ଭୁବନେଶ୍ୱର,୧୩/୦୪; ରାଜଧାନୀ ଭୁବନଶ୍ୱରର ଆଜି ପ୍ରତିଷ୍ଠା ଦିବସ । ୭୭ ବର୍ଷରେ ପାଦ ଥାପିଛି ଆମ ରାଜଧାନୀ । ସେବେରୁ ଏବେ ଭୁବନେଶ୍ୱରରେ ଆକାଶ ପାତାଳ ଫରକ । ୧୯୪୮ରୁ ୨୦୨୫ର ଲମ୍ବା ଯାତ୍ରାରେ ସହର ଆଗକୁ ବଢିଛି । ସଫଳତା ସାଉଁଟିଛି । ବିଶ୍ୱ ଦରବାରରେ ପରିଚୟ ହାସଲ କରିଛି । ମନ୍ଦିର ମାଳିନୀ ନାମ ଯାହାର..ଯେଉଁଠି ପୂଜା ପାଆନ୍ତି ପ୍ରଭୁ ଲିଙ୍ଗରାଜ । କେତେ ଯେ ସ୍ମୃତି ଦେଇଛି ନନ୍ଦନକାନନ । ଅତୀତ ଆଇନାରେ ସ୍ମୃତି ରଖିଛି ସେ ସାଇତି । ସ୍ୱପ୍ନର ସହର... ଭିଡର ଭୁବନେଶ୍ୱର । ଆମର ତୁମର ସମସ୍ତଙ୍କର ପ୍ରିୟ ସହର । ରାତି ପାହିଲେ ତାର ଛାତି ଉପରେ ଧାଁ ଦୌଡ଼ କରେ ଜୀବନ । ସେ ଆମ ରାଜଧାନୀ ଭୁବନେଶ୍ୱର । ସୁନେଲି ସ୍ୱପ୍ନର ମଞ୍ଜି ବୁଣି ଆଗକୁ ଆଗକୁ ଦୌଡ଼ୁଛି ଭୁବନେଶ୍ୱର ।
୧୯୪୮ ମସିହା ଆଜିର ଦିନରେ ଭୁବନେଶ୍ୱରକୁ ରାଜଧାନୀର ମାନ୍ୟତା ମିଳିଥିଲା । ଦେଶର ପ୍ରଥମ ପ୍ରାଧନମନ୍ତ୍ରୀ ପଣ୍ଡିତ ଜବାହାରଲାଲ ନେହେରୁ ଓଡ଼ିଶାର ନୂଆ ରାଜଧାନୀର ଶିଳାନ୍ୟାସ କରିଥିଲେ । ୧୬.୪୮ ବର୍ଗ କିଲୋମିଟର ଅଞ୍ଚଳରେ ପ୍ରଥମେ ନକ୍ସା ତିଆରି ହୋଇଥିଲା । ଏବେ ସମୟ ସହ ତାଳ ଦେଇ ଆଗକୁ ବଢୁଛି ଭୁବନେଶ୍ୱର । ଅନେକ ବାଧାବିଘ୍ନ ସହି ରାଜଧାନୀ ଆଜି ସମୃଦ୍ଧ ହୋଇଛି । ସ୍ୱପ୍ନର ସହର ପାଲଟିଛି । ଐତିହ, କୀର୍ତ୍ତିରାଜି, ମନ୍ଦିରରେ ଭରପୁର ଭୁବନେଶ୍ୱର ଆଜି ବିଶ୍ୱ ଦରବାରରେ ପରିଚୟ ପାଇଛି । କ୍ରୀଡା, ସ୍ୱାସ୍ଥ୍ୟ ଓ ଶିକ୍ଷାରେ ସୁନାମ ଆଣିଛି ଆମ ସହର । ବଣ, ପାହାଡ଼ ଘେରା ସ୍ଥାନରେ ଆଜି ସୁଉଚ୍ଚ ଅଟାଳିକା ଛିଡା ହୋଇଛି । ରାଜଧାନୀ ରାସ୍ତାରେ ଛିଡା ହୋଇଛି ବଡ ବଡ ଓଭରବ୍ରିଜ୍ । ରାସ୍ତାଘାଟ ଆଜି ଚକାଚକ ହୋଇଛି । ସ୍ମାର୍ଟ ସିଟି ହୋଇଛି ଆମ ସହର । ମେଟ୍ରୋ ଦଉଡିବାକୁ ପ୍ରସ୍ତୁତ ହେଉଛି । ରିଙ୍ଗରୋଡ଼, ଏଲିଭେଟେଡ କରିଡର ନ୍ୟୁ ସିଟି ପରିକଳ୍ପନାର ନିଅଁ ପଡ଼ିଛି । ୨୦୧୮ ଓ ୨୦୨୩ରେ ଅନୁଷ୍ଠିତ ହକି ବିଶ୍ୱକପ ବିଶ୍ୱରେ ଭୁବନେଶ୍ୱରକୁ ପରିଚିତ କରିଛି ।
ସହର କିଛି ସମସ୍ୟା ପାଇଁ ଅପବାଦ ବି ମୁଣ୍ଡାଇଛି । ବର୍ଷାଦିନ ଆସିଲେ କ୍ରୃତିମ ବନ୍ୟା ରାଜଧାନୀ ବାସୀଙ୍କୁ ନାକେଦମ କରିଛି । ଡେନେଜ ସିଷ୍ଟମ, ଜବରଦଖଲ ଓ ଟ୍ରାଫିକ୍ ଯନ୍ତ୍ରଣାର ବୁଢିଆଣୀ ଜାଲ ଅଣନିଶ୍ବାସୀ କରିଛି । ତଥାପି ବିକାଶର ସ୍ରୋତରେ ପସନ୍ଦର ସହର ପାଲଟିଛି । କିଛି ସମସ୍ୟା ଅଛି ଯାହା ସମାଧାନ ହେବା ଦରକାର । ସହର ପାଇଁ ଏ ସମସ୍ୟା ଆହ୍ୱାନ ପାଲିଟିଛି । ସମସ୍ୟାର ସମାଧାନ ହେଲେ ଆହୁରି ସୁନ୍ଦର ସମୃଦ୍ଧ ହେବ ଆମ ଭୁବନେଶ୍ୱର ।
