ଭୁବନେଶ୍ୱର ୧୩/୦୪ (ସ୍ମୃତିରଞ୍ଜନ ବିଶ୍ୱାଳ): ୭୭ ଛୁଇଁଲା ରାଜଧାନୀକୁ । ସୁନେଲି ସ୍ୱପ୍ନର ମଞ୍ଜି ବୁଣି ରାଜଧାନୀ ଦୌଡ଼ୁଛି ଆଗକୁ ଆଗକୁ । ମେଟ୍ରୋ, ରିଙ୍ଗ୍ରୋଡ, ଏଲିଭେଟେଡ କରିଡର, ନ୍ୟୁ ସିଟି ପରିକଳ୍ପନାର ନିଅଁ ପଡ଼ିଛି । ପୁଣି ଆସୁଛି ଇନଫୋସିଟି-୩ । ନୂଆ ପରିକଳ୍ପନାର ସ୍ୱପ୍ନ ଭିତରେ ମୁଣ୍ଡ ଟେକିଲାଣି ମାଳମାଳ ଆହ୍ୱାନ। ପରିବେଶ ଗଲାଣି ଚୂଲିକୁ । କଂକ୍ରିଟ ଆଁ ଭିତରେ ସିଝିଲେଣି ସହରବାସୀ । ଡ୍ରେନେଜ, ଜବରଦଖଲ ଓ ଟ୍ରାଫିକ ଯନ୍ତ୍ରଣାର ବୁଢ଼ିଆଣୀ ଜାଲ ଅଣନିଃଶ୍ୱାସୀ କଲାଣି । ତଥାପି ବିକାଶର ନିରନ୍ତର ସ୍ରୋତ ପାଇଁ ଦେଶର ଅନ୍ୟତମ ପସନ୍ଦ ସହର ପାଲଟିଛି ଭୁବନେଶ୍ୱର । ନଭଶ୍ଚୁମ୍ବୀ ଅଟ୍ଟାଳିକାର ଧାଡ଼ି ଲମ୍ବିଲାଣି ପୂର୍ବରୁ ପଶ୍ଚିମ, ଉତ୍ତରରୁ ଦକ୍ଷିଣ । କିନ୍ତୁ, ଏ ମହଙ୍ଗା ସହରରେ ସାଧାରଣ ଲୋକଙ୍କୁ ସ୍ୱପ୍ନ ଦେଖିବା ମନା।
ମନ୍ଦିରମାଳିନୀ ସହର ପାଲଟିବ ମେଟ୍ରୋ ସିଟି । ଭୁବନେଶ୍ୱରରୁ କଟକକୁ ଧାଇଁବ ମେଟ୍ରୋ । ରାଜଧାନୀ ପାଇଁ ମୁଣ୍ଡବିନ୍ଧା ପାଲଟିଥିବା ଟ୍ରାଫିକ୍ ଭିଡ଼ ହଟିବ । ଏଲିଭଟେଡ୍ କରିଡର ସାଙ୍ଗକୁ ଇନର ଓ ଆଉଟର ରିଙ୍ଗରୋଡ୍ ତିଆରି ହେବ । ଏକାଧିକ ଫ୍ଲାଏଓଭର ଆଉ ଭୂତଳ ରାସ୍ତା ଫିଟିବ । ସହର ଉପକଣ୍ଠରେ ଛିଡ଼ା ହେବ ନିଉ ସିଟି । ଇନ୍ଫୋସିଟି-୩ ପାଇଁ ବି ଯୋଜନା ଆଗେଇଲାଣି ।
