ନୂଆଦିଲ୍ଲୀ,୧୧/୦୧: ଫେବ୍ରୁଆରୀ ୧୯ ତାରିଖରୁ ପାକିସ୍ତାନ ଓ ୟୁଏଇରେ ଆୟୋଜିତ ହେବ ଆଇସିସି ଚାମ୍ପିଅନ୍ସ ଟ୍ରଫି । ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଟୁର୍ଣ୍ଣାମେଣ୍ଟର ଆୟୋଜକ ରହିଛି । ନ୍ୟାସନାଲ ଷ୍ଟାଡିୟମ କରାଚି, ଗଦ୍ଦାଫି ଷ୍ଟାଡିୟମ ଲାହୋର ଏବଂ ରାୱଲପିଣ୍ଡି କ୍ରିକେଟ୍ ଷ୍ଟାଡିୟମରେ ମ୍ୟାଚ୍ ଖେଳାଯିବ । ହାଇବ୍ରିଡ୍ ମଡେଲରେ ଭାରତ ତା’ର ସମସ୍ତ ମ୍ୟାଚ୍ ୟୁଏଇରେ ଖେଳିବାର ସୂଚୀ ଚୂଡ଼ାନ୍ତ ହୋଇଛି।ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, କୌଣସି ଷ୍ଟାଡିୟମର ପୁନରୁଦ୍ଧାର କାର୍ଯ୍ୟ ଶେଷ ହୋଇ ନାହିଁ । ନିର୍ଦ୍ଧାରିତ ସମୟ ମଧ୍ୟରେ କାର୍ଯ୍ୟ ଶେଷ ହେଲା ଭଳି ମନେ ହେଉ ନାହିଁ । ତେଣୁ ସେହି ସବୁ ଷ୍ଟାଡିୟମରେ କେମିତି ମ୍ୟାଚ୍ ଖେଳାଯିବ ବୋଲି ପ୍ରଶ୍ନ ଉଠିଛି ।
ପିସିବି ଏହି ରିପୋର୍ଟକୁ ଖଣ୍ଡନ କରିଛି । ଜଣେ ଅଧିକାରୀ କହିଛନ୍ତି, ‘ନିର୍ଦ୍ଧାରିତ ସମୟ ପୂର୍ବରୁ କାର୍ଯ୍ୟ ଶେଷ ହେବ । ଯେଉଁ ରିପୋର୍ଟ ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଛି ତାହା ମିଥ୍ୟା । ସେଥିରେ କୌଣସି ସତ୍ୟତା ନାହିଁ ।’ ଷ୍ଟାଡିୟମ ନିକଟରେ ବିଭିନ୍ନ କାର୍ଯ୍ୟ ଚାଲିଥିବାର କିଛି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଅନ୍ତର୍ଜାତୀୟ ଗଣମାଧ୍ୟମରେ ଏହାକୁ ନେଇ ରିପୋର୍ଟ ପ୍ରକାଶ ପାଇଥିଲା ।
ଆଇସିସିର ୬ ଜଣିଆ ପ୍ରତିନିଧି ଦଳ ଏବେ ପାକିସ୍ତାନ ଗସ୍ତରେ ରହିଛନ୍ତି । ସେମାନେ ବିଭିନ୍ନ ଷ୍ଟାଡିୟମର କାର୍ଯ୍ୟ ତଦାରଖ କରୁଛନ୍ତି । ପ୍ରଥମ ପର୍ଯ୍ୟାୟରେ ସେମାନେ କରାଚିରେ ପହଞ୍ଚିଛନ୍ତି । ଯାହା ସୂଚନା