ଗ୍ରସ୍ ଆଇଲେଟ୍, ୨୪/୦୬: ରବିବାର ସକାଳେ ଆଫଗାନିସ୍ତାନ ଯେଉଁ ମହାବିପର୍ଯ୍ୟୟ ରଚିଲା, ତାହା ଅତି ଅଦ୍ଭୁତ ଓ ଅବିଶ୍ୱସନୀୟ ଥିଲା । ଏହି ବିପର୍ଯ୍ୟୟ ସୁପର-୮ ଗ୍ରୁପ୍-ଏ’ରେ ଅଙ୍କ ଗଡ଼ ବଡ଼ କରି ଦେଇଛି । ଶକ୍ତିଶାଳୀ ଭାରତ ଓ ଅଷ୍ଟ୍ରେଲିଆ ନିଦ୍ୱର୍ନ୍ଦ୍ୱରେ ସେମି ଫାଇନାଲରେ ପ୍ରବେଶ କରିବେ ବୋଲି ପୂର୍ବରୁ ଯେଉଁ ଆଶା ରହିଥିଲା, ଆଫଗାନିସ୍ତାନର ବିଜୟ ପରେ ସବୁ କିଛି ଏପଟ ସେପଟ ହୋଇ ଯାଇଛି ।
ସୋମବାର ଭାରତ ଓ ଅଷ୍ଟ୍ରେଲିଆ (ଗ୍ରୁପ୍-୧) ସାମ୍ନାସାମ୍ନି ହେବେ । ମ୍ୟାଚ୍ଟି ଦୁଇ ଦଳ ପାଇଁ ଗୁରୁତ୍ୱପୂର୍ଣ୍ଣ ରହିଛି । ବିଶେଷ କରି ବର୍ଷା ମ୍ୟାଚ୍ରେ ବାଧକ ସାଜିପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଯଦି ବର୍ଷା ହୋଇ ମ୍ୟାଚ୍ ଧୋଇ ଯାଏ ତେବେ ଭାରତର କୌଣସି ଅସୁବିଧା ନାହିଁ । ଅଷ୍ଟ୍ରେଲିଆ ମହାଦ୍ୱନ୍ଦ୍ୱରେ ରହିବ । ଏମିତିବି ଆଫଗାନିସ୍ତାନ ଠାରୁ ପରାଜିତ ହେବା ପରେ ଦଳର ସେମି ଫାଇନାଲ ଭାଗ୍ୟ ସୂତା ଖିଅରେ ଲଟକିଛି ।
ଭାରତର ଉନ୍ନତ ନେଟ୍ ରନରେଟ୍
କ୍ରମାନ୍ୱୟରେ ୨ଟି ମ୍ୟାଚ୍ ଜିତି ସାରିଥିବା ଭାରତ ସୋମବାର ଅଷ୍ଟ୍ରେଲିଆକୁ ହରାଇଲେ ସୁପର-୮ରେ ବି ଅପରାଜେୟ ସହ ଗ୍ରୁପ୍ ଟପ୍ପର ହୋଇ ସେମିରେ ପ୍ରବେଶ କରିବ । ପରାଜିତ ହେଲେ ମଧ୍ୟ ଦଳ ନିକଟରେ ସୁଯୋଗ ରହିଛି । ଭାରତ ଗ୍ରୁପ୍-୧ରେ ୪ପଏଣ୍ଟ ସହ ଶୀର୍ଷରେ ରହିଛି । ଦଳର ନେଟ୍ ରନରେଟ୍ (+୨.୪୨୫) ଉନ୍ନତ ରହିଛି । ଅଷ୍ଟ୍ରେଲିଆ (+୦.୨୨୩) ଓ ଆଫଗାନିସ୍ତାନ (-୦.