ରାଜଧାନୀର ବୟସ ସହିତ ତାଳ ଦେଇ ଏହାର ରୂପ ଓ ରଙ୍ଗ ବଦଳାଇବାକୁ ସରକାର ବିରାଟ ପରିକଳ୍ପନା କରିଛନ୍ତି । ସହରକୁ ବିଶ୍ୱସ୍ତରୀୟ କରିବାକୁ ଏକାଧିକ ଯୋଜନା ହୋଇଛି । ଜୟଦେବ ବିହାର ଛକରୁ ନନ୍ଦନକାନନ ଯାଏ ଏଲିଭଟେଡ୍ କରିଡର ହେବ । ମୁଖ୍ୟ ରାସ୍ତା ଉପରେ ଦୁଇଥାକିଆ ବ୍ରିଜ୍ ହେବ । ପ୍ରଥମ ବ୍ରିଜ୍ରେ ଗାଡ଼ିମୋଟର ଚଳାଚଳ କରିବ । ଏହା ଉପରେ ଆଉ ଏକ ବ୍ରିଜ୍ ହେବ ଓ ଏଥିରେ ମେଟ୍ରା ଚାଲିବ। ପ୍ରଥମ ପର୍ଯ୍ୟାୟରେ ଭୁବନେଶ୍ୱର ବିମାନବନ୍ଦରରୁ କଟକ ତ୍ରିଶୁଳିଆ ଯାଏ ମେଟ୍ରୋ ଚାଲିବ । ମେଟ୍ରୋ ପ୍ରକଳ୍ପରେ ୬୨୨୫ କୋଟି ଟଙ୍କା ଖର୍ଚ୍ଚ ହେବ । ମେଟ୍ରୋ ପାଇଁ ଡିପୋ କାମ ଏବେ ଜୋର୍ରେ ଆଗଉଛି ।
ଭୁବନେଶ୍ୱର ଉପକଣ୍ଠ ଗୋଠପାଟଣା, ମଳିପଡ଼ା ଓ ଦାସପୁରରେ ନିଉ ସିଟିର ପରିକଳ୍ପନା ହୋଇଛି । ୮୨୨ ଏକର ଜମି ଉପରେ ସମ୍ପୂର୍ଣ୍ଣ ନୂଆ ସହର ଗଢ଼ାଯିବ । ଏଠାରେ ୨ଲକ୍ଷ ଲୋକ ରହିବା ଭଳି ସୁବିଧା ସୁଯୋଗ ରହିବ । ଆବାସିକ ଘରଠାରୁ ନେଇ ରେଷ୍ଟୁରାଣ୍ଟ, ମଲ୍, ହୋଟେଲ, ରିଟେଲ ଆଉଟଲେଟ୍, ସାଂସ୍କୃତିକ କେନ୍ଦ୍ର, ଇନୋଭେସନ ହବ୍ ରଖିବାକୁ ବିଡିଏ ଯୋଜନା କରୁଛି । ବସ୍ ଓ ମେଟ୍ରୋ ଜରିଆରେ ଏହି ଅଞ୍ଚଳକୁ ରାଜଧାନୀର ପ୍ରମୁଖ ଅଞ୍ଚଳ ସହ ଯୋଡ଼ିବାକୁ ଯୋଜନା ରହିଛି ।
ଭୁବନେଶ୍ୱରକୁ ଆଇଟି ହବ୍ ଭାବେ ଗଢ଼ି ତୋଳିବାକୁ ସରକାର ଇନଫୋସିଟି-୩ ପାଇଁ ପରିକଳ୍ପନା କରିଛନ୍ତି । ଶିଖରଚଣ୍ଡୀ ପାଖରେ ଇନ୍ଫୋସିଟି-୧ ଓ ମଦନପୁରରେ ଇନ୍ଫୋସିଟି-୨ ପରେ ଏବେ ଇନ୍ଫୋସିଟି-୩ କରିବାକୁ ଯାଉଛନ୍ତି । ଏଥିପାଇଁ ଉପଯୁକ୍ତ ଜାଗା ଖୋଜା ଚାଲିଛି । ରେଳଷ୍ଟେସନ ପୁନଃବିକାଶ ଯୋଜନାରେ ସହରର ମୁଖ୍ୟ ରେଳଷ୍ଟେସନକୁ ବିଶ୍ୱସ୍ତରୀୟ ରୂପ ଦିଆଚାଲିଛି । ୧୧ ମହଲାର ଷ୍ଟେସନ ବିଲ୍ଡିଂ ସହ ଉଭୟ ମାଷ୍ଟରକ୍ୟାଣ୍ଟିନ୍ ଓ କଟକ ରୋଡ୍କୁ ଯୋଡ଼ିବାକୁ ଏୟାର କନ୍କୋର୍ସ ତିଆରି ହୋଇଛି । ୧୦୮ ମିଟର ଲମ୍ବା କନକୋର୍ସରେ ଲୋକେ ସିଧା ଷ୍ଟେସନ ପାଖକୁ ଗାଡ଼ି ଯୋଗେ ଯାଇ ଓହ୍ଲାଇ ପାରିବେ ।
