ଚଣ୍ଡିଗଡ଼, ୩୧।୧: ପଞ୍ଜାବର ଫିରୋଜପୁର ଜିଲ୍ଲାର ଉତ୍ତର ଗାଁରେ ମର୍ମନ୍ତୁଦ ଦୁର୍ଘଟଣା । କ୍ୟାଣ୍ଟର-ପିକଅପ୍ ଭ୍ୟାନ୍ ମୁହାଁମୁହିଁ ଧକ୍କା । ଦୁର୍ଘଟଣାରେ ୯ ଜଣଙ୍କର ମୃତ୍ୟୁ ହୋଇଥିବା ବେଳେ ୧୫ରୁ ଅଧିକ ଆହତ ହୋଇଛନ୍ତି । ସମସ୍ତ ଆହତଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି । ଦୁର୍ଘଟଣା ପରେ ସ୍ଥାନୀୟ ଲୋକେ ଏନେଇ ପୋଲିସକୁ ସୂଚନା ଦେଇଥିଲେ । ସୂଚନାନୁସାରେ, ଯାତ୍ରୀମାନଙ୍କ ମଧ୍ୟରେ ୨୦ ଜଣ ୱେଟର ଥିବାବେଳେ ପିକଅପ୍ ଭ୍ୟାନରେ ଯାତ୍ରୀମାନେ ଫିରୋଜପୁରରୁ ଜଲାଲାବାଦ ଏକ କାର୍ଯ୍ୟକ୍ରମରେ ଯୋଗ ଦେବାକୁ ଯାଉଥିଲେ ।
ତେବେ ସକାଳୁ କୁହୁଡ଼ି ଥିବାରୁ ଏଭଳି ଦୁର୍ଘଟଣା ଘଟିଥିବା ପୋଲିସ କହିଛି । ଯେଉଁ କାରଣରୁ ପିକଅପ୍ ଭ୍ୟାନଟି ରାସ୍ତାକଡ଼ରେ ଥିବା କ୍ୟାଣ୍ଟରଟିକୁ ପିଟିଥିଲା । ଫଳରେ ୯ ଜଣଙ୍କର ମୃତ୍ୟୁ ହୋଇଥିଲା । ଦୁର୍ଘଟଣା ପରେ ଉଦ୍ଧାରକାରୀ ଦଳଙ୍କ ସମେତ ଗ୍ରାମବାସୀମାନେ ଆହତଙ୍କୁ ଉଦ୍ଧାର କରିଥିଲେ । ସମସ୍ତ ଗୁରୁତରଙ୍କୁ ଫିରୋଜପୁର, ଫରିଦକୋଟ, ଜଲାଲବାଦ ଓ ଗୁରୁହରସହାୟରେ ଥିବା ହସ୍ପିଟାଲରେ ଭର୍ତ୍ତି କରାଯାଇଛି । ୬ ଜଣ ଗୁରୁତରଙ୍କୁ ଫରିଦକୋଟର ଗୁରୁ ଗୋବିନ୍ଦ ସିଂ ମେଡିକାଲ କଲେଜକୁ ପଠାଯାଇଥିବା ବେଳେ ଅନ୍ୟ ଆହତମାନେ ଜଲାଲାବାଦ ଡାକ୍ତରଖାନାରେ ଚିକିତ୍ସିତ ହେଇଛନ୍ତି । ମୃତଦେହକୁ ଜଲାଲାବାଦ ଡାକ୍ତରଖାନାକୁ ଶବବ୍ୟବଚ୍ଛେଦ ପାଇଁ ପଠାଯାଇଛି ।
ଡିଏସ୍ପି ସତନାମ ସିଂଙ୍କ କହିବାନୁସାରେ, ଦୁର୍ଘଟଣାର ୧୦ ମିନିଟ୍ ଭିତରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ଯାହା ପରେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ତେବେ ବର୍ତ୍ତମାନ ପର୍ଯ୍ୟନ୍ତ ମୃତକ ଓ ଆହତଙ୍କ ପରିଚୟ ମିଳିପାରିନାହିଁ । ମୃତକଙ୍କ ପରିଚୟ ମିଳିବା ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିବ ପୋଲିସ । ପୋଲିସ ଘଟଣାର ତଦନ୍ତ ଜାରି ରଖିଛି ।
