ଥିରୁଭନନ୍ତପୁରମ,୧୯/୦୨: ମଙ୍ଗଳବାର ରାତିରେ କେରଳରେ ଏକ ବଡ଼ ଦୁର୍ଘଟଣା ଘଟିଛି। ମାଲାପ୍ପୁରମ ଜିଲ୍ଲାର ଆରିକୋଡ ସହରରେ ଏକ ଫୁଟବଲ୍ ମ୍ୟାଚ୍ ସମୟରେ ଅଗ୍ନିକାଣ୍ଡ ଯୋଗୁ ୫୦ ରୁ ଅଧିକ ଦର୍ଶକ ପୋଡ଼ି ଯାଇଛନ୍ତି। ମ୍ୟାଚ୍ ଆରମ୍ଭ ହେବାର ଠିକ୍ ପୂର୍ବରୁ ଏହି ଘଟଣା ଘଟିଥିଲା। ସୂଚନାଥାଉକି, ମ୍ୟାଚ୍ ପୂର୍ବରୁ ଆୟୋଜକମାନେ ସେଠାରେ ଏକ ବଡ଼ ବାଣଫୁଟା କାର୍ଯ୍ୟକ୍ରମ ଆୟୋଜନ କରିଥିଲେ। ଠିକ୍ ଏହି ସମୟରେ ବାଣ ଅନିୟନ୍ତ୍ରିତ ଭାବେ ଏଣେତେଣେ ଫୁଟିଥିଲା, ଏଥିରୁ କିଛି ଷ୍ଟାଡିୟମରେ ବସିଥିବା ଦର୍ଶକଙ୍କ ଆଡ଼କୁ ଯାଇ ଫୁଟିବାକୁ ଲାଗିଲା। ଏପରି ପରିସ୍ଥିତିରେ ସେଠାରେ ବିଶୃଙ୍ଖଳା ସୃଷ୍ଟି ହୋଇଥିଲା। ସୌଭାଗ୍ୟବଶତଃ, ଏହି ଦୁର୍ଘଟଣାରେ କୌଣସି ଜୀବନହାନି ହୋଇନାହିଁ, ଯଦିଓ ଏହି ଦୁର୍ଘଟଣାରେ ଦୁଇଜଣ ଦର୍ଶକ ଗୁରୁତର ଭାବରେ ପୋଡ଼ିଯାଇଛନ୍ତି, ତଥାପି ତାଙ୍କୁ ତୁରନ୍ତ ମେଡିକାଲକୁ ନିଆଯାଇ, ସେଠାରେ ସେମାନଙ୍କର ଚିକିତ୍ସା ଚାଲିଛି।
ଅରିକୋଡ ପୋଲିସ କହିଛି ଯେ, "ମଲ୍ଲପୁରମ ଜିଲ୍ଲାର ଅରିକୋଡ ଅଞ୍ଚଳର ଏକ ଷ୍ଟାଡିୟମରେ 'ସେଭେନ୍ସ' ଫୁଟବଲ୍ ଟୁର୍ନାମେଣ୍ଟର ଏକ ମ୍ୟାଚ୍ ସମୟରେ ବାଣ ଫୁଟିବା ଯୋଗୁଁ ୫୦ ରୁ ଅଧିକ ଲୋକ ଆହତ ହୋଇଛନ୍ତି।" ଆହତମାନଙ୍କ ମଧ୍ୟରୁ ଦୁଇ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଅନ୍ୟ ଲୋକଙ୍କର ବିଶେଷ କ୍ଷୟକ୍ଷତି ହୋଇନାହିଁ। ମ୍ୟାଚ୍ ପୂର୍ବରୁ ବାଣଫୁଟା କାର୍ଯ୍ୟକ୍ରମ ବେଳେ ଏହି ଦୁର୍ଘଟଣା ଘଟିଥିଲା। ପାଖରେ ବସିଥିବା ଦର୍ଶକଙ୍କ ଭିତରୁ ବାଣର ପ୍ରଭାବ ପଡ଼ିବା ଫଳରେ କିଛି ଲୋକ ପ୍ରଭାବିତ ହୋଇଥିଲେ। ଆୟୋଜକମାନଙ୍କ ବିରୁଦ୍ଧରେ ଭାରତୀୟ ଦଣ୍ଡ ସଂହିତାର ଧାରା ୨୮୮ (ବିସ୍ଫୋରକ ପଦାର୍ଥ ସମ୍ପର୍କରେ ଅବହେଳା) ଏବଂ ୧୨୫ (ଖ) (ଅନ୍ୟଙ୍କ ଜୀବନ କିମ୍ବା ବ୍ୟକ୍ତିଗତ ସୁରକ୍ଷାକୁ ବିପଦରେ ପକାଇବା) ଅନୁଯାୟୀ ମାମଲା ରୁଜୁ କରାଯାଇଛି।
ସୂଚନାଥାଉକି, ଆରିକୋଡର ଥେରାଟାମ୍ମଲରେ ସେଭେନ୍ସ ଫୁଟବଲ୍ ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ଥିଲା। ସେଥିପାଇଁ ବ୍ୟାପକ କାର୍ଯ୍ୟକ୍ରମ ମଧ୍ୟରେ ବାଣ ପ୍ରଦର୍ଶନ ବ୍ୟବସ୍ଥା କରାଯାଇଥିଲା। ଫାଇନାଲ ମ୍ୟାଚ୍ 'ୟୁନାଇଟେଡ୍ ଏଫସି ନେଲିକୁଥ୍' ଏବଂ 'କେଏମଜି ମାଭୁର୍' ମଧ୍ୟରେ ଖେଳାଯିବାର ଥିଲା। ଏହି ଘଟଣାର ଅନେକ ଭିଡିଓ ମଧ୍ୟ ସାମ୍ନାକୁ ଆସିଛି। ଏଗୁଡ଼ିକ ସୋସିଆଲ ମିଡିଆରେ ବହୁତ ସେୟାର ହେଉଛି।
