ନୂଆଦିଲ୍ଲୀ: ତିରୁପତି ବାଲାଜୀଙ୍କ ପ୍ରସାଦ ‘ଲଡୁ’କୁ ନେଇ ବିବାଦ ଥମିବାର ନାଁ ଧରୁନାହିଁ । ଲଡୁରେ ପଶୁ ଚର୍ବି ଏବଂ ମାଛ ତେଲ ମିଶୁଥିବା ନେଇ ଜଣାପଡ଼ିବା ପରେ ହଇଚଇ ସୃଷ୍ଟି ହୋଇଛି । ଏହାରି ମଧ୍ୟରେ ଆଉ ଏକ ବିଚଳିତ କଲା ଭଳି ତଥ୍ୟ ସାମ୍ନାକୁ ଆସିଛି । ଅଯୋଧ୍ୟା ରାମ ମନ୍ଦିରରେ ପ୍ରାଣ ପ୍ରତିଷ୍ଠା ଉତ୍ସବରେ ତିରୁପତି ଲଡୁ ବଣ୍ଟନ ହୋଇଥିଲା । ସେହି ଦିନ ୩୦୦ କେଜି ତିରୁପତି ଲଡୁ ବଣ୍ଟାଯାଇଥିଲା ବୋଲି ରାମ ମନ୍ଦିରର ମୁଖ୍ୟ ପୂଜକ ଆଚାର୍ଯ୍ୟ ସତ୍ୟେନ୍ଦ୍ର ଦାସ ଦାବି କରିଛନ୍ତି ।  ଚଳିତ ବର୍ଷ ଜାନୁଆରୀ ୨୨ରେ ଉତ୍ତର ପ୍ରଦେଶର ଅଯୋଧ୍ୟା ରାମ ମନ୍ଦିରରେ ପ୍ରଭୁ ରାମଲାଲାଙ୍କ ପ୍ରାଣ ପ୍ରତିଷ୍ଠା ଅବସରରେ ଆନ୍ଧ୍ରପ୍ରଦେଶ ତିରୁପତି ମନ୍ଦିରର ଲଡ଼ୁ ବଣ୍ଟନ ହୋଇଥିବା ସେ କହିଛନ୍ତି ।

ତିରୁପତି ମନ୍ଦିର ଲଡ଼ୁରେ ମାଛ ତେଲ ଓ ପଶୁ ଚର୍ବି ମିଶୁଥିବା ଉପରେ ପ୍ରତିକ୍ରିୟା ରଖି ଆଚାର୍ଯ୍ୟ ଦାସ କହିଛନ୍ତି, ‘ଏହା ଏକ ସାଂଘାତିକ ଷଡ଼ଯନ୍ତ୍ର। ଯଦି ଲଡୁରେ ପଶୁ ଚର୍ବି ମିଶୁଥିବ ତେବେ ତାହା ଅକ୍ଷମଣୀୟ କାର୍ଯ୍ୟ । ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବା ଜରୁରି । ଏହା ସହ ଜାତୀୟ ତଦନ୍ତ ଏଜେନ୍ସି ଦ୍ବାରା ଏହି ମାମଲାର ତଦନ୍ତ ହେଉ ବୋଲି ସେ ଦାବି ମଧ୍ୟ କରିଛନ୍ତି ।’

ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ତିରୁପତି ମନ୍ଦିର ଲଡ଼ୁ ମାଛ ତେଲ ଏବଂ ପଶୁ ଚର୍ବିରେ ପ୍ରସ୍ତୁତ ହେଉଥିବା ଅଭିଯୋଗ ଆଣିବା ପରେ ବିବାଦ ଉଗ୍ର ରୂପ ଧାରଣ କରିଛି । ପୂର୍ବରୁ ୱାଇଏସଆର କଂଗ୍ରେସ ସରକାର ସମୟରୁ ଏପରି କରାଯାଉଥିବା ସେ କହିଥିଲେ । ଏହାପରେ ଗୁଜରାଟରେ ଥିବା ଏକ ଘରୋଇ ଲ୍ୟାବରେ ଲଡ଼ୁର ମାନ ପରୀକ୍ଷଣ କରାଯାଇଥିଲା । ପରୀକ୍ଷଣରୁ ଜଣାପଡ଼ିଛି ଯେ, ମାଛ ତେଲ, ଗୋରୁ ଚର୍ବି ଏବଂ ଘୁଷୁରି ଚର୍ବିରେ ଲଡ଼ୁ ପ୍ରସ୍ତୁତ ହେଉଛି । ଏହାପରେ କେନ୍ଦ୍ର ସରକାରଙ୍କ ପକ୍ଷରୁ ରାଜ୍ୟ ସରକାରଙ୍କୁ ରିପୋର୍ଟ ମଗାଯାଇଛି । ଏସବୁ ଭିତରେ ଅଯୋଧ୍ୟା ରାମ ମନ୍ଦିରର ମୁଖ୍ୟ ପୂଜକଙ୍କ ଦାବି ଲକ୍ଷ ଲକ୍ଷ ଶ୍ରଦ୍ଧାଳୁଙ୍କୁ ଚକିତ କରିଛି ।