ନୂଆଦିଲ୍ଲୀ: ମାଲେସିଆର ପୂର୍ବତନ ପ୍ରଧାନମନ୍ତ୍ରୀ ଅବଦୁଲ୍ଲା ଅହମଦ ବଦାୱିଙ୍କର ୮୫ ବର୍ଷ ବୟସରେ ପରଲୋକ ହୋଇଛି। ଅବଦୁଲ୍ଲା ଦୀର୍ଘ ଦିନ ଧରି ଅସୁସ୍ଥ ଥିଲେ। କ୍ୱାଲାଲମ୍ପୁରର ଏକ ହସ୍ପିଟାଲ ତାଙ୍କ ମୃତ୍ୟୁ ବିଷୟରେ ସୂଚନା ଦେଇଛି । ଅବଦୁଲ୍ଲାଙ୍କୁ ୨୦୨୪ ଏପ୍ରିଲ ୨୫ରେ ନ୍ୟାସନାଲ ହାର୍ଟ ଇନଷ୍ଟିଚ୍ୟୁଟର କ୍ରିଟିକାଲ୍ କେୟାର ୟୁନିଟରେ ଭର୍ତ୍ତି କରାଯାଇଥିଲା। ଅବଦୁଲ୍ଲା ନ୍ୟୁମୋଥୋରାକ୍ସ ନାମକ ଏକ ରୋଗରେ ପୀଡିତ ଥିଲେ।

"ପାକ୍ ଲାହ" ନାମରେ ଜଣାଶୁଣା ଅବଦୁଲ୍ଲାଙ୍କୁ ରବିବାର ଦିନ ଶ୍ୱାସକ୍ରିୟାରେ ସମସ୍ୟା ହେବାରୁ କୁଆଲାଲମ୍ପୁରର ଷ୍ଟେଟ୍ ଇନଷ୍ଟିଚ୍ୟୁଟ୍ ଅଫ୍ ହାର୍ଟରେ ଭର୍ତ୍ତି କରାଯାଇଥିଲା । ଯେଉଁଠାରେ ହୃଦରୋଗ ବିଶେଷଜ୍ଞଙ୍କ ଏକ ଦଳ ତାଙ୍କୁ ନଜରରେ ରଖିଥିଲେ। କିନ୍ତୁ ସମସ୍ତ ପ୍ରୟାସ ସତ୍ତ୍ୱେ, ସୋମବାର ସନ୍ଧ୍ୟା ୭:୧୦ ରେ ତାଙ୍କର ଦେହାନ୍ତ ହୋଇଛି ।  ବରିଷ୍ଠ ନେତା ମହାଥିର ମହମ୍ମଦଙ୍କ ଇସ୍ତଫା ପରେ ଅବଦୁଲ୍ଲା ୨୦୦୩ ମସିହାରେ ପ୍ରଧାନମନ୍ତ୍ରୀ ହୋଇଥିଲେ।

ଅବଦୁଲ୍ଲା ଅହମଦ ବଦାୱିଙ୍କ ପିତା ମାଲେସିଆର ଶାସକ ନ୍ୟାସନାଲ ଫ୍ରଣ୍ଟ ମେଣ୍ଟର ସବୁଠାରୁ ପ୍ରଭାବଶାଳୀ ଦଳ ୟୁନାଇଟେଡ୍ ମାଲେସ୍ ନ୍ୟାସନାଲ୍ ଅର୍ଗାନାଇଜେସନ୍ (UMNO)ର ପ୍ରତିଷ୍ଠାତା ସଦସ୍ୟ ଥିଲେ । ବାଦାୱି ମାଲେସିଆର ପେନାଙ୍ଗ ପ୍ରଦେଶରେ ଜନ୍ମଗ୍ରହଣ କରିଥିଲେ ଏବଂ ଇସଲାମରେ ଡିଗ୍ରୀ ହାସଲ କରିଥିଲେ। ୧୯୭୮ ମସିହାରେ ତାଙ୍କ ପିତାଙ୍କ ମୃତ୍ୟୁ ପର୍ଯ୍ୟନ୍ତ ସେ ପ୍ରଶାସନିକ ସେବା ସହିତ ଜଡିତ ଥିଲେ। ଏହା ପରେ ସେ ତାଙ୍କର ରାଜନୈତିକ କ୍ୟାରିଅର ଆରମ୍ଭ କରିଥିଲେ। ତାଙ୍କୁ ୧୯୯୮ ମସିହାରେ ଉପପ୍ରଧାନମନ୍ତ୍ରୀ ଭାବରେ ନିଯୁକ୍ତ କରାଯାଇଥିଲା ।