କଟକ,୧୧/୦୪: ପ୍ରତିକ୍ଷାର ଅନ୍ତ। ଆଜି ଉଦ୍ଘାଟନ ହେବ ଶିଶୁ ଭବନର ନୂଆ କୋଠା। ୧୬୨ କୋଟି ଟଙ୍କାରୁ ଅଧିକ ବ୍ୟୟରେ ନିର୍ମିତ ସର୍ଦ୍ଦାର ବଲ୍ଲଭ ଭାଇ ପଟେଲ ସ୍ନାତକୋତ୍ତର ଶିଶୁ ଚିକିତ୍ସା ପ୍ରତିଷ୍ଠାନର ଉଦ୍ଘାଟନ ହେବ । ୭ ମହଲା ବିଶିଷ୍ଟ ଏହି କୋଠାର କିଛି ଅଂଶରେ ଚିକିତ୍ସା ଆରମ୍ଭ ହୋଇଥିଲେ ହେଁ ଆଜିଠୁ ଏ ସୌଧ ଆନୁଷ୍ଠାନିକ ଭାବେ ଉଦ୍ଘାଟନ ହେବ । ଏଥିଲାଗି ମେଡିକାଲ୍ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । କାଠଯୋଡ଼ି ରିଂ ବନ୍ଧରୁ ମେଡିକାଲ୍କୁ ଲମ୍ବିଥିବା ମୁଖ୍ୟ ପ୍ରବେଶ ପଥ କାର୍ଯ୍ୟ ଯୁଦ୍ଧକାଳୀନ ଭିତିରେ ଶେଷ କରାଯାଇଛି ।
ସେହିପରି ନୂଆ କୋଠାରେ ଅସମ୍ପୂର୍ଣ୍ଣ ରହିଥିବା ସବୁ କାମ ତୁରନ୍ତ ଶେଷ କରିବା ପାଇଁ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ସମୀକ୍ଷା କରିଛନ୍ତି । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେପି ନଡ୍ଡା, ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ଡ. ମୁକେଶ ମହାଲିଙ୍ଗ ଓ ଅନ୍ୟ ମନ୍ତ୍ରୀ, ଅତିଥିମାନେ ପ୍ରକଳ୍ପ ଉଦ୍ଘାଟନ କରି ୱାର୍ଡ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି । ତେବେ ଏହି ବୃହତ ପ୍ରକଳ୍ପ ଓ ବିରାଟ ଭିତ୍ତିଭୂମି ମଧ୍ୟରେ ଶିଶୁ ଭବନରେ ମାନବ ସମ୍ବଳ ଏବଂ ଅନେକ ଚିକିତ୍ସା ଉପକରଣ ଅଭାବ ରହିଛି । ହସ୍ପିଟାଲ୍ କର୍ତ୍ତୃପକ୍ଷ ମାନବ ସମ୍ବଳ ଅଭାବ ଓ ଅନ୍ୟାନ୍ୟ ସମସ୍ୟା ସମ୍ପର୍କରେ ସରକାରଙ୍କ ଦୃଷ୍ଟି ଆକର୍ଷଣ କରି ଏହାର ସମାଧାନ ଲାଗି ପ୍ରସ୍ତାବ ରଖିବେ ବୋଲି ପ୍ରସ୍ତୁତ ହେଉଛନ୍ତି ।
୭ ମହଲା ବିଶିଷ୍ଟ ଏହି କୋଠା ନିର୍ମାଣ କାର୍ଯ୍ୟ ଅଢ଼େଇ ବର୍ଷରୁ ଅଧିକ ହେବ ସରିଥିଲେ ହେଁ ଏବେ ବି ଅନେକ କାର୍ଯ୍ୟ ବାକି ରହିଛି । ନୂଆ କୋଠାର ପ୍ରଥମ ମହଲାରେ ଆଉଟ୍ଡୋର, ଟିକେଟ୍ କାଉଣ୍ଟର, ନିରାମୟ କେନ୍ଦ୍ର ଚାଲିଛି । ଦ୍ୱିତୀୟ ମହଲାରେ ୱାର୍ଡ (ଇନ୍ଡୋର)ରେ ରୋଗୀ ସେବା ଚାଲିଛି । ଗୁରୁତର ଶିଶୁ ଓ ନବଜାତକଙ୍କ ଚିକିତ୍ସା ପାଇଁ ଏହି ନୂତନ କୋଠାରେ ଆଇସିୟୁ ଥାଇ ମଧ୍ୟ ସେବା ଆରମ୍ଭ ହୋଇପାରିନାହିଁ । ଆଇସିୟୁ ପାଇଁ ଶଯ୍ୟା, ମନିଟର, ଅକ୍ସିଜେନ୍ ପାଇପ୍ ଲାଇନ୍, ୱାର୍ମର ବେଡ୍ ଆଦି ସୁବିଧା ରହିଛି । ଏହି ନବ ନିର୍ମିତ କୋଠାରେ ଗୋଟିଏ ଛାତ ତଳେ ଶିଶୁ ରୋଗୀମାନଙ୍କୁ ସମସ୍ତ ଚିକିତ୍ସା ସୁବିଧା ଯୋଗାଇ ଦିଆଯାଇପାରିବ । ମାତ୍ର କିଛି ସରଞ୍ଜାମ ଓ ମାନବ ସମ୍ବଳର ଅଭାବ ଯୋଗୁଁ ନବଜାତକଙ୍କ ଚିକିତ୍ସା ଲାଗି ନିଓନାଟାଲ୍ ଇଣ୍ଟେନସିଭ୍ କେୟାର ୟୁନିଟ୍ (ନିକୁ), ସ୍ପେସାଲ୍ ନ୍ୟୁବର୍ଣ୍ଣ କେୟାର ୟୁନିଟ୍ (ଏସ୍ଏନସିୟୁ), ପେଡିଆଟ୍ରିକ୍ କେୟାର ୟୁନିଟ୍ (ପିକୁ), ହାଇ ଡିପେଣ୍ଡେନସି ୟୁନିଟ୍ (ଏଚ୍ଡିୟୁ)ଆଦି ଖୋଲିପାରୁନାହିଁ । ଫଳରେ ଗୁରୁତର ଶିଶୁ ରୋଗୀ ଓ ନବଜାତକମାନେ ପୂର୍ବପରି ଏବେ ବି ଫେରୁଛନ୍ତି । ସେହିପରି ମର୍ଡୁଲାର ଓଟି ନିର୍ମାଣ କରାଯାଇଥିଲେ ହେଁ ଏଠାରେ ଶିଶୁ ରୋଗୀଙ୍କ ଅପରେସନ୍ ଆରମ୍ଭ ହୋଇପାରୁ ନାହିଁ । ନିଦାନ ସୁବିଧା ପାଇଁ ଏକାଧିକ ପ୍ରକୋଷ୍ଠ ନିର୍ମାଣ କରାଯାଇଥିଲେ ହେଁ ସିଟି ସ୍କାନ୍, ଏମ୍ଆର୍ଆଇ, ଡିଜିଟାଲ୍ ଏକ୍ସରେ ମେସିନ୍ ନାହିଁ । ସେହିପରି ତଳ ମହଲାରେ ଆଉଟ୍ଡୋର୍ ପରିସରରେ ଶିଶୁ ଓ ସେମାନଙ୍କ ଅଭିଭାବକମାନଙ୍କ ସୁବିଧା ପାଇଁ କାଫେଟରିଆ ପାଇଁ ବନ୍ଦୋବସ୍ତ କରାଯାଇଥିଲେ ତାହା ଅଦ୍ୟାବଧି କାର୍ଯ୍ୟକ୍ଷମ ହୋଇପାରିନାହିଁ ।
ସୂଚନାଯୋଗ୍ୟ, ଶିଶୁ ଭବନ ଆଉଟ୍ଡୋରକୁ ଦିନକୁ ପାଖପାଖି ୫୦୦ ରୋଗୀ ଆସୁଛନ୍ତି । ସେହିପରି ଏଠାରେ ୱାର୍ଡରେ ଚିକିତ୍ସା ପାଇଁ ୨୦୦ ମଞ୍ଜୁରିପ୍ରାପ୍ତ ବେଡ୍ ରହିଥିଲେ ହେଁ କାଜୁଆଲଟି ଓ ୱାର୍ଡ, ଆଇସିୟୁ ଆଦି ମିଶି ପ୍ରାୟ ୪୨୨ ଶହ ବେଡ୍ରେ ରୋଗୀ ଚିକିତ୍ସିତ ହେଉଛନ୍ତି । ନୂଆ କୋଠା ହେବା ପରେ ମଞ୍ଜୁରିପ୍ରାପ୍ତ ବେଡ୍ ସଂଖ୍ୟା ୫୩୯କୁ ବୃଦ୍ଧି ପାଇଛି । ଆଇସିୟୁ ବେଡ୍ ସଂଖ୍ୟା ଶହେକୁ ବୃଦ୍ଧି ପାଇଛି। ଦ୍ୱିତୀୟ ମହଲା ଓ ତୃତୀୟ ମହଲାରେ ୱାର୍ଡ ସହ ଆଇସିୟୁ ରହିଛି । ନୂଆ ୱାର୍ଡ ଖୋଲିବା ପରେ ଏଠାରେ ରୋଗୀମାନେ ଭର୍ତ୍ତି ହୋଇ ଚିକିତ୍ସିତ ହେଉଥିବା ବେଳେ ଆଇସିୟୁରେ କିନ୍ତୁ ତାଲା ପଡ଼ିଛି । ସେହିପରି ୪ର୍ଥ, ୫ମ ଓ ଷଷ୍ଠ ମହଲାରେ ରୋଗୀଙ୍କ ଚିକିତ୍ସାଠାରୁ ଆରମ୍ଭ କରି ମେଡିକାଲ୍ ପିଜି ଡାକ୍ତରୀ ଛାତ୍ରଛାତ୍ରୀଙ୍କୁ ଶିକ୍ଷାଦାନ ଲାଗି ସେମିନାର ହଲ୍, ପ୍ରଶାସନିକ ଅଫିସ୍ ପାଇଁ ବ୍ୟବସ୍ଥା ରହିଥିଲେ ହେଁ ତାହା ଆରମ୍ଭ ହୋଇପାରିନାହିଁ । ନବନିର୍ମିତ କୋଠା ସମ୍ପୂର୍ଣ୍ଣ କାର୍ଯ୍ୟକ୍ଷମ ହୋଇଗଲେ ରୋଗୀଙ୍କୁ ନେଇ ଅଭିଭାବକମାନେ ଆଉ ଏଠିସେଠି ହେବେ ନାହିଁ ବୋଲି ହସ୍ପିଟାଲ କର୍ତ୍ତୃପକ୍ଷ କହିଛନ୍ତି ।
