ଗାଏନା,୨୮/୦୬: ୧୦ ବର୍ଷର ଅପେକ୍ଷାରେ ପୂର୍ଣ୍ଣଚ୍ଛେଦ ପଡ଼ିଛି । ୨୦୨୨ ଟି-ଟ୍ୱେଣ୍ଟି ବିଶ୍ୱକପ୍ ସେମି ଫାଇନାଲ୍ ପରାଜୟର ପ୍ରତିଶୋଧ ନେଇ ଭାରତ ଏଥର ଫାଇନାଲ୍ରେ ପ୍ରବେଶ କରିଛି । ବର୍ଷା ମଧ୍ୟ ଭାରତର ବିଜୟକୁ ଅଟକାଇ ପାରି ନଥିଲା । ଗୁରୁବାର ଦ୍ୱିତୀୟ ସେମି ଫାଇନାଲ୍ରେ ଭାରତ ୬୮ ରନ୍ରେ ଇଂଲଣ୍ଡକୁ ହରାଇଥିଲା । ପ୍ରେଭିଡେନ୍ସ ଷ୍ଟାଡ଼ିୟମ୍ରେ ଅନୁଷ୍ଠିତ ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଭାରତ ୭ୱିକେଟ୍ ବିନିମୟରେ ୧୭୧ ରନ୍ ସଂଗ୍ରହ କରିଥିଲା । ଏହାର ଜବାବରେ ଇଂଲଣ୍ଡ ୧୬.୪ ଓଭରରେ ୧୦୩ ରନ୍ କରି ଅଲ୍ ଆଉଟ୍ ହୋଇଯାଇଥିଲା ।
ଶେଷ ଥର ପାଇଁ ଭାରତ ୨୦୧୪ ଟି-ଟ୍ୱେଣ୍ଟି ବିଶ୍ୱକପ୍ ଫାଇନାଲ୍ ଖେଳିଥିଲା । ଟାଇଟଲ ଲଢ଼େଇଦେଳ ଶ୍ରୀଲଙ୍କା ଠାରୁ ପରାଜିତ ହୋଇଥିଲା । ଏହାପରେ ଭାରତ ୨୦୧୬ ଓ ୨୦୨୨ ବିଶ୍ୱକପ୍ ସେମି ଫାଇନାଲ୍ରେ ପ୍ରବେଶ କରିଥିଲେ ହେଁ ପରାଜିତ ହୋଇ ଫାଇନାଲରୁ ବଞ୍ଚିତ ହୋଇଥିଲା ।
India remain unbeaten 😤
— ICC (@ICC) June 27, 2024
They face South Africa in the #T20WorldCup 2024 Final in Barbados. pic.twitter.com/HB2ZIG8yT7
ଗୁରୁବାର ସକାଳୁ ବର୍ଷା ହେବାରୁ ଘଣ୍ଟାଏ ବିଳମ୍ବରେ ଖେଳ ଆରମ୍ଭ ହୋଇଥିଲା । ବ୍ୟାଟିଂ ଆମନ୍ତ୍ରଣ ପାଇଥିବା ଭାରତର ଦୁଇ ଓପନର ରୋହିତ ଶର୍ମା ଓ ବିରାଟ କୋହଲି ୧୯ ରନ୍ ସଂଗ୍ରହ କରିଥିଲେ । କୋହଲି ପୁଣି ଥରେ ବିଫଳ ହୋଇଥିଲେ ଏବଂ ୯ ରନ୍ କରି ପାଭିଲିୟନ ଫେରିଥିଲେ । ରିଷଭ ପନ୍ତ(୪) ମଧ୍ୟ ନିରାଶ କରିଥିଲେ । ମାତ୍ର ରୋହିତଙ୍କୁ ଅଟକାଇବା କଷ୍ଟକର ହୋଇଥିଲା । ଅନ୍ୟ ପଟରେ ସୂର୍ଯ୍ୟକୁମାର ଯୋଗ ଦେବା ପରେ ଦଳୀୟ ସ୍କୋର ଦ୍ରୁତ ବେଗରେ ଆଗେଇଥିଲା ।
