ନୂଆଦିଲ୍ଲୀ,୦୪/୦୭: ବର୍ଷର ପ୍ରଥମ ୬ ମାସରେ ସୁନା ନିଫ୍ଟିଠାରୁ ଭଲ ପ୍ରଦର୍ଶନ କରିଛି । ପ୍ରଥମ ୬ ମାସରେ ଏହା ୧୩.୩୭% ରିଟର୍ଣ୍ଣ ପ୍ରଦାନ କରିଛି । ଅନ୍ୟପକ୍ଷରେ, ଏହି ଅବଧିରେ ନିଫ୍ଟିରେ ୧୦.୫% ବୃଦ୍ଧି ଦେଖିବାକୁ ମିଳିଛି । ଟଙ୍କା ହିସାବରେ ଦେଖିଲେ ଏହି ଅବଧିରେ ଏମ୍ସିଏକ୍ସ ଗୋଲ୍ଡ କଣ୍ଟ୍ରାକ୍ଟରେ ୧୦ ଗ୍ରାମ ପିଛା ସୁନା ପ୍ରାୟ ୮,୪୦୦ ଟଙ୍କା ବଢ଼ିଛି ।
ଅନ୍ୟପକ୍ଷରେ, ଏ ଅବଧିରେ ସେନ୍ସେକ୍ସରେ ୨,୨୭୯ ପଏଣ୍ଟ ବୃଦ୍ଧି ଘଟିଛି । ଜୁଲାଇରେ ୧୦ ଗ୍ରାମ ପିଛା ୨୪ କ୍ୟାରେଟ୍ ସୁନା ଦର ସର୍ବକାଳୀନ ରେକର୍ଡ ସ୍ତର ୭୪,୭୭୭ ଟଙ୍କାରେ ପହଞ୍ଚିଯାଇଥିଲା । ଏବେ ଏହା ୭୧,୮୦୦ ଟଙ୍କା ନିକଟତର ରହିଛି । ମଧ୍ୟପ୍ରାଚ୍ୟରେ ଅସ୍ଥିରତା, ଚୀନ୍ର ସୁନା କ୍ରୟ ବୃଦ୍ଧି ଏବଂ ଫେଡେରାଲ ରିଜର୍ଭର ସୁଧ ହାର ହ୍ରାସ ସମ୍ଭାବନା ମଧ୍ୟରେ ସୁନା ଦରରେ ବୃଦ୍ଧି ଦେଖିବାକୁ ମିଳିଛି ।
ଗତ ୫ ବର୍ଷରେ ସୁନା ଏବଂ ନିଫ୍ଟିର ପ୍ରଥମ ୬ ମାସର ପ୍ରଦର୍ଶନକୁ ଯଦି ଦେଖାଯାଏ ତେବେ ସୁନା ଭଲ ରିଟର୍ଣ୍ଣ ଦେଇଛି । ୨୦୧୯ ଏବଂ ୨୦୨୩ ମଧ୍ୟରେ ସୁନାର ରିଟର୍ଣ୍ଣ ୪ ଥର ଭଲ ରହିଛି ।
ସୁନାର ପ୍ରଦର୍ଶନକୁ ନେଇ ରିଧିସିଦ୍ଧି ବୁଲିୟନ ଲିମିଟେଡ୍ର ଏମ୍ଡି ଏବଂ ଆଇବିଜେଏର ରାଷ୍ଟ୍ରୀୟ ମୁଖ୍ୟ ପୃଥ୍ୱୀରାଜ କୋଠାରୀ କୁହନ୍ତି ଯେ, ଫେବ୍ରୁଆରୀ ଏବଂ ଏପ୍ରିଲ ମଧ୍ୟରେ ୧୮% ବୃଦ୍ଧି ସହିତ ରେକର୍ଡ ଉଚ୍ଚ ସ୍ତରରେ ପହଞ୍ଚିବା ପରେ ସୁନା ୭୧,୦୦୦-୭୨,୦୦୦ ଟଙ୍କା ସ୍ତରରେ ମଜଭୁତ ରହିଛି । ଏହି ଅବଧିରେ ୧୦ ଗ୍ରାମ ପିଛା ଏଥିରେ ୧୨,୦୦୦ ଟଙ୍କା ବୃଦ୍ଧି ଘଟିଥିଲା । ୨୦୨୪ ଅନ୍ତିମ ତ୍ରୟମାସରେ ଏହା ରେକର୍ଡ ଉଚ୍ଚ ସ୍ତରରେ ପହଞ୍ଚିପାରେ । ବର୍ଷ ଶେଷ ସୁଦ୍ଧା ଏହା ୭୭,୦୦୦ ଟଙ୍କା ଛୁଇଁପାରେ ।
ସୂଚନାଯୋଗ୍ୟ, ଭୁ-ରାଜନୈତିକ ସମସ୍ୟା ବେଳେ ଲୋକେ ସୁନାକୁ ନିବେଶର ସୁରକ୍ଷିତ ମାଧ୍ୟମ ଭାବେ ଗଣନା କରନ୍ତି ଏବଂ ଏହି ଧାତୁରେ ଅଧିକ ନିବେଶ କରିଥାନ୍ତି । ଏହା ଦରକୁ ବଢ଼ାଇଥାଏ ।