ନୂଆଦିଲ୍ଲୀ,୧୧/୦୧: ଜୟ ଯବାନ ଜୟ କିଶାନ ସ୍ଲୋଗାନ ଦେଇଥିବା ଦେଶର ଦ୍ବିତୀୟ ପ୍ରଧାନମନ୍ତ୍ରୀ ଲାଲ ବାହାଦୂର ଶାସ୍ତ୍ରୀଙ୍କର ଆଜି ପୂଣ୍ୟତିଥି । ୧୯୬୬ ମସିହା ଜାନୁଆରୀ ୧୧ ତାରିଖରେ ତାସକେଣ୍ଟରେ ଲାଲ ବାହାଦୂର ଶାସ୍ତ୍ରୀଙ୍କ ଆକସ୍ମିକ ମୃତ୍ୟୁ ହୋଇଥିଲା । ନମ୍ରତା, ସଚ୍ଚୋଟତା ଓ ସରଳତା ପାଇଁ ପ୍ରସିଦ୍ଧ ଥିଲେ ଶାସ୍ତ୍ରୀ । ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହେରୁଙ୍କ ନିଧନ ପରେ ୧୯୬୪ରେ ପ୍ରଧାନମନ୍ତ୍ରୀ ଭାବେ ଦାୟିତ୍ବ ଗ୍ରହଣ କରିଥିଲେ ସେ । ୧୮ ମାସ ଦେଶର ପ୍ରଧାନମନ୍ତ୍ରୀ ଥିଲେ । ଲାଲ ବାହାଦୂର ଶାସ୍ତ୍ରୀଙ୍କ ଆକସ୍ମିକ ମୃତ୍ୟୁ ଏବେ ବି ରହସ୍ୟମୟ ହୋଇ ରହିଛି । ଆଜି ବି ଲୋକ ବିଶ୍ବାସ କରିପାରୁ ନାହାନ୍ତି ଯେ ତାଙ୍କର ମୃତ୍ୟୁ ପ୍ରାକୃତିକ ଥିଲା ।
ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହେରୁଙ୍କ ଦେହାନ୍ତ ପରେ ସ୍ବାଧୀନ ଭାରତର କ୍ଷମତା କିଏ ନେବେ ଏହି ପ୍ରଶ୍ନ ସମସ୍ତଙ୍କ ମନରେ ଆସିଥିଲା । ଦୁଇ ସପ୍ତାହ ପରେ ଦେଶର ଦ୍ବିତୀୟ ପ୍ରଧାନମନ୍ତ୍ରୀ ହୋଇଥିଲେ ଶାସ୍ତ୍ରୀ । ଏହା ପୂର୍ବରୁ ଗୃହମନ୍ତ୍ରୀ ଥିଲେ ସେ । ୧୯୬୪ ଜୁନ ୯ ତାରିଖରେ ପ୍ରଧାନମନ୍ତ୍ରୀ ପଦ ଗ୍ରହଣ କରିଥିଲେ ଲାଲ ବାହାଦୂର ଶାସ୍ତ୍ରୀ । ସେ ୧୮ ମାସ ପ୍ରଧାନମନ୍ତ୍ରୀ ଥିଲେ । ତାଙ୍କ ନେତୃତ୍ବରେ ଭାରତ ୧୯୬୫ ଯୁଦ୍ଧରେ ପାକିସ୍ତାନକୁ କଡା ଜବାବ ଦେଇଥିଲା । ତାସକେଣ୍ଟରେ ପାକିସ୍ତାନ ରାଷ୍ଟ୍ରପତି ଆୟୁବ ଖାନଙ୍କ ସହ ଯୁଦ୍ଧ ସମାପ୍ତ କରିବାକୁ ବୁଝାମାଣା କରିଥିଲେ । ୧୯୬୬ ଜାନୁଆରୀ ୧୧ ତାରିଖରେ ରହସ୍ୟମୟ ପରିସ୍ଥିତିରେ ତାଙ୍କର ମୃତ୍ୟୁ ହୋଇଥିଲା । ପ୍ରଧାନମନ୍ତ୍ରୀ ଭାବେ ଲାଲ ବାହାଦୂର ଶାସ୍ତ୍ରୀଙ୍କ କାର୍ଯ୍ୟକାଳ ବହୁତ ଛୋଟ ଥିଲା । ସରଳ ସ୍ବଭାବ, ଦୃଢ ଇଚ୍ଛାଶକ୍ତି ବଳରେ ସେ ବଡ ସଫଳତା ହାସଲ କରିଥିଲେ । ଦେଶର କଠିନ ସମୟରେ ସତ୍ତା ସମ୍ଭାଳିଥିଲେ । ଅନେକ ଚ୍ୟାଲେଞ୍ଚର ସାମ୍ନା କରିଥିଲେ । ଆସନ୍ତୁ ଜାଣିବା ତାଙ୍କ ଜୀବନର କିଛି ରୋଚକ ଘଟଣା ।
