ଇମ୍ଫାଲ,୨୧/୦୯: ମଣିପୁର ସରକାରଙ୍କ ସୁରକ୍ଷା ପରାମର୍ଶଦାତା ଏକ ବଡ଼ ଖୁଲାସା କରିଛନ୍ତି। ସେ ପ୍ରଥମ ଥର ପାଇଁ ଶନିବାର ଦିନ ସର୍ବସାଧାରଣରେ କହିଛନ୍ତି ଯେ, ତାଙ୍କୁ ଏକ ଗୁଇନ୍ଦା ରିପୋର୍ଟ ମିଳିଛି, ଯେଉଁଥିରେ ପଡ଼ୋଶୀ ମିଆଁମାରରୁ ମଣିପୁରରେ ଜଙ୍ଗଲ ଯୁଦ୍ଧ ଏବଂ ସଶସ୍ତ୍ର ଡ୍ରୋନ୍ ବ୍ୟବହାର ପାଇଁ ପ୍ରଶିକ୍ଷିତ ୯୦୦ କୁକି ଉଗ୍ରବାଦୀଙ୍କ ପ୍ରବେଶ ବିଷୟରେ ଉଲ୍ଲେଖ କରାଯାଇଛି। ମଣିପୁରର ସୁରକ୍ଷା ପରାମର୍ଶଦାତା କୁଲଦୀପ ସିଂ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଏହି ଗୁଇନ୍ଦା ରିପୋର୍ଟକୁ ହାଲୁକା ଭାବେ ଗ୍ରହଣ କରାଯାଇପାରିବ ନାହିଁ।
ସେପଟେ ଜାତୀୟ ଗଣମାଧ୍ୟମ କିଛି ଶୀର୍ଷ ଗୁଇନ୍ଦା ସୂତ୍ରରୁ କହିଛି ଯେ,' ଏହି ଗୁଇନ୍ଦା ରିପୋର୍ଟ ଦକ୍ଷିଣ ମଣିପୁରରେ ଭାରତ-ମିଆଁମାର ସୀମାକୁ ଲାଗି ରହିଥିବା ଜିଲ୍ଲା ଗୁଡ଼ିକରୁ ସବୁ ବରିଷ୍ଠ ପୁଲିସ ଅଧିକ୍ଷକଙ୍କ ପାଖକୁ ପଠାଯାଇଛି। ଗୁରୁବାର ପଠାଯାଇଥିବା ରିପୋର୍ଟରେ ଉଲ୍ଲେଖ କରାଯାଇଛି ଯେ, ୯୦୦ କୁକି ଉଗ୍ରବାଦୀ ନିକଟରେ ଡ୍ରୋନ୍ ବମ୍, ପ୍ରୋଜେକ୍ଟଲ, ମିସାଇଲ ଏବଂ ଜଙ୍ଗଲ ଯୁଦ୍ଧର ପ୍ରଶିକ୍ଷଣ ନେଇଥିଲେ ଏବଂ ମିଆଁମାରରୁ ମଣିପୁରକୁ ପ୍ରବେଶ କରିଥିଲେ।
ଜାତୀୟ ଗଣମାଧ୍ୟମ ଗୁଇନ୍ଦା ସୂତ୍ରରୁ କହିଛି ଯେ, କୁକି ଆତଙ୍କବାଦୀଙ୍କୁ ପ୍ରତ୍ୟେକ ୩୦ ଜଣିଆ ସଦସ୍ୟ ୟୁନିଟରେ ବିଭକ୍ତ କରାଯାଇଛି ଏବଂ ବର୍ତ୍ତମାନ ବିଭିନ୍ନ ଭାଗକୁ ପଠାଇଦିଆଯାଇଛି।ସେ କହିଛନ୍ତି ଯେ ସେପ୍ଟେମ୍ବରର ଶେଷ ସପ୍ତାହରେ ସେମାନେ ମୈତେଇ ଗାଁ ଗୁଡ଼ିକ ଉପରେ ସମନ୍ୱିତ ଆକ୍ରମଣ କରିପାରନ୍ତି। ସାମ୍ବାଦିକ ସମ୍ମିଳନୀରେ କୁଲଦୀପ ସିଂ କହିଛନ୍ତି ଯେ ସେ ଅନୁଭବ କରୁଛନ୍ତି ଯେ ରିପୋର୍ଟ ଶତପ୍ରତିଶତ ଠିକ ଅଛି। ଏହା ଭୁଲ ପ୍ରମାଣିତ ନହେବା ପର୍ଯ୍ୟନ୍ତ, ଆମେ ଏହାକୁ ଶତପ୍ରତିଶତ ସଠିକ୍ ବୋଲି ଗ୍ରହଣ କରିବା ଆବଶ୍ୟକ, କାରଣ ଯେକୌଣସି ଗୁଇନ୍ଦା ଇନପୁଟ୍ ଆପଣଙ୍କୁ ୧୦୦ ପ୍ରତିଶତ ସଠିକ୍ ବୋଲି ଅନୁମାନ କରିବାକୁ ପଡ଼ିବ ଏବଂ ଏହାର ମୁକାବିଲା ପାଇଁ ପ୍ରସ୍ତୁତ ରୁହିବାକୁ ହେବ।
କୁଲଦୀପ ସିଂ ଆହୁରି ମଧ୍ୟ କହିଛନ୍ତି ଯେ ମିଆଁମାରର ଚିନ ରାଜ୍ୟ ତଥା ଅନ୍ୟାନ୍ୟ ରାଜ୍ୟରେ ଜାତିଗତ ସଶସ୍ତ୍ର ଗୋଷ୍ଠୀ ଜୁଣ୍ଟାରୁ ଲଢ଼ୁଛନ୍ତି ଏବଂ ଦେଶର ଏକ ବଡ଼ ଅଞ୍ଚଳକୁ କବ୍ଜା କରିନେଇଛନ୍ତି, ଯେଉଁଠାରେ ପୂର୍ବରୁ ଜୁଣ୍ଟାଙ୍କ ନିୟନ୍ତ୍ରଣ ରହିଥିଲା। କିଛି ସଂଘର୍ଷପୂର୍ଣ୍ଣ ଘଟଣା ସୀମା ନିକଟରେ ମଧ୍ୟ ଘଟିଛି, ଯେଉଁଥିରେ ସେନା କିଛି ଚିନ୍ ବିଦ୍ରୋହୀମାନଙ୍କୁ ଧରିଥିଲେ।
