ନୟାଗଡ଼,୧୬/୦୬: ନୟାଗଡ଼ ଜିଲ୍ଲା ଭାପୁର ବ୍ଲକ ପଦ୍ମାବତୀ ଗ୍ରାମ ନିକଟ ମହାନଦୀର ଅତଳ ଗର୍ଭରେ ବୁଡ଼ି ରହିଥିବା ଗୋପୀନାଥ ମନ୍ଦିର ଚଳିତ ବର୍ଷ ଆଉ ଦେଖାଯାଉନାହିଁ । ପ୍ରତ୍ୟେକ ବର୍ଷ ଫେବ୍ରୁଆରୀ ମାସ ପରଠାରୁ ମହାନଦୀର ଜଳସ୍ତର କମିଯାଇଥାଏ ଏବଂ ଗୋପୀନାଥ ମନ୍ଦିରର ଦଧିନଉତି ଦୃଶ୍ୟମାନ ହୋଇଥାଏ । ଚଳିତ ବର୍ଷ ମହାନଦୀରେ ଜଳ ସ୍ତର ବିଗତ ବର୍ଷମାନଙ୍କ ଅପେକ୍ଷା ଅଧିକ ହ୍ରାସ ପାଇଥିଲେ ମଧ୍ୟ ମନ୍ଦିରଟି ଆଉ ଦୃଶ୍ୟମାନ ହୋଇନାହିଁ । ମନ୍ଦିରଟି ବାଲିରେ ପୋତି ହୋଇଯାଇଥିବା ସ୍ଥାନୀୟ ଲୋକେ ସନ୍ଦେହ କରିଛନ୍ତି । ଫଳରେ ଚଳିତ ବର୍ଷ ମନ୍ଦିର ଆଉ ଦେଖାଯାଉନି ବୋଲି କହିଛନ୍ତି ।
ଏହି ମନ୍ଦିର ମହାନଦୀ ଗର୍ଭକୁ କେମିତି ଆସିଲା ତାହାକୁ ନେଇ ସାଧାରଣରେ ବେଶ ଚର୍ଚ୍ଚା ହେଉଛି । ପଦ୍ମାବତୀ ଗ୍ରାମବାସୀଙ୍କ ସୂଚନା ଅନୁସାରେ ପ୍ରାଚୀନ କାଳରୁ ମହାନଦୀ କୂଳରେ ବୋରେଇ ନାମକ ଏକ ସମୃଦ୍ଧ ଗ୍ରାମ ଥିଲା । ଗୋପୀନାଥ ମନ୍ଦିରଟି ପଞ୍ଚଦଶରୁ ଷୋଡ଼ଶ ଶତାଦ୍ଦୀ ମଧ୍ୟରେ ନିର୍ମିତ ହୋଇଥିବା ଅନୁମାନ କରାଯାଉଛି। ଏହି ମନ୍ଦିରରେ ବୋରେଇ ଗ୍ରାମବାସୀ ଗୋପୀନାଥ ଦେବଙ୍କ ପୂଜାର୍ଚ୍ଚନା କରୁଥିଲେ । ୧୯୩୩ ମସିହାରେ ମହାନଦୀରେ ଏକ ବଡ଼ ଧରଣର ବନ୍ୟା ଆସିବାରୁ ମହାନଦୀ କୂଳ ଲଙ୍ଘନ କରିଥିବା ବେଳେ ବୋରେଇ ଗ୍ରାମକୁ ଭସାଇ ନେଇଥିଲ ।
ବୋରେଇ ଗ୍ରାମର ଲୋକମାନେ ଘରଦ୍ୱାର ଛାଡ଼ି ଅନ୍ୟତ୍ର ପଳାଇ ଯାଇଥିଲେ । ଯାହାକି ବର୍ତ୍ତମାନର ପଦ୍ମାବତୀ, ଯଶୋବନ୍ତପୁର, ଟିକିରିପଡ଼ା ଶାସନ, ରଗଡ଼ିପଡ଼ା, ସୁନାତଇଲା ପ୍ରଭୃତି ଗ୍ରାମ ସୃଷ୍ଟି ହୋଇଛି । କେତେକ ପରିବାର ଖୋର୍ଦ୍ଧା ଜିଲ୍ଲା ବୋଲଗଡ଼ ଅଞ୍ଚଳକୁ ମଧ୍ୟ ଚାଲିଯାଇଥିବା କୁହାଯାଉଛି । ଲୋକମାନେ ସିନା ଚାଲିଗଲେ ହେଲେ ଗୋପୀନାଥ ମନ୍ଦରଟି ମହାନଦୀର ଅତଳ ଜଳରାଶିରେ ବୁଡ଼ି ରହିଲା । ୧୫ ବର୍ଷ ତଳେ ମହାନଦୀର ପାଣି କମି ଯାଇଥିବାରୁ ମନ୍ଦିରର ଦଧିନଉତି ଦେଖା ଦେଇଥିଲା ।
ସେହିଭଳି ୨୦୨୦ ମସିହାରେ ମନ୍ଦିରଟି ପୁଣି ମହାନଦୀ ଗର୍ଭରେ ଦୃଶ୍ୟମାନ ହୋଇଥିଲା । ଉକ୍ତ ମନ୍ଦିର ଦେଖିବାକୁ ବିଭିନ୍ନ ଅଞ୍ଚଳର ଲୋକେ ଆସିଥିଲେ । ପ୍ରସିଦ୍ଧ ସ୍କୁବା ଡାଇଭର ସବୀର ବକ୍ସ ମଧ୍ୟ ପାଣିରେ ବୁଡ଼ି ମନ୍ଦିର ସମ୍ପର୍କରେ ଅନୁଧ୍ୟାନ କରିଥିଲେ । ଗତବର୍ଷ ପର୍ଯ୍ୟନ୍ତ ମନ୍ଦିରଟି ପାଣି ଭିତରେ ଦେଖାଯାଇଥିଲା । ତେବେ ଚଳିତ ବର୍ଷ ମନ୍ଦିର ଆଉ ଦେଖାଯାଇନାହିଁ । ଏବେ ମହାନଦୀରେ ଜଳସ୍ତର ସମ୍ପୂର୍ଣ୍ଣ କମି ଯାଇଥିବା ବେଳେ ମନ୍ଦିରଟି ଦୃଶ୍ୟମାନ ହେଉନାହିଁ । ଫଳରେ ମନ୍ଦିରଟି ବାଲି ଭିତରେ ପୋତି ହୋଇଯାଇଥିବା ଅନୁମାନ କରାଯାଉଛି । ଏହାର ଅନୁସନ୍ଧାନ କରାଗଲେ ମନ୍ଦିର କେଉଁଠାରେ ଅଛି ଜଣାପଡ଼ନ୍ତା ବୋଲି ଅଞ୍ଚଳବାସୀ ମତବ୍ୟକ୍ତ କରିଛନ୍ତି ।