ରହିଛି, ଆସନ୍ତା ୨୫ ତାରିଖ ସୁଦ୍ଧା ବିଭିନ୍ନ ଷ୍ଟାଡିୟମର ପୁନରୁଦ୍ଧାର କାର୍ଯ୍ୟ ଶେଷ କରିବାର ଡେଡ୍ଲାଇନ ରହିଛି । ଯଦି ସୋସିଆଲ ମିଡିଆରେ ଭାଇରାଲ ହୋଇଥିବା ଫଟୋ ଓ ଭିଡିଓ ସତ ହୋଇଥାଏ ତାହା ହେଲେ ଡେଡ୍ଲାଇନ ପୂର୍ବରୁ କାର୍ଯ୍ୟ ଶେଷ ହେବା ସମ୍ଭବ ନୁହେଁ । ପିସିବି ପକ୍ଷରୁ ଦାବି କରାଯାଇଛି ଯେ, ୩ଟି ଷ୍ଟାଡିୟମର ପୁନରୁଦ୍ଧାର କାର୍ଯ୍ୟ ପାଇଁ ୧୨ ବିଲିୟନ ପାକିସ୍ତାନ ଟଙ୍କା ବିନିଯୋଗ କରାଯାଇଛି ।
୨ଟି ଗ୍ରୁପ୍ରେ ୮ଟି ଦଳ ଚାମ୍ପିଅନ୍ସ ଟ୍ରଫିରେ ସାମିଲ ରହିଛନ୍ତି । ଗ୍ରୁପ୍ ଏ’ରେ ଭାରତ, ବାଂଲାଦେଶ, ପାକିସ୍ତାନ ଓ ନ୍ୟୁଜିଲାଣ୍ଡ ଏବଂ ଗ୍ରୁପ୍ ବି’ରେ ଆଫଗାନିସ୍ତାନ, ଅଷ୍ଟ୍ରେଲିଆ, ଇଂଲଣ୍ଡ ଓ ଦକ୍ଷିଣ ଆଫ୍ରିକା ରହିଛନ୍ତି । ଫେବ୍ରୁଆରୀ ୧୯ ତାରିଖରେ ଉଦ୍ଘାଟନୀ ମ୍ୟାଚ୍ କରାଚୀରେ ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ । ଆଫଗାନିସ୍ତାନକୁ ବିରୋଧ ଚାମ୍ପିଅନ୍ସ ଟ୍ରଫିରେ ଆଫଗାନିସ୍ତାନକୁ ବୟକଟ୍ କରାଯାଉ ବୋଲି ଇଂଲଣ୍ଡ ଓ ଦକ୍ଷିଣ ଆଫ୍ରିକାରେ ସ୍ୱର ଉଠିଛି । ପ୍ରଥମେ ଇଂଲଣ୍ଡର ଜଣେ ରାଜନେତା ଏ ସ୍ୱର ଉଠାଇଥିଲେ । ଆଜି ଦକ୍ଷିଣ ଆଫ୍ରିକା କ୍ରୀଡ଼ାମନ୍ତ୍ରୀ ଗାୟଟନ ମ୍ୟାକକେଞ୍ଜିଏ ସମାନ ସ୍ୱର ଉଠାଇଛନ୍ତି ।
ସେ କହିଛନ୍ତି, ‘ଆଫଗାନିସ୍ତାନରେ ତାଲିବାନ ସରକାର ମହିଳାଙ୍କ ଅଧିକାର ଏବଂ ସ୍ୱାଧୀନତାକୁ ସଙ୍କୁଚିତ କରିଛନ୍ତି । ପୁରୁଷ ଭଳି ମହିଳାଙ୍କୁ ମଧ୍ୟ ସମାନ ଅଧିକାର ମିଳିବା ଦରକାର । କିନ୍ତୁ ତାଲିବାନ ସରକାର ମହିଳା କ୍ରିକେଟ୍ ପ୍ରତି ଆଦୌ ଦୃଷ୍ଟି ଦେଉ ନାହାନ୍ତି । ତେଣୁ ଏହି ଦୃଷ୍ଟିରୁ ଆଫଗାନିସ୍ତାନକୁ ଚାମ୍ପିଅନ୍ସ ଟ୍ରଫିରୁ ବୟକଟ୍ କରାଯିବା ଉଚିତ ।’