୯ ଥର ଜେଲ ଯାଇଥିଲେ- ୧୯୦୪ ମସିହା ଅକ୍ଟୋବର ୨ ତାରିଖରେ ଉତ୍ତରପ୍ରଦେଶର ମୁଗଲସରାଇରେ ଜନ୍ମଗ୍ରହଣ କରିଥିଲେ ଲାଲ ବାହାଦୂର ଶାସ୍ତ୍ରୀ । ଦେଢ ବର୍ଷ ବୟସରେ ବାପାଙ୍କୁ ହରାଇଥିଲେ ସେ । ୧୬ ବର୍ଷ ବୟସରେ ପାଠପଢା ଛାଡିଥିଲେ । ୧୭ ବର୍ଷ ବୟସରେ ଜେଲ ଯାଇଥିଲ ମାତ୍ର ନାବାଳାକ ବୋଲି ତାଙ୍କୁ ମୁକ୍ତ କରାଯାଇଥିଲା । ୧୯୨୮ରେ ଲଳିତାଙ୍କୁ ସେ ବିବାହ କରିଥିଲେ । ଉଭଙ୍କର ୬ ସନ୍ତାନ ଥିଲେ । ୧୯୩୦ରେ ଲବଣ ସତ୍ୟାଗ୍ରହ ସମୟରେ ଅଢେଇ ବର୍ଷ ଜେଲରେ ରହିଥିଲେ । ପରେ ସ୍ବାଧୀନତା ଆନ୍ଦୋଳନରେ ଗୋଟିଏ ବର୍ଷ ଜେଲରେ ରହିଥିଲେ । ୧୯୪୨ ଭାରତ ଛାଡ ଅନ୍ଦୋଳନରେ ୪ ବର୍ଷ ଜେଲରେ ରହିବାକୁ ପଡିଥିଲା । ୧୯୪୬ରେ ଜେଲରୁ ବାହାରିଥିଲେ । ସ୍ବାଧୀନତା ସଂଗ୍ରାମ ସମୟରେ ସେ ୯ ଥର ଜେଲ ଯାଇଥିଲେ ।
ଦେଶକୁ ଭୋକିଲା ରହିବାକୁ ଅପିଲ କରିଥିଲେ- ପାକିସ୍ତାନ ସହ ଯୁଦ୍ଧ ସମୟରେ ଦେଶରେ ଅନ୍ନର ଅଭାବ ଦେଖିବାକୁ ମିଳିଥିଲା । ଦେଶବାସୀଙ୍କ ଧୈର୍ଯ୍ୟ ବଢାଇବାକୁ 'ଜୟ ଯବାନ ୟୟ କିଶାନ ନାରା' ସ୍ଲୋଗାଲ ଦେଇଥିଲେ । ଏହା ସହିତ ଅନ୍ନର ଅଭାବ ଦୂର କରିବା ସହ ଜଡିତ ଦେଶର ଅବସ୍ଥା ସୁଧାରିବାକୁ ଗୋଟିଏ ସମୟରେ ଭୋକିଲା ରହିବାକୁ ଅପିଲ କରିଥିଲେ । ଶାସ୍ତ୍ରୀଙ୍କ ଅପିଲକୁ ଦେଶ ପାଳନ କରିଥିଲା ।
ରହସ୍ୟରେ ମତ୍ୟୁ- ୧୯୬୬ ଜାନୁଆରୀ ୧୧ ତାରିଖରେ ଲାଲ ବାହାଦୂର ଶାସ୍ତ୍ରୀଙ୍କର ଦେହାନ୍ତ ହୋଇଥିଲା । ଉଜବେକିସ୍ତାନର ତାସକେଣ୍ଟରେ ତାଙ୍କର ନିଧନ ହୋଇଥିଲା । ସେତେବେଳେ ଭାରତ ଓ ପାକିସ୍ତାନ ଯୁଦ୍ଧ ପରେ ପରିସ୍ଥିତି ସମ୍ପର୍କରେ ଏକ ଚୁକ୍ତିନାମା କରିବାକୁ ଶାସ୍ତ୍ରୀ ସୋଭିଏତ ୟୁନିଅନ ସହର ତାସକେଣ୍ଟ ଯାଇଥିଲେ । ୧୯୬୬ ଜାନୁଆରୀ ୧୦ ତାରିଖରେ ପାକିସ୍ତାନ ରାଷ୍ଟ୍ରପତି ଆୟୁବ ଖାନଙ୍କ ସହ ଚୁକ୍ତି ସ୍ବାକ୍ଷର କରିଥିଲେ । ତାସକେଣ୍ଟ ଚୁକ୍ତିନାମା ପରେ ଶାସ୍ତ୍ରୀଜୀଙ୍କ ଉପରେ ଚାପ ରହିଥିଲା । ଚୁକ୍ତିନାମା ପର ଦିନ ରାତିରେ ହୃଦଘାତରେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ସ୍ବାସ୍ଥ୍ୟବସ୍ଥା ଠିକ ଥିଲା ମାତ୍ର ତାଙ୍କର ମୃତ୍ୟୁ ହୃହଘାତରେ ହୋଇଥିବା କୁହାଯାଇଥିଲା । ଯେବେ ତାସକାଣ୍ଟରୁ ତାଙ୍କ ମୃତଦେହକୁ ଭାରତକୁ ଅଣାଯାଇଥିଲା ସେବେ ତାଙ୍କ ଦେହରେ କ୍ଷତ ଚିହ୍ନ ଦେଖିବାକୁ ମିଳିଥିବା କିଛି ଲୋକ କହିଥିଲେ । ଆଜି ବି ତାଙ୍କ ମୃତ୍ୟୁର କାରଣ ରହସ୍ୟ ଘେରରେ ରହିଛି ।