ଦିନକୁ ଦିନ ଗାଡ଼ିମୋଟର ସଂଖ୍ୟା ବଢୁଛି । ଦିନ ହେଉ କି ରାତି, ସବୁ ସମୟରେ ଟ୍ରାଫିକ ଭିଡ଼ ଅସମ୍ଭାଳ ହେଲାଣି । ସବୁ ପ୍ରମୁଖ ରାସ୍ତାରେ ଟ୍ରାଫିକ୍ ଜାମ୍ରେ ଫସୁଛନ୍ତି ଲୋକେ । ଏଥିରୁ ମୁକ୍ତି ପାଇଁ ସରକାର ୧୪ ହଜାର କୋଟିର ମେଗା ପ୍ଲାନ୍ କରିଛନ୍ତି । ସହର ଭିତର ଓ ଏହାର ଚାରିପାଖରେ ରାସ୍ତାକୁ ପ୍ରଶସ୍ତ କରାଯିବ । ଲୋକେ ଚୁଟ୍କିରେ ନିଜ ଗନ୍ତବ୍ୟସ୍ଥଳରେ ପହଞ୍ଚିବେ । ପୁରୀ, ଭୁବନେଶ୍ୱର ଓ କଟକକୁ ନେଇ ଅର୍ଥନୈତିକ ଅଞ୍ଚଳ ଗଢ଼ାଯିବ । ନୂଆ ଗ୍ରେଟର ଭୁବନେଶ୍ୱରର ପରିକଳ୍ପନା ହୋଇଛି । ଏହାର କେନ୍ଦ୍ରସ୍ଥଳ ହେବ ଭୁବନେଶ୍ୱର ।
୬୧୫୨ କୋଟି ଟଙ୍କାରେ ଭୁବନେଶ୍ୱର ଆଉଟର ରିଙ୍ଗରୋଡ୍ ତିଆରି ହେବ । ଏହି ରିଙ୍ଗରୋଡ୍ ଜାତୀୟ ରାଜପଥ-୩୧୬ ପିପିଲି ପାଖରୁ ବାହାରି ଜାତୀୟ ରାଜପଥ-୧୬ରେ ଥିବା କେଏମ୍ବିବି କଲେଜ, ଜାତୀୟ ରାଜପଥ-୫୭ ତରତୁଆ, ହରିରାଜପୁର ଓ ଚକ୍ରଧରପୁର, ଜାତୀୟ ରାଜପଥ-୧୬ ବାଲିକୁଦା ଦେଇ ରାଜ୍ୟ ରାଜପଥ-୬୦ ସୁନ୍ଦରଗାଁ ଓ ବାଲିପାଟଣା ଦେଇ ରାଜ୍ୟ ରାଜପଥ-୧୩ ଶାଳଜଙ୍ଗ ହୋଇ ପୁଣି ପିପିଲି ପାଖରେ ସରିବ । ମୋଟ ୧୪୮ କିମି ଦୂରତାର ରାସ୍ତାକୁ ନେଇ ଏହି ରିଙ୍ଗରୋଡ୍ କରାଯିବି ।
