ସମ୍ବଲପୁର,୧୩/୦୪: ରାତି ପାହିଲେ ସମ୍ବଲପୁରରେ ହନୁମାନ ଜୟନ୍ତୀ । ଶ୍ରୀରାମ ଭକ୍ତଙ୍କ ବିଶାଳ ଶୋଭାଯାତ୍ରା ସହର ପରିକ୍ରମା କରିବ । ହେଲେ ସୁରକ୍ଷାକୁ ଦୃଷ୍ଟିରେ ରଖି ବ୍ୟାପକ ବ୍ୟବସ୍ଥା ଗ୍ରହଣ କରିଛି ପୁଲିସ୍ । ଶୋଭାଯାତ୍ରାର ଦିନକ ପୂର୍ବରୁ ସମ୍ବଲପୁର ପୁଲିସ ପକ୍ଷରୁ ଶକ୍ତି ପ୍ରଦର୍ଶନ କରାଯାଇଛି । ଉତ୍ତରାଞ୍ଚଳ ଆଇଜି ଓ ସମ୍ବଲପୁର ଏସ୍ପିଙ୍କ ନେତୃତ୍ୱରେ କେନ୍ଦ୍ରୀୟ ଅର୍ଦ୍ଧସାମରିକ ବଳ ଓ ରାଜ୍ୟ ସଶସ୍ତ୍ର ପୁଲିସ୍ ବଳ ସହ ରାପିଡ୍ ଆକ୍ସନ ଫୋର୍ସ ସହର ପରିକ୍ରମା କରିଛନ୍ତି । ଶତାଧିକ ପୁଲିସ୍ ଗାଡ଼ି ବି ଫ୍ଲାଗମାର୍ଚ୍ଚରେ ସାମିଲ ହୋଇଥିଲେ ।
ଶନିବାର ସନ୍ଧ୍ୟାରେ ପୁଲିସ ରିଜର୍ଭ ଗ୍ରାଉଣ୍ଡରୁ ଏହି ଫ୍ଲାଗମାର୍ଚ୍ଚ ବାହାରି ଜିଲ୍ଲା ସ୍କୁଲ, ପେନସନ ପଡ଼ା, ନେଲସନ୍ ମାଣ୍ଡେଲା, ଜେଲଛକ, ଭୁତାପଡ଼ା ଦେଇ ଧନକଉଡ଼ାରେ ଶେଷ ହୋଇଥିଲା । ଏଥିରେ କେନ୍ଦ୍ରୀୟ ଓ ରାଜ୍ୟ ସଶସ୍ତ୍ର ପୁଲିସ ବଳର ମୋଟ୍ ୩୦ ପ୍ଲାଟୁନ୍ ଫୋର୍ସ ସାମିଲ ହୋଇଥିଲେ । ସମ୍ବଲପୁର ସହରର ସମସ୍ତ ଥାନାର ଥାନାଧିକାରୀ ଓ ଅନ୍ୟ ପୁଲିସ ଅଧିକାରୀମାନେ ଫ୍ଲାଗମାର୍ଚ୍ଚରେ ସାମିଲ ଥିଲେ । କେନ୍ଦ୍ରୀୟ ଫୋର୍ସ ସୀମା ସୁରକ୍ଷା ବଳ (ବିଏସଏଫ)୪ କମ୍ପାନୀ, କେନ୍ଦ୍ରୀୟ ରିଜର୍ଭ ପୁଲିସ ବଳ (ସିଆରପିଏଫ)ର ୨ କମ୍ପାନୀ ବିଶେଷ ଭାବେ ଦଙ୍ଗା ଓ ହିଂସା ପ୍ରଶମିତ ପାଇଁ ସ୍ୱତନ୍ତ୍ର ପ୍ରଶିକ୍ଷିତ ‘ରାପିଡ୍ ଆକ୍ସନ ଫୋର୍ସ’ର ୩ କମ୍ପାନୀ ଫ୍ଲାଗମାର୍ଚ୍ଚକୁ ଲିଡ୍ କରିଥିଲେ । ସେହିଭଳି ରାଜ୍ୟ ସଶସ୍ତ୍ର ପୁଲିସ ବଳ ଯବାନମାନେ ମଧ୍ୟ ଫ୍ଲାଗମାର୍ଚ୍ଚ କରିଥିଲେ । ଦଙ୍ଗା ନିରୋଧୀ ବାହନ ‘ବଜ୍ର’ ମଧ୍ୟ ସମ୍ବଲପୁର ରାସ୍ତାରେ ନଜର ଆସିଥିଲା ।
ଉତ୍ତରାଞ୍ଚଳ ଆଇଜି ହିମାଂଶୁ ଲାଲ କହିଛନ୍ତି ସମଗ୍ର ସହର କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ରହିଛି । ସମ୍ବେଦନଶୀଳ ସ୍ଥାନଗୁଡିକରେ ତ୍ରୁଟିଶୂନ୍ୟ ସୁରକ୍ଷା ବ୍ୟବସ୍ଥା ପାଇଁ ସମସ୍ତ ପଦକ୍ଷେପ ଗ୍ରହଣ କରାଯାଇଛି । ଶାନ୍ତି ଶୃଙ୍ଖଳାର ସହ ହନୁମାନ ଜୟନ୍ତୀ ପାଳନ କରାଯିବ । ଏହି ଉପଲକ୍ଷେ ପ୍ରତିଦିନ ପୁଲିସ ପକ୍ଷରୁ ଫ୍ଲାଗ ମାର୍ଚ୍ଚ କରାଯାଉଛି । ପ୍ରଶାସନକୁ ଆଇନଶୃଙ୍ଖଳା ବଜାୟ ରଖିବାରେ ସହଯୋଗ କରିବାକୁ ସହରବାସୀଙ୍କୁ ନିବେଦନ କରାଯାଇଛି । ହନୁମାନ ଜୟନ୍ତୀ ଶେଷ ହେବା ପର୍ଯ୍ୟନ୍ତ ସହରରେ ନିୟମିତ ବ୍ୟବଧାନରେ ଫ୍ଲାଗମାର୍ଚ୍ଚ ଓ ପାଟ୍ରୋଲିଂ ଜାରି ରହିବ ବୋଲି ଶ୍ରୀ ଲାଲ କହିଛନ୍ତି ।
