ମୁମ୍ବାଇ: ପୂର୍ବତନ ଭାରତୀୟ କ୍ରିକେଟର କେଦାର ଯାଦବ ମଙ୍ଗଳବାର ବିଜେପିରେ ଯୋଗ ଦେଇଛନ୍ତି। ମହାରାଷ୍ଟ୍ର ବିଜେପି ସଭାପତି ଚନ୍ଦ୍ରଶେଖର ବାୱନକୁଲେ ଏବଂ ଅଶୋକ ଚୌହାନଙ୍କ ସମେତ ଅନ୍ୟ ବରିଷ୍ଠ ନେତାଙ୍କ ଉପସ୍ଥିତିରେ ବିଜେପିରେ ଯୋଗ ଦେଇଛନ୍ତି କେଦାର ଯାଦବ । ପୁଣେରେ ଜନ୍ମଗ୍ରହଣ କରିବା କେଦାର ଯାଦବ ରାଜନୀତି ମୈଦାନକୁ ଓହ୍ଲାଇବା ପୂର୍ବରୁ କ୍ରିକେଟ ପଡ଼ିଆରେ ନିଜ ଦମ ଦେଖାଇଥିଲେ ।
ସେ ଭାରତ ୭୩ଟି ଦିନିକିଆ ଖେଳିଥିଲେ। ଏହି ସମୟ ମଧ୍ୟରେ ସେ ୪୨.୦୯ ହାରରେ ୧୩୮୯ ରନ କରିଥିଲେ। ଟି-୨୦ରେ ସେ ୯ଟି ମ୍ୟାଚ୍ ଖେଳି ୧୨୨ ରନ୍ କରିଥିଲେ। ତାଙ୍କୁ ଗୋଟିଏ ବି ଟେଷ୍ଟ ମ୍ୟାଚ୍ ଖେଳିବାର ସୁଯୋଗ ମିଳିନଥିଲା । ସେ ଦିନିକିଆରେ ୨୭ ୱିକେଟ୍ ନେଇଥିଲେ । ଇଣ୍ଡିଆନ ପ୍ରିମିୟର ଲିଗ୍ ବା ଆଇପିଏଲ୍ରେ ମଧ୍ୟ ସେ ଖେଳିଛନ୍ତି । କିନ୍ତୁ ଆଇପିଏଲ୍ରେ ସେ ଭଲ ପ୍ରଦର୍ଶନ କରିପାରି ନଥିଲେ । ସେ IPLରେ ପାଞ୍ଚଟି ଦଳ ପାଇଁ ଖେଳିଥିଲେ। ସେ ୯୫ଟି ମ୍ୟାଚ୍ ଖେଳି ୧୨୦୮ ରନ୍ କରିଥିଲେ।
୨୦୧୬ରୁ ୧୭ ଆରସିବି ଦଳରେ ସାମିଲ ଥିଲେ । ୨୦୧୮ରୁ ୨୦୨୦ ଚେନ୍ନାଇ ପାଇଁ ଖେଳିଥିଲେ । ଏହାପରେ ୨୦୨୧ରେ ସନରାଇଜର୍ସ ହାଇଦ୍ରାବାଦ ପାଇଁ ଖେଳିବାର ସୁଯୋଗ ପାଇଥିଲେ କେଦାର ଯାଦବ ୧୬ ନଭେମ୍ବର ୨୦୧୪ରେ ଶ୍ରୀଲଙ୍କା ବିପକ୍ଷରେ ଡେବ୍ୟୁ କରିଥିଲେ। ସେ ୮ ଫେବୃଆରୀ ୨୦୨୦ରେ ତାଙ୍କର ଶେଷ ମ୍ୟାଚ୍ ଖେଳିଥିଲେ। ପ୍ରଥମ ଟି-୨୦ ମ୍ୟାଚ୍ ଜୁଲାଇ ୨୦୧୫ରେ ଖେଳିଥିଲେ ଏବଂ ଶେଷ ମ୍ୟାଚ୍ ଅକ୍ଟୋବର ୨୦୧୭ରେ ଖେଳିଥିଲେ କେଦାର ଯାଦବ । କ୍ରିକେଟ ଗ୍ରାଉଣ୍ଡରେ ଭଲ ପ୍ରଦର୍ଶନ କରିଥିବା କେଦାର ଯାଦବ ରାଜନୀତି ମୈଦାନରେ କଣ କରିବେ ତା ଉପରେ ଏବେ ସମସ୍ତଙ୍କ ନଜର ରହିବ ।