୮ ଓଭର ସୁଦ୍ଧା ଦଳୀୟ ସ୍କୋର ୨/୬୫ରେ ପହଞ୍ଚିବା ପରେ ପୁନର୍ବାର ବର୍ଷା ହୋଇ ପାଖା ପାଖି ୧ଘଣ୍ଟା ପର୍ଯ୍ୟନ୍ତ ଖେଳ ସ୍ଥଗିତ ରହିଥିଲା । ଏଥର ପ୍ରବଳ ଖରା ହୋଇଥିଲା ଓ ଉଭୟ ଅପରାଜିତ ବ୍ୟାଟର ଦର୍ଶନୀୟ ସଟ୍ମାନ ଖେଳି ଦଳୀୟ ସ୍କୋରକୁ ଦ୍ରୁତ ବେଗରେ ଆଗେଇ ନେଇଥିଲେ । ରୋହିତ ଅର୍ଦ୍ଧଶତକ ପୂରଣ କରିଥିଲେ । ଦଳୀୟ ସ୍କୋର ୧୧୩ ବେଳେ ରୋହିତଙ୍କୁ ଆଉଟ୍ କରି ଆଦିଲ ରସିଦ ଇଂଲଣ୍ଡ ଶିବିରକୁ ଆଶ୍ୱସ୍ତ କରିଥିଲେ । ସେ ୩୮ଟି ବଲ୍ରୁ ୬ଚୌକା ଓ ୨ଛକା ବଳରେ ୫୭ ରନ୍ କରିଥିଲେ । ପରେ ସୂର୍ଯ୍ୟକୁମାର ୪୭(୪ଚୌକା, ୨ଛକରା) ରନ କରି ବିଦାୟ ନେଇଥିଲେ । ଅନ୍ତିମ ଭାଗରେ ହାର୍ଦ୍ଦିକ ପାଣ୍ଡ୍ୟା ୧୩ଟି ବଲ୍ରୁ ୨୩ ରନ୍ ଓ ରବିନ୍ଦ୍ର ଜାଡେଜା ଅପରାଜିତ ୧୭ ରନ୍ ସଂଗ୍ରହ କରିବା ଫଳରେ ଦଳୀୟ ସ୍କୋର ୧୭୧ରେ ପହଞ୍ଚିଥିଲା । ଇଂଲଣ୍ଡ ପକ୍ଷରୁ କ୍ରିସ ଜୋର୍ଡାନ ୩ଟି ୱିକେଟ୍ ଅକ୍ତିଆର କରିଥିଲେ ।
ଜବାବରେ ଇଂଲଣ୍ଡ ଓପନର ଜୋସ ବଟଲର ଆକ୍ରମଣାତ୍ମକ ବ୍ୟାଟିଂ କରିଥିଲେ । ୩ଓଭରରେ ଇଂଲଣ୍ଡ ୨୬ ରନ ସଂଗ୍ରହ କରିବା ପରେ ରୋହିତ ତୁରନ୍ତ ଅକ୍ଷରଙ୍କୁ ବୋଲିଂ କରାଇଥିଲେ । ସେ ପ୍ରଥମ ବଲ୍ରେ ବଟଲର(୨୩)ଙ୍କୁ ଆଉଟ୍ କରିଥିଲେ । ଏହାପରେ ଆରମ୍ଭ ହୋଇଥିଲା ବିପର୍ଯ୍ୟୟ । ପରବର୍ତ୍ତୀ ଓଭରରେ ବୁମରା ଅନ୍ୟ ଓପନର ଫିଲ ସଲ୍ଟ(୫)ଙ୍କୁ କ୍ଲିନ୍ ବୋଲ୍ଡ କରିଥିଲେ । ଷଷ୍ଠ ଓଭରର ପ୍ରଥମ ବଲ୍ରେ ଜନି ବେୟାରଷ୍ଟୋ(୦)ଙ୍କୁ ବୋଲ୍ଟ କରି ଅକ୍ଷର ଉନ୍ମାଦନା ଖେଳାଇ ଦେଇଥିଲେ । ମୋଇନ ଅଲି(୮) ମଧ୍ୟ ଅକ୍ଷରଙ୍କ ଶିକାର ସାଜିଥିଲେ । ସାମ କୁରାନ(୨)ଙ୍କୁ କୁଲଦୀପ ଆଉଟ୍ କରିବା ସହ ଇଂଲଣ୍ଡ ୪୯ରନ୍ରେ ୫ଟି ୱିକେଟ୍ ହରାଇଥିଲା । ହ୍ୟାରୀ ବ୍ରୁକ୍(୨୫) କିଛି ଦର୍ଶନୀୟ ସଟ୍ ଖେଳିଥିଲେ ହେଁ ଶେଷରେ କୁଲଦୀପଙ୍କ ବଲ୍ରେ ଆଉଟ୍ ହେବା ସହ ଭାରତର ବିଜୟ ପଥ ପରିଷ୍କାର ହୋଇଯାଇଥିଲା । ଅନ୍ତିମ ଭାଗରେ ଜୋଫ୍ରା ଆର୍ଚର ୨୧ ରନ୍ କରିଥିଲେ । ଅନ୍ୟ କେହି ଭାରତୀୟ ବୋଲରଙ୍କ ମୁକାବିଲା କରିପାରି ନଥିଲେ । ଶେଷରେ ଇଂଲଣ୍ଡ ୧୦୩ ରନ୍ କରି ଅଲ ଆଉଟ୍ ହୋଇ ଯାଇଥିଲା । ଭାରତ ପକ୍ଷରୁ ପକ୍ଷର ଓ କୁଲଦୀପ ୩ଟି ଲେଖାଏଁ ୱିକେଟ୍ ନେଇଥିଲେ ।