ଠାକୁରମୁଣ୍ଡା/କରଞ୍ଜିଆ/ ଚଢ଼େଇଭୋଳ, ୨୩/୦୬: ଦୀର୍ଘ  ୬ ବର୍ଷର ପ୍ରତୀକ୍ଷା ଓ ବାରମ୍ବାର ଦାବି  ପରେ ଅନୁଗୁଳ ଜିଲ୍ଲା ସାତକୋଶିଆରୁ ଶିମିଳିପାଳକୁ ବାହୁଡ଼ିଛନ୍ତି ‘ମହେନ୍ଦ୍ର’  ଓ ‘ରାଜକୁମାର’ । ବନ ବିଭାଗ ପକ୍ଷରୁ ଆବଶ୍ୟକ ପ୍ରକ୍ରିୟା ସରିବା ପରେ ଶନିବାର ଦୁଇ ପ୍ରଶିକ୍ଷିତ କୁମକୀ ହାତୀ ଏକ ହାଇୱାରେ କରଞ୍ଜିଆରେ ପହଞ୍ଚିଥିଲେ । ଦୁଇ ହାତୀଙ୍କୁ ଦେଖିବା ଲାଗି ପ୍ରବଳ  ଭିଡ଼ ଜମିଥିଲା । ତେଣୁ ସେମାନଙ୍କୁ  ସେଣ୍ଟ୍ରାଲ ନର୍ସରି ଓ ଠାକୁରମୁଣ୍ଡା  ରାସ୍ତାର ମହାବୀର ଛକ ନିକଟରେ  ସାମୟିକ ଅଟକାଯାଇଥିଲା । ଶରୀରକୁ  ଥଣ୍ଡା ରଖିବା ପାଇଁ ମହାବୀର ଛକରେ  ପାଣି ସିଞ୍ଚନ ବ୍ୟବସ୍ଥା କରାଯାଇଥିଲା ।  ଅପରାହ୍ଣରେ ‘ମହେନ୍ଦ୍ର’ ଓ ‘ରାଜକୁମାର’  କେନ୍ଦୁମୁଣ୍ଡିରେ ପହଞ୍ଚି ବିଶ୍ରାମ ନେଇଛନ୍ତି ।  ରବିବାର ସେମାନଙ୍କୁ ଶିମିଳିପାଳ  ଅଭୟାରଣ୍ୟ ଅନ୍ତର୍ଗତ ଜେନାବିଲ  ବନାଞ୍ଚଳକୁ ନିଆଯିବ ବୋଲି ବନ ବିଭାଗର  ପଦସ୍ଥ ଅଧିକାରୀଙ୍କଠାରୁ ସୂଚନା ମିଳିଛି । 

ସୂଚନାଯୋଗ୍ୟ, ୨୦୧୮ ଜାନୁଆରୀ  ୨୬ରେ ସାତକୋଶିଆ ବ୍ୟାଘ୍ର ପ୍ରକଳ୍ପକୁ  ସହାୟତା ଯୋଗାଇବା ଲକ୍ଷ୍ୟରେ  ଶିମିଳିପାଳରୁ ତାଲିମପ୍ରାପ୍ତ ‘ମହେନ୍ଦ୍ର’  ଓ ‘ରାଜକୁମାର’ ଯାଇଥିଲେ । ୨୦୧୮  ଜୁନ ୨୧ରେ କାହ୍ନା ଜାତୀୟ ଉଦ୍ୟାନରୁ  ମହାବଳ ବାଘ ‘ମହାବୀର’ ଏବଂ  ଏହାର ସପ୍ତାହେ ପରେ ଜୁନ ୨୮ରେ  ବାନ୍ଧବଗଡ଼ ଜାତୀୟ ଉଦ୍ୟାନରୁ  ଆସିଥିଲା ବାଘୁଣୀ ‘ସୁନ୍ଦରୀ’ । ୯  ସପ୍ତାହ ପରେ ଶିକାରୀଙ୍କ ଫାଶରେ  ପଡ଼ି ‘ମହାବୀର’ର ମୃତ୍ୟୁ ଘଟିଥିଲା ।  ହିଂସ୍ର ହୋଇ ଉଠିଥିବା ‘ସୁନ୍ଦରୀ’ର  ଦୌରାତ୍ମ୍ୟରେ ଅତିଷ୍ଠ ହୋଇପଡ଼ିଥିଲେ  ସେଠାକାର ଲୋକେ । ପରେ ବାଘୁଣୀକୁ  ପୁନର୍ବାର ସ୍ୱତନ୍ତ୍ର କରିଡରରେ  ରଖାଯାଇଥିଲା । ଦୀର୍ଘଦିନ ଧରି ଆବଦ୍ଧ  ଅଞ୍ଚଳରେ ରହିବା ପରେ ‘ସୁନ୍ଦରୀ’କୁ  ଫେରାଇ ନିଆଯାଇଥିଲା । ସାତକୋଶିଆ  ବ୍ୟାଘ୍ର ପ୍ରକଳ୍ପର ଭବିଷ୍ୟତ ସନ୍ଦିହାନ  ହୋଇଯିବା ପରେ ବାଘଙ୍କ ଉପରେ  ନଜର ରଖିବା ଓ ପାଟ୍ରୋଲିଂରେ  ସହାୟତା ପାଇଁ ଯାଇଥିବା ‘ମହେନ୍ଦ୍ର’  ଏବଂ ‘ରାଜକୁମାର’ଙ୍କ କୌଣସି  ଆବଶ୍ୟକତା ନ ଥିଲା । ଗତ  ଫେବ୍ରୁଆରୀ ଶେଷ ସପ୍ତାହ ବେଳକୁ  ସାତକୋଶିଆରୁ ଦୁଇ କୁମ୍‌କୀ ହାତୀ  ଫେରିବେ ବୋଲି ବନ ବିଭାଗ  ସ୍ପଷ୍ଟ କରିଥିଲା । ତଥାପି ଦୁଇ  ହାତୀକୁ ସେମାନଙ୍କ ମୂଳ ପ୍ରାକୃତିକ  ଆବାସସ୍ଥଳକୁ ଫେରିବାକୁ ଅଧିକ ୪  ମାସ ସମୟ ଲାଗିଗଲା । 

ଶନିବାର ଦୁଇ କୁମ୍‌କୀ ହାତୀ  ହାଇୱାରେ କରଞ୍ଜିଆ ପହଞ୍ଚିବା ପରେ  ମହାବୀର ଛକ ନିକଟରେ ସାଢ଼େ  ୧୨ଟାରେ ଦମକଳ ଗାଡ଼ି ସହାୟତାରେ  ଗାଧୋଇବା ବ୍ୟବସ୍ଥା କରାଯାଇଥିଲା ।  ଅପରାହ୍ଣରେ କେନ୍ଦୁମୁଣ୍ଡିରେ ପହଞ୍ଚି  ବିଶ୍ରାମ ନେଇଛନ୍ତି । ହାତୀଙ୍କ ତଦାରଖ  ପାଇଁ ଡେପୁଟି ଡାଇରେକ୍ଟର ଡି.  ସାଇକିରଣଙ୍କ ସମେତ ବନ ବିଭାଗର ଅନ୍ୟ  ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ ।