ବାଙ୍ଗିରିପୋଷି, ୨୧/୩ : ବାଙ୍ଗିରିପୋଷି ଅଞ୍ଚଳରେ ତାଣ୍ଡବ ରଚିଛି କାଳ ବୈଶାଖୀ। ପ୍ରବଳ ବର୍ଷା ସାଙ୍ଗକୁ କୁଆ ପଥର ମାଡ଼ରେ ଧ୍ୱସ୍ତ ବିଧ୍ୱସ୍ତ ହୋଇ ପଡିଛି ଘର ଦ୍ୱାର। ଉଜୁଡି ଯାଇଛି ଚାଷ ଜମି ଓ ପନିପରିବା ଚାଷ। ବ୍ଲକର ପ୍ରାୟ ୧ ହଜାରରୁ ଊର୍ଦ୍ଧ୍ବ ଘରର ଏଜବେଷ୍ଟସ, ଟାଇଲ ଓ ଚାଳ ଭାଙ୍ଗି ଉଡ଼ିଯାଇଛି । ଶହ ଶହ ବାଇକର ମିରର, କାରର କାଚ ଭାଙ୍ଗି ଚୁରମାର ହୋଇଯାଇଛି।
ଘର ଭିତରେ ପାଣି ପଶି ରନ୍ଧା ଖାଦ୍ୟ ନଷ୍ଟ ହେବାଠାରୁ ଆରମ୍ଭ କରି ଘରେ ଥିବା ଆସବାବପତ୍ର, ଲୁଗାପଟା, ଧାନ ଚାଉଳ, ପିଲାଙ୍କ ବହି ଖାତା ସବୁ ଭିଜି ଓଦା ହେଇଯାଇଛି। ବାଙ୍ଗିରିପୋଷି ବଜାର ମଧ୍ୟରେ ଥିବା ବହୁ ଦୋକାନ ଘର ମଧ୍ୟ କୁଆ ପଥର ମାଡ଼ରେ କ୍ଷତିଗ୍ରସ୍ତ ହୋଇଛି । ଆଗକୁ ପୁଣି ବର୍ଷା ପାଇଁ ସତର୍କ ସୂଚନା ଥିବାରୁ ପୀଡ଼ିତ ପରିବାର ମଧ୍ୟରେ ପୁଣି ଭୟ ଜାତ ହେବାରେ ଲାଗିଛି। ଅନ୍ୟପକ୍ଷେ ଯୁଦ୍ଧ କାଳୀନ ଭିତ୍ତିରେ ସେବା ଯୋଗାଇ ଦେବାକୁ ସ୍ଥାନୀୟ ବିଡିଓ ଓ ତହସିଲଦାରଙ୍କୁ ବାଙ୍ଗିରିପୋଷି ବିଧାୟିକା ସଞ୍ଜଲୀ ମୁର୍ମୁ ନିର୍ଦ୍ଦେଶ ଦେଇଛନ୍ତି। ଏପରିକି ଦରକାର ପଡିଲେ ଆଶ୍ରୟସ୍ଥଳୀକୁ ସ୍ଥାନାନ୍ତର ସହ ଖାଦ୍ୟ ଦେବାକୁ ନିର୍ଦେଶ ଦେଇଛନ୍ତି।
ବାଙ୍ଗିରିପୋଷି ନିର୍ବାଚନ ମଣ୍ଡଳୀରେ ଯେପରି ଗୋଟିଏ ବି ପୀଡ଼ିତ ପରିବାର ଯେପରି ସରକାରୀ ସୁବିଧାରୁ ବଞ୍ଚିତ ନହୁଅନ୍ତି ଏହାକୁ ସୁନିଶ୍ଚିତ କରିବାକୁ ବିଭାଗୀୟ ମନ୍ତ୍ରୀ ସୁରେଶ ପୂଜାରୀଙ୍କ ସହ ବିଧାୟିକା ସଞ୍ଜଲୀ ମୁର୍ମୁ ଏ ନେଇ ଆଲୋଚନା କରିଛନ୍ତି। ମନ୍ତ୍ରୀ ମଧ୍ୟ ତୁରନ୍ତ କ୍ଷୟକ୍ଷତି ଆକଳନ ପାଇଁ ମୟୂରଭଞ୍ଜ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ତେବେ ମୁଣ୍ଡ ଗୁଞ୍ଜିବାକୁ ଘର ଛାତ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବାରୁ ଅନ୍ତତଃ ପ୍ରାଥମିକ ଭାବେ ଖଣ୍ଡେ ଖଣ୍ଡେ ପଲିଥିନ ବ୍ୟବସ୍ଥା କରିବାକୁ ଗ୍ରାମବାସୀ ଦାବି କରିଛନ୍ତି।