୬୫୦) ୨ପଏଣ୍ଟ ଲେଖାଏଁ ପାଇ ଯଥାକ୍ରମେ ଦ୍ୱିତୀୟ ଓ ତୃତୀୟରେ ରହିଛନ୍ତି । ଏହି ଗ୍ରୁପ୍ରେ ବାଂଲାଦେଶ ୨ଟି ମ୍ୟାଚ୍ ପରାଜିତ ହୋଇଛି । ଭାରତକୁ ୪୧ ରନ୍ରେ ହରାଇଲେ ଅଷ୍ଟ୍ରେଲିଆ ୪ ପଏଣ୍ଟ ସହ ନେଟ୍ ରନରେଟ୍ରେ ଶୀର୍ଷକୁ ଉଠିପାରିବ । ଏହାପରେ ବାଂଲାଦେଶ- ଆଫଗାନିସ୍ତାନ ମ୍ୟାଚ୍ ଫଳାଫଳ ଉପରେ ଭାରତର ଭାଗ୍ୟ ନିର୍ଭର କରିବ । ଆଫଗାନିସ୍ତାନ ୮୩ ରନ୍ରେ ବାଂଲାଦେଶକୁ ହରାଇଲେ ଭାରତର ନେଟ୍ ରନ୍ରେଟ୍କୁ ଟପି ପାରିବ ଏବଂ ସେମିରେ ପ୍ରବେଶ କରିବ । ତେବେ ଭାରତ ଓ ବାଂଲାଦେଶ ଜିତିଲେ ଆଫଗାନିସ୍ତାନ ବାଦ୍ ପଡ଼ିବ ଏବଂ ଅଷ୍ଟ୍ରେଲିଆ ସେମିକୁ ଉନ୍ନୀତ ହୋଇ ପାରିବ । ଅଷ୍ଟ୍ରେଲିଆ ଓ ବାଂଲାଦେଶ ଜିତିଲେ ଭାରତ ଓ ଅଷ୍ଟ୍ରେଲିଆ ସେମିରେ ପ୍ରବେଶ କରିବେ । ସେହିପରି ଭାରତ ଓ ଆଫଗାନିସ୍ତାନ ଜିତିଲେ ଅଷ୍ଟ୍ରେଲିଆର ଅଭିଯାନ ଶେଷ ହେବ ।
ପ୍ରତିଶୋଧ ଲକ୍ଷ୍ୟରେ ଭାରତ
ରେକର୍ଡ଼ ଏବଂ ବର୍ତ୍ତମାନର ପ୍ରଦର୍ଶନକୁ ଦେଖିଲେ ଭାରତର ପଲା ଭାରି ରହିବା ସ୍ୱାଭାବିକ । ଟି-ଟ୍ୱେଣ୍ଟି ବିଶ୍ୱକପ୍ରେ ଭାରତ ଓ ଅଷ୍ଟ୍ରେଲିଆ ୫ ଥର ପରସ୍ପରକୁ ଭେଟିଥିବାବେଳେ ଭାରତ ୩ଟିରେ ବିଜୟୀ ହୋଇଛି । ଟି-ଟ୍ୱେଣ୍ଟିରେ ଉଭୟ ଦଳ ମଧ୍ୟରେ ୩୧ଟି ମ୍ୟାଚ୍ ଖେଳାଯାଇଛି । ଏଥିରେ ଭାରତ ୧୯ଟି ଓ ଅଷ୍ଟ୍ରେଲିଆ ୧୧ଟି ଜିତିଥିବାବେଳେ ଗୋଟିଏ ମ୍ୟାଚ୍ ବାତିଲ ହୋଇଥିଲା । ଚଳିତ ବିଶ୍ୱକପ୍ରେ ଭାରତ ଏ ପର୍ଯ୍ୟନ୍ତ ଅପରାଜେୟ ରହିଛି । ଦଳର ପ୍ରତ୍ୟେକ ଖେଳାଳି ଫର୍ମରେ ଥିବାବେଳେ ବିଜୟରେ ଯୋଗଦାନ ଦେଉଛନ୍ତି । ସୋମବାର ରୋହିତ ବାହିନୀ ଅଷ୍ଟ୍ରେଲିଆ ନିକଟରୁ ଦିନିକିଆ ବିଶ୍ୱକପ୍ ଫାଇନାଲ୍ ପରାଜୟର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି । ଅଷ୍ଟ୍ରେଲିଆ ଏବେ ସଙ୍କଟରେ ରହିଛି । ତେଣୁ ସୋମବାର ଭାରତକୁ ହରାଇବା ପାଇଁ ଦଳ ସବୁ ଶକ୍ତି ଲଗାଇ ଦେବ । ଗ୍ଲେନ୍ ମ୍ୟାକ୍ସୱେଲ ଫର୍ମକୁ ଫେରିଥିବାବେଳେ ପ୍ୟାଟ୍ କମିନ୍ସ ଭଲ ଲୟରେ ରହିଛନ୍ତି । ଉଭୟ ଦଳର ବ୍ୟାଟିଂ ଓ ବୋଲିଂ ବିଭାଗ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିବ ।
ଗତ ୧୫ ତାରିଖ ଅଷ୍ଟ୍ରେଲିଆ ଗ୍ରସ୍ ଆଇଲେଟ୍ ପିଚ୍ରେ ସ୍କଟଲାଣ୍ଡ୍କୁ ଭେଟିଥିଲା । ଏହି ମ୍ୟାଚ୍ରେ ଦଳକୁ ବିଜୟ (୫ରନ୍ରେ) ପାଇଁ ନାକେଦମ ହେବାକୁ ପଡ଼ିଥିଲା । ଗ୍ରସ୍ ଆଇଲେଟ୍ ପିଚ୍ ବ୍ୟାଟିଂ ପାଇଁ ଅନୁକୂଳ । ଚଳିତ ସଂସ୍କରଣରେ ଏହି ପିଚ୍ରେ ମୋଟ ୫ଟି ମ୍ୟାଚ୍ ଖେଳାଯାଇଛି । ଦ୍ୱିତୀୟ ଭାଗରେ ବ୍ୟାଟିଂ କରିଥିବା ଦଳ ୨ଟି ଏବଂ ପ୍ରଥମେ ବ୍ୟାଟିଂ କରିଥିବା ଦଳ ୩ଟି ମ୍ୟାଚ୍ ଜିତିଛନ୍ତି । ତଥାପି ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଫଳପ୍ରଦ ହେବ।
ସମ୍ଭାବ୍ୟ ଏକାଦଶ
ଭାରତ: ରୋହିତ ଶର୍ମା (ଅଧିନାୟକ), ବିରାଟ କୋହଲି, ରିଷଭ ପନ୍ତ, ସୂର୍ଯ୍ୟକୁମାର ଯାଦବ, ଶିବମ ଦୁବେ, ହାର୍ଦ୍ଦିକ ପାଣ୍ଡ୍ୟା, ଅକ୍ଷର ପଟେଲ, ରବିନ୍ଦ୍ର ଜାଡେଜା, ଅର୍ଶଦୀପ ସିଂହ, କୁଲଦୀପ ଯାଦବ, ଯଶପ୍ରୀତ ବୁମରା ।
ଅଷ୍ଟ୍ରେଲିଆ: ଡେଭିଡ୍ ୱାର୍ଣ୍ଣର, ଟ୍ରେଭିସ୍ ହେଡ୍, ମିଚେଲ ମାର୍ଶ (ଅଧିନାୟକ), ଗ୍ଲେନ ମ୍ୟାକ୍ସୱେଲ, ମାର୍କସ ଷ୍ଟଇନିସ୍, ଟିମ୍ ଡେଭିଡ୍, ମାଥ୍ୟୁ ୱେଡ୍, ପ୍ୟାଟ୍ କମିନ୍ସ, ମିଚେଲ ଷ୍ଟାର୍କ/ଆଷ୍ଟନ ଆଗର, ଆଡାମ ଜାମ୍ପା, ଜୋଶ ହାଜେଲଉଡ୍ ।