ରାଉରକେଲା,୨୩/୦୨ :ଅଶାନ୍ତ ରାଉରକେଲା । ସକ୍ରିୟ ଅପରାଧୀ । ପୁଣି ଗର୍ଜିଛି ବନ୍ଧୁକ । ବାଲିଘାଟ ବିବାଦକୁ କେନ୍ଦ୍ର କରି କାର୍ରେ ଯାଉଥିବା ଜଣେ ବ୍ୟବସାୟୀଙ୍କୁ ଗୁଳିମାଡ଼ କରିଛନ୍ତି ଦୁର୍ବୃତ୍ତ । ଗୁଳିମାଡ଼ର ଶିକାର ବିଜୟ ଲାକ୍ରା (୩୫)ଙ୍କ କାନମୁଣ୍ଡାରେ ଗୁଳି ବାଜିଛି । ଗୁରୁତର ଅବସ୍ଥାରେ ତାଙ୍କୁ ରାଉରକେଲା ଇସ୍ପାତ ଜେନେରାଲ ହସ୍ପିଟାଲ (ଆଇଜିଏଚ୍)ରେ ଭର୍ତ୍ତି କରାଯାଇଛି । ସେକ୍ଟର-୪ରେ ଶନିବାର ରାତି ପ୍ରାୟ ୮ଟାରେ ଘଟିଥିବା ଏହି ଘଟଣା ସହରରେ ଆତଙ୍କର ବାତାବରଣ ସୃଷ୍ଟି କରିଛି ।
ସୂଚନା ଅନୁଯାଇ, କୁଆରମୁଣ୍ଡାର ମୂଳବାସିନ୍ଦା ବିଜୟ ଲାକ୍ରା ସେକ୍ଟର-୪ କ୍ୱାର୍ଟର୍ସ ନଂ. ଏ/୮୮ରେ ରୁହନ୍ତି । ରାତି ପ୍ରାୟ ୮ଟାରେ ସେ ଛୋଟ ଝିଅକୁ ସାଙ୍ଗରେ ଧରି କାର୍ (ଓଡ଼ି ୧୪ ଆର-୫୫୨୬) କୌଣସି କାର୍ଯ୍ୟରେ ଘରୁ ବାହାରିଥିଲେ । କ୍ୱାର୍ଟର୍ସ ନଂ.ଏ/୩୦ ସମ୍ମୁଖରେ କେତେଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କ ଉପରକୁ ଗୁଳିମାଡ଼ କରି ଚମ୍ପଟ ମାରିଥିଲେ । ଗୁଳି କାର୍ କାଚ ଭେଦି ବିଜୟଙ୍କ କାନମୁଣ୍ଡାରେ ବାଜିଥିଲା । ଗୁଳିମାଡ଼ ପରେ ବିଜୟ କାର୍ ଉପରୁ ନିୟନ୍ତ୍ରଣ ହରାଇଥିଲେ । ଗାଡ଼ି କ୍ୱାର୍ଟର୍ସ ପାଚେରିରେ ପିଟି ହୋଇଯାଇଥିଲା । ସୌଭାଗ୍ୟବଶତଃ କାର୍ରେ ବସିଥିବା ଝିଅ ସୁରକ୍ଷିତ ଅଛନ୍ତି । ରକ୍ତ ଜୁଡୁବୁଡୁ ବିଜୟଙ୍କୁ ସ୍ଥାନୀୟ ଲୋକେ ଦେଖିଥିଲେ । ଯନ୍ତ୍ରଣାରେ ଛଟପଟ ହେଉଥିଲେ ହେଁ କେହି ଡାକ୍ତରଖାନା ନେବାକୁ ସାହସ ଜୁଟାଇ ପାରି ନ ଥିଲେ । ସୂଚନା ପାଇ ସ୍ତ୍ରୀ ଆଶା ପହଞ୍ଚି ସ୍କୁଟିରେ ସ୍ୱାମୀଙ୍କୁ ଆଇଜିଏଚ୍ ନେଇଥିଲେ । ଆଇସିୟୁରେ ତାଙ୍କର ଚିକିତ୍ସା ଚାଲିଛି । ଗୁରୁତର ବିଜୟ କ୍ଷତାକ୍ତ ଅବସ୍ଥାରେ ଯେଉଁ ତଥ୍ୟ ଦେଇଛନ୍ତି ତାହା ସୋସିଆଲ୍ ମିଡିଆରେ ଭାଇରାଲ୍ ହୋଇଛି ।
କିଛିଦିନ ପୂର୍ବରୁ ବାଲିଘାଟକୁ ନେଇ ଏକ ଗୋଷ୍ଠୀ ସହ ତାଙ୍କର ଗଣ୍ଡଗୋଳ ହୋଇଥିଲା । ଜୀବନରୁ ମାରି ଦେବାକୁ ଧମକ୍ ମିଳିଥିଲା । ସନ୍ଦୀପ ମିଶ୍ରା ନାମକ ଜଣେ ବ୍ୟକ୍ତି ସୁଟରଙ୍କୁ ପଠାଇ ହତ୍ୟା ଉଦ୍ୟମ କରିଥିବା ବିଜୟ ଅଭିଯୋଗ କରିଛନ୍ତି । ଅପରାଧୀମାନେ ବିଜୟଙ୍କୁ ମାରିବାକୁ ପୂର୍ବରୁ ଯୋଜନା କରିଥିଲେ । ସକାଳୁ ସହରରେ ପଇଁତରା ମାରୁଥିଲେ । ରାତି ୮ଟାରେ ସୁଯୋଗ ପାଇ ସେମାନେ ଗୁଳିମାଡ଼ କରିଥିବା ଚର୍ଚ୍ଚା ହେଉଛି । ଅତିରିକ୍ତ ଏସ୍ପିଙ୍କ ସମେତ ସେକ୍ଟର-୩ ଥାନା ପୁଲିସ୍ ଗୁଳିକାଣ୍ଡସ୍ଥଳରେ ପହଞ୍ଚି ପ୍ରାଥମିକ ତଦନ୍ତ କରିଛି । ବିଜୟଙ୍କ ଉପରକୁ କେତେ ରାଉଣ୍ଡ ଗୁଳିମାଡ଼ ହୋଇଛି ତାହା ଅସ୍ପଷ୍ଟ ରହିଛି । ଅଦ୍ୟାବଧି ଗୋଟିଏ ଖୋକା ଜବତ କରାଯାଇଛି । ଏସ୍ପିଙ୍କ ନିର୍ଦ୍ଦେଶରେ ସ୍ୱତନ୍ତ୍ର ପୁଲିସ୍ ଟିମ୍ ଦୁର୍ବୃତ୍ତଙ୍କୁ ଧରିବାକୁ ବିଭିନ୍ନ ସ୍ଥାନର ଚଢ଼ଉ ଜାରି ରଖିଛ
