ଚୌଦ୍ବାର, ଗୁରୁଡିଝାଟିଆ ୨୦/୦୫: ମହାନଦୀର ଧବଳେଶ୍ୱର ଓ କଖଡ଼ି ପଠାରେ ଇଣ୍ଡିଆନ୍ ସ୍କିମରଙ୍କ ସଂଖ୍ୟା ବୃଦ୍ଧି ପାଇଛି । ଏହାକୁ ନେଇ ପରିବେଶବିତ୍ ଖୁସି ପ୍ରକଟ କରିଛନ୍ତି । 

ସୂଚନା ଅନୁଯାୟୀ, କଟକ ଜିଲ୍ଲା ମହାନଦୀର ଧବଳେଶ୍ବର ଓ କଖଡ଼ି ପଠାରେ ଇଣ୍ଡିଆନ୍ ସ୍କିମରଙ୍କ ଅଣ୍ଡାରୁ ଛୁଆ ଫୁଟିବା ପ୍ରକ୍ରିୟା ଆରମ୍ଭ ହୋଇଛି । ଚଳିତ ବର୍ଷ ଏମାନଙ୍କ ସଂଖ୍ୟା ବୃଦ୍ଧି ପାଇଛି ବୋଲି ଖୁଣ୍ଟୁଣୀ ରେଞ୍ଜ ପକ୍ଷରୁ କୁହାଯାଇଛି । ଏନେଇ ବନ ବିଭାଗ ପାଟ୍ରୋଲିଂକୁ ବଢ଼ାଇବା ସହ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛି ।

ଆଠଗଡ଼ ବନଖଣ୍ଡ ଖୁଣ୍ଟୁଣୀ ରେଞ୍ଜର ମହାନଦୀ ପଠାକୁ ଚଳିତ ବର୍ଷ ୨୪୫ ଇଣ୍ଡିଆନ ସ୍କିମର ଆସି ୧୪୨ଟି ଅଣ୍ଡା ଦେଇଥିଲେ । ଏହି ଅଣ୍ଡାରୁ ୧୧୦ଟି ଛୁଆ ଫୁଟିଛନ୍ତି l ବାକି ଅଣ୍ଡା ଧୀରେ ଧୀରେ ଫୁଟିବେ । ଏନେଇ ଖୁଣ୍ଟୁଣୀ ରେଞ୍ଜର ନୀଳମାଧଵ ସାହୁ ସୂଚନା ଦେଇଥିବା ବେଳେ ଦୁଇଟି ପଠାରେ ସୁରକ୍ଷାକୁ ବ୍ୟବସ୍ଥା କଡାକଡ଼ି କରାଯାଇଛି ବୋଲି କହିଛନ୍ତି ।