ଏହାକୁ ତିଆରି ପାଇଁ ୧୫୫୯ କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା ଅଛି । ଉଭୟ ଇନର ଓ ଆଉଟର ରିଙ୍ଗରୋଡ୍ ରାସ୍ତା ୬ ଲେନ୍ ବିଶିଷ୍ଟ ହେବ । ଏହି ରିଙ୍ଗରୋଡ୍ରେ ଅନେକ ବ୍ରିଜ୍ ଓ ଛକ ରହିବ । ବିଦେଶ ଭଳି ରାଜଧାନୀରେ ହ୍ୱାଇଟ୍ ଟପିଂ ରାସ୍ତା ତିଆରି ପାଇଁ ବି ଯୋଜନା ହୋଇଛି । ଏଥିରେ ରାସ୍ତାର ଆୟୂଷ ୭ରୁ ୧୦ ବର୍ଷ ବଢ଼ିଯିବ । ୭୦୦ କୋଟି ଟଙ୍କା ଖର୍ଚ୍ଚରେ କଳ୍ପନା ଛକରେ ନୂଆ ଫ୍ଲାଏଓଭର ହେବ । ମାଉସୀ ମା’ ମନ୍ଦିର ଛକରୁ ଶିଶୁଭବନକୁ ନୂଆ ରେଳ ଓଭରବ୍ରିଜ୍ ହେବ ।
ଆଗକୁ ପୂରା ରାଜଧାନୀ ଆବର୍ଜନାମୁକ୍ତ ହେବ । ସହର ଭିତରେ ଆଉ କେଉଁଠି ଅଳିଆର ପାହାଡ଼ ଦେଖିବାକୁ ମିଳିବନି କି ଗନ୍ଧ ନାକରେ ବାଜିବନି । ସହରରୁ ପ୍ରତିଦିନ ବାହାରୁଥିବା ଅଳିଆରୁ ବାୟୋ ଗ୍ୟାସ୍ ଉତ୍ପାଦନ କରାଯିବ । ବାୟୋ ଗ୍ୟାସ୍ ପ୍ଲାଣ୍ଟ ପ୍ରତିଷ୍ଠା ପାଇଁ ଅଏଲ ଇଣ୍ଡିଆ ଲିଃ ସହ ଏମଓୟୁ କରିଛି ଭୁବନେଶ୍ୱର ମହାନଗର ନିଗମ(ବିଏମ୍ସି) ।
ନୂଆ ସଚିବାଳୟ କୋଠା ଠିଆ ହେବ । ଏହାର ଡିଜାଇନ୍ ବି ପ୍ରସ୍ତୁତ ହୋଇଛି । ୟୁନିଟ୍-୨କୁ ନୂଆ ରୂପ ଦିଆଯିବ । ଏଠାରେ ନୂଆ ସରକାରୀ କ୍ୱାର୍ଟର୍ସ ଓ ବାଣିଜ୍ୟିକ କୋଠା ଛିଡ଼ା ହେବ । ଏବେ ଚନ୍ଦ୍ରଶେଖରପୁରରେ ଥିବା ଓମଫେଡ୍ ପ୍ଲାଣ୍ଟ ପରିସରରେ ଥିବା ୧୮ଏକର ଜାଗାରେ ବିଶ୍ୱସ୍ତରୀୟ କନଭେନସନ ସେଣ୍ଟର ତିଆରି ହେବ । ଏକାଧିକ ମିଟିଂ ହଲ୍ ସାଙ୍ଗକୁ ସମ୍ମିଳନୀ କକ୍ଷ, ବିଜନେସ୍ ସେଣ୍ଟର, ଇନଡୋର ଏକଜିବିସନ ହଲ୍ ରହିବ । ସର୍କିଟ୍ ହାଉସ୍କୁ ଭାଙ୍ଗି ନୂଆ ସର୍କିଟ ହାଉସ୍ ତିଆରି ହେବ । ଶିଖରଚଣ୍ଡୀ ପାହାଡ଼ ନୂଆ ରୂପ ନେବ ।
ରାଜଧାନୀକୁ ଛୁଇଁଲା ୭୭, ସ୍ୱପ୍ନର ସହର ଭୁବନେଶ୍ୱର....
