ଭୁବନେଶ୍ୱର,୧୪/୦୪: ସୋମବାର ଓଡ଼ିଆ ନବବର୍ଷ, ପଣା ସଂକ୍ରାନ୍ତି ଓ ହନୁମାନ ଜୟନ୍ତୀ । ଏଥିପାଇଁ ଉତ୍ସବମୁଖର ହୋଇପଡ଼ିଛି ଭୁବନେଶ୍ୱରର ଛୋଟବଡ଼ ସମସ୍ତ ହନୁମାନ ମନ୍ଦିର । ସରିଲାଣି ସମସ୍ତ ପ୍ରସ୍ତୁତି ଓ ମନ୍ଦିର ସାଜସଜ୍ଜା । କେବଳ ମନ୍ଦିର କାହିଁକି ବଜାରରେ ଖୁନ୍ଦି ହୋଇଯାଇଛି ପୂଜା ସାମଗ୍ରୀ । ଚଉଁରାରେ ବାନ୍ଧିବା ପାଇଁ ଠେକି ଖୋଜନ୍ତୁ କିମ୍ବା ପଣା ପାଇଁ ବେଲ, ସବୁକିଛିର ପସରା ଦେଖିବାକୁ ମିଳୁଛି । ଏହି ପୂଣ୍ୟ ତିଥି ଅବସରରେ ମନ୍ଦିରରେ ହୋମଯଜ୍ଞ ସାଙ୍ଗକୁ ବିଭିନ୍ନ ସ୍ଥାନରେ ଜମିବ ପଣା ଆସର ।
ସବୁଠି ଶୁଭିବ ହନୁମାନ ଚାଳିଶା
ମହାବିଷୁବ ସଂକ୍ରାନ୍ତିରେ ମହାବୀରଙ୍କ ଜନ୍ମଦିନ ପଡ଼ୁଥିବାରୁ ରାଜଧାନୀର ସମସ୍ତ ହନୁମାନ ମନ୍ଦିରରେ ପ୍ରସ୍ତୁତି ହୋଇଛି । କେଉଁ ମନ୍ଦିରରେ ୧୦୮ ହନୁମାନ ଚାଳିଶା ପାଠ ହେବ ତ କେଉଁଠି ସୁନ୍ଦରାକାଣ୍ଡ । ମନ୍ତ୍ରପାଠ ଓ ହୋମଯଜ୍ଞରେ କମ୍ପିବ ମନ୍ଦିର । ୟୁନିଟି-୧ ରେ ଥିବା ହନୁମାନ ମନ୍ଦିରରେ ହୋଇଛି ସ୍ୱତନ୍ତ୍ର ପ୍ରସ୍ତୁତି । ପୁରୋହିତଙ୍କ କହିବା କଥା, ଭୋରରୁ ମଙ୍ଗଳ ଆଳତୀ, ବାଳ ଭୋଗ, ପ୍ରଭୁଙ୍କ ସ୍ନାନ ସହିତ ହୋମଯଜ୍ଞ କରାଯିବ । ଏଥିସହିତ ୧୦୮ ଥର ହନୁମାନ ଚାଳିଶା ପାଠ କରାଯିବ । ଭକ୍ତମାନେ କେମିତି ସୁଚାରୁ ରୂପେ ପ୍ରଭୁଙ୍କ ଦର୍ଶନ କରିପାରିବେ ସେଥିପାଇଁ ବ୍ୟବସ୍ଥା ହୋଇଛି । ସେହିପରି ୮୦୦ ରୁ ୧୦୦୦ ଲୋକଙ୍କ ପାଇଁ ପ୍ରସାଦର ବ୍ୟବସ୍ଥା ମଧ୍ୟ କରାଯାଇଛି । ସିଆରପିରେ ଥିବା ହନୁମାନ ମନ୍ଦିର, ୟୁନିଟି-୨ ସ୍ଥିତ ଡାକ ମହାବୀର, ପଞ୍ଚମୁଖୀ ହନୁମାନ ମନ୍ଦିର ଭଳି ରାଜଧାନୀରେ ଥିବା ଛୋଟବଡ଼ ସମସ୍ତ ମନ୍ଦିରରେ ଧୁମ୍ଧାମ୍ରେ ପାଳିତ ହେବ ହନୁମାନ ଜୟନ୍ତୀ ।
