ବିରୁଟ,୨୩/୦୯: ଇସ୍ରାଏଲ ଓ ହିଜବୁଲ୍ଲା ପରସ୍ପର ବିରୋଧରେ ଆକ୍ରମଣକୁ ଜୋର୍ଦାର କରିଛନ୍ତି । ହିଜବୁଲ୍ଲା ପକ୍ଷରୁ ଇସ୍ରାଏଲ ଉପରେ ରକେଟ, ମିସାଇଲ ଓ ଡ୍ରୋନ ଯୋଗେ ପ୍ରଚଣ୍ଡ ଆକ୍ରମଣ କରାଯାଇଛି । ଫଳରେ ଇସ୍ରାଏଲ ଥରି ଉଠିଛି ।
ସୂଚନା ଅନୁସାରେ ଆଜି ଭୋର ସମୟରେ ହିଜବୁଲ୍ଲା ଉତ୍ତର ଇସ୍ରାଏଲ ଅଞ୍ଚଳରେ ୧୪୦ରୁ ଅଧିକ ରକେଟ, ଡ୍ରୋନ ଓ ମିସାଇଲ ମାଡ଼ କରିଛି । ଇସ୍ରାଏଲ ପକ୍ଷରୁ ସମ୍ପୃକ୍ତ ଅଞ୍ଚଳରେ ସାଇରନ ବଜାଯାଇ ଲୋକଙ୍କୁ ସତର୍କ କରାଇ ଦିଆଯାଇଛି । ଯାହାକୁ ନେଇ ଲୋକଙ୍କ ମଧ୍ୟରେ ଭୟ ଓ ଆତଙ୍କ ସୃଷ୍ଟି ହୋଇଛି । ଲୋକମାନେ ବଙ୍କର ଓ ବମ୍ ସେଲ୍ଟର ହୋମ୍ରେ ରହିବାକୁ ବାଧ୍ୟ ହୋଇଛନ୍ତି । ହିଜବୁଲ୍ଲା ପକ୍ଷରୁ ଇସ୍ରାଏଲ ଉପରେ ଏହା ଏପର୍ଯ୍ୟନ୍ତ ସବୁଠାରୁ ବଡ ଆକ୍ରମଣ । ଏକଥା ଇସ୍ରାଏଲ ସେନା ମଧ୍ୟ ସ୍ୱୀକାର କରିଛି । ହିଜବୁଲ୍ଲା ଆକ୍ରମଣରେ ଅନେକ ଘର କ୍ଷତିଗ୍ରସ୍ତ ହୋଇଛି । କିନ୍ତୁ ମୃତାହତ ସମ୍ପର୍କରେ କୌଣସି ସୂଚନା ମିଳିନାହିଁ । ସେପେଟ ହିଜବୁଲ୍ଲାର ଏହି ଆକ୍ରମଣର କଡା ଜବାବ ଦେଇଛି ଇସ୍ରାଏଲ । ଇସ୍ରାଏଲ ମଧ୍ୟ ଲୋବାନନରେ ଥିବା ହିଜବୁଲ୍ଲାର ଠିକଣା ଉପରେ ଶତାଧିକ ମିସାଇଲ ମାଡ଼ କରିଛି ।