ସୁନ୍ଦରଗଡ଼,୦୭/୦୩: ଘରୋଇ କଳିରୁ ନରକୀୟ କାଣ୍ଡ । ପାରିବାରିକ କଳହ ସାଜିଲା କାଳ । ସାମାନ୍ୟ ବଚସାରୁ ରାଗିଯାଇ ସ୍ତ୍ରୀ ମୁଣ୍ଡକୁ ଇଟାରେ ଛେଚି ଛେଚି ମାରିଲା ନିଷ୍ଠୁର ସ୍ୱାମୀ । ଘଟଣା ସ୍ଥଳରେ ଛଟପଟ ହୋଇ ଚାଲିଗଲା ମହିଳାଙ୍କ ଜୀବନ । ରକ୍ତରେ ଭାସିଲା ଘର । ହତ୍ୟାକାରୀ ସ୍ୱାମୀ ମଙ୍ଗଲୁ ଓରାମକୁ ଗିରଫ କଲା ପୋଲିସ । ସୁନ୍ଦରଗଡ଼ ଟାଉନ ଥାନା ଅନ୍ତର୍ଗତ ଭବାନୀପୁର ଠାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ମଙ୍ଗଲୁ ଓରାମ ଏବଂ ତାଙ୍କ ପତ୍ନୀଙ୍କ ମଧ୍ୟରେ ପାରିବାରିକ କଳହକୁ ନେଇ ଗଣ୍ଡଗୋଳ ହୋଇଥିଲା । ଉଭୟଙ୍କ ମଧ୍ୟରେ ବଚସା ହେବା ପରେ କ୍ରୋଧରେ ଆସି ମଙ୍ଗଲୁ ଓରାମ ତାଙ୍କ ପତ୍ନୀଙ୍କୁ ଆକ୍ରମଣ କରିଥିଲା । ମାଡ଼ ମାରିବା ସହ ଏକ ଇଟାରେ ପତ୍ନୀର ମୁଣ୍ଡକୁ ବାରମ୍ୱାର ବାଡେଇଥିଲା ନିଷ୍ଠୁର ସ୍ୱାମୀ । ଫଳରେ ଘଟଣା ସ୍ଥଳରେ ହିଁ ମହିଳା ଜଣକ ପ୍ରାଣ ହରାଇଥିଲେ । ଗ୍ରାମବାସୀ ଏହି ଘଟଣା ବିଷୟରେ ଜାଣିବା ପରେ ସୁନ୍ଦରଗଡ଼ ଟାଉନ ଥାନାକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପହଞ୍ଚି ସ୍ୱାମୀ ମଙ୍ଗଲୁ ଓରାମଙ୍କୁ ଗିରଫ କରିଛି ପୋଲିସ । ଏହା ସହ ମହିଳାଙ୍କ ମୃତଦେହ ଜବତ କରି ଘଟଣାର ତଦନ୍ତ କରୁଛି ସୁନ୍ଦରଗଡ଼ ଟାଉନ ଥାନା ପୋଲିସ ।
