍ତ୍ତମାନ ତାଙ୍କୁ ଏହି ପଦରୁ ବହିଷ୍କାର କରାଯାଇଛି ବୋଲି କିନ୍ନର ଆଖଡ଼ାର ପ୍ରତିଷ୍ଠାତା ଅଜୟ ଦାସ କହିଛନ୍ତି ।
କହିରଖୁ କି, ପୂର୍ବରୁ ଏକ ସାକ୍ଷାତକାରରେ ମମତା କୁଲକର୍ଣ୍ଣି କହିଥିଲେ ଯେ, ମୋର ଭାରତ ଛାଡ଼ିବାର କାରଣ ଆଧ୍ୟାତ୍ମିକତା ଥିଲା । ୧୯୯୬ ମସିହାରେ, ମୁଁ ଆଧ୍ୟାତ୍ମିକତା ପ୍ରତି ଆକର୍ଷିତ ହୋଇଥିଲି ଏବଂ ସେହି ସମୟରେ ମୁଁ ଗୁରୁ ଗଗନ ଗିରି ମହାରାଜଙ୍କୁ ଭେଟିଥିଲି । ତାଙ୍କ ଆଗମନ ପରେ, ଆଧ୍ୟାତ୍ମିକତା ପ୍ରତି ମୋର ଆଗ୍ରହ ବଢ଼ିଗଲା ଏବଂ ମୋର ତପସ୍ୟା ଆରମ୍ଭ ହେଲା । ମୁଁ ବିଶ୍ୱାସ କରେ ବଲିଉଡ୍ ମୋତେ ପ୍ରସିଦ୍ଧି ଦେଇଛି । ମୁଁ ବଲିଉଡ୍ ଛାଡ଼ି ୨୦୦୦ ରୁ ୨୦୧୨ ପର୍ଯ୍ୟନ୍ତ ତପସ୍ୟା ଜାରି ରଖିଥିଲି ।