ଚାଲିବ ନୂଆ ପାଞ୍ଜି
ମହାବିଷୁବ ସଂକ୍ରାନ୍ତିରୁ ଓଡ଼ିଆ ନବବର୍ଷର ଆରମ୍ଭ । ସେଥିପାଇଁ ସୋମବାରଠାରୁ ଚାଲିବ ନୂଆ ପାଞ୍ଜି । ଏହି ସଂକ୍ରାନ୍ତି ପରଠୁ ସୂର୍ଯ୍ୟଙ୍କ ଉତ୍ତାପ ବଢୁଥିବାରୁ ଲୋକମାନେ ଚଉଁରାରେ ବାନ୍ଧିବେ ମାଟି ଠେକି । ସେଥିପାଇଁ ବଜାରରେ ବହୁଳମାତ୍ରାରେ ବିକ୍ରି ହେଉଛି ଭଳିକି ଭଳି ରଙ୍ଗିନ୍ ମାଟିର ଠେକି । ଯେଉଁଥିରେ ଖୁବ୍ ନିଖୁଣ ଭାବରେ ହାତ କାମ ହୋଇଛି । ମୁଖ୍ୟତଃ ଏହି ଠେକିଗୁଡ଼ିକର ମୂଲ୍ୟ ୩୦ ଟଙ୍କାରୁ ଆରମ୍ଭ ହୋଇ ୮୦ ଟଙ୍କା ପର୍ଯ୍ୟନ୍ତ ରହୁଛି । ଯାହାକୁ କିଣିବା ପାଇଁ ରବିବାର ବଜାରରେ ବେଶ୍ ଗହଳି ଦେଖାଯାଇଥିଲା । ଏଥିପାଇଁ ରାସ୍ତାକଡ଼ ଏବଂ ଛକରେ ଛୋଟ ଛୋଟ ଉଠାଦୋକାନ ମଧ୍ୟ ଖୋଲିଛି ।
ବେଲ ୨ଦିନରେ ବଢ଼ିଲା ୪୦ ଟଙ୍କା
ପଣା ସଂକ୍ରାନ୍ତି ପାଇଁ ଲୋକମାନେ ବହୁଳମାତ୍ରାରେ ବେଲ କିଣୁଛନ୍ତି । ତେଣୁ ବେଲର ମୂଲ୍ୟ ମଧ୍ୟ ବଢ଼ିଯାଇଛି । ଯେଉଁ ବେଲ ୨ ଦିନ ତଳେ ୬୦ ଟଙ୍କାରେ ବିକ୍ରି ହେଉଥିଲା ଆଜି ତା’ର ମୂଲ୍ୟ ୧୦୦ ଟଙ୍କା । ବଜାରରେ ଛୋଟ ବେଲ ଗୋଟା ୪୦ ଟଙ୍କାରୁ ଆରମ୍ଭ ହୋଇଥିବାବେଳେ ବଡ଼ ବେଲ ୧୦୦ ଟଙ୍କା ରହୁଛି । ବ୍ୟବସାୟୀଙ୍କ କହିବା କଥା, ଏ ସବୁ ବେଲ ଢେଙ୍କାନାଳ, ମୟୂରଭଞ୍ଜ, ଆଠଗଡ଼ରୁ ଆସୁଛି । ସେହିପରି ଫଳର ମୂଲ୍ୟ ମଧ୍ୟ ଉଚ୍ଚା ରହିଛି । ନଡ଼ିଆ ଗୋଟାକୁ ୫୦ ଟଙ୍କା, କଦଳୀ ଡଜନ ୯୦ ଟଙ୍କା, ସେଓ କିଗ୍ରା ୨୪୦ ଓ ଆମ୍ବ କିଗ୍ରା ୨୩୦ ଟଙ୍କା ରହିଛି । ପଣା ପାଇଁ ରବିବାର ବିଭିନ୍ନ ଫଳ ଦୋକାନରେ ଭିଡ଼ ଦେଖିବାକୁ ମିଳିଥିଲା ।
