ଭୁବନେଶ୍ୱର, ୨୪।୧୦: ଉପକୂଳ ଓଡ଼ିଶାକୁ ମାଡ଼ି ଆସୁଛି ବାତ୍ୟା ଦାନା । ଘଣ୍ଟାପ୍ରତି ୧୨ କିମି ବେଗରେ ଉତ୍ତର-ପଶ୍ଚିମ ଦିଗରେ ମୁହାଁଉଛି । ଆଜି ରାତି ସାଢ଼େ ୧୧ଟାରୁ ଦିନ ସାଢ଼େ ୧୧ ଯାଏ ରଚିବ ତାଣ୍ଡବ । ଏହି ୧୨ ଘଣ୍ଟା ଧରି ଓଡ଼ିଶା ଉପକୂଳରେ ସର୍ବାଧିକ ପ୍ରକୋପ ଦେଖାଇବ । ପ୍ରଭାବରେ ୭ ଜିଲ୍ଲାରେ ଭୟାନକ ବର୍ଷା । ଆଗୁଆ ପ୍ରସ୍ତୁତ ରହିବାକୁ ବନଖଣ୍ଡ ଅଧିକାରୀଙ୍କୁ ବିଭାଗୀୟ ମନ୍ତ୍ରୀଙ୍କ ନିର୍ଦ୍ଦେଶ । ଏଥିସହିତ ୨୪ ଘଣ୍ଟିଆ ଆମ୍ୱୁଲାନ୍ସ ସେବା ଜାରି ହୋଇଛି ।
ବୁଧବାର ଅପରାହ୍ନଠାରୁ ଉପକୂଳ ଓଡ଼ିଶାରେ ତୁହାକୁ ତୁହା ବର୍ଷା ଲାଗିରହିଛି । ବାତ୍ୟା ପାଇଁ ପ୍ରଭାବିତ ହେବାକୁ ଥିବା ଅଞ୍ଚଳର ବନଖଣ୍ଡ ଅଧିକାରୀଙ୍କୁ ପ୍ରସ୍ତୁତ ରହିବାକୁ ବିଭାଗୀୟ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ନିର୍ଦ୍ଦେଶ ଦେଇଛନ୍ତି । ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଅଧୀନ ସମସ୍ତ କ୍ଷେତ୍ର କାର୍ଯ୍ୟକର୍ତ୍ତା, କର୍ମଚାରୀ ବିଶେଷକରି ରାଜ୍ୟର ଉପକୂଳବର୍ତ୍ତୀ ଅଞ୍ଚଳର ବନଖଣ୍ଡ ଅଧିକାରୀ ଏବଂ ନନ୍ଦନକାନନ ପ୍ରାଣୀ ଉଦ୍ୟାନ କର୍ତ୍ତୃପକ୍ଷ ନିଜ ନିଜ ଆଞ୍ଚଳିକ କର୍ତ୍ତୃତ୍ୱ ମଧ୍ୟରେ ବାତ୍ୟାର ପ୍ରାକ୍ ଓ ପରବର୍ତ୍ତୀ କାଳରେ ସତର୍କତାମୂଳକ ପଦକ୍ଷେପ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ଜାରି ହୋଇଛି ୨୪ ଘଣ୍ଟିଆ ଆମ୍ୱୁଲାନ୍ସ ସେବା । ସ୍ୱେଚ୍ଛାସେବୀ ସଂଗଠନ ପ୍ରଦୀପ ସେବା ଟ୍ରଷ୍ଟ ବାତ୍ୟା ବେଳେ ଲୋକଙ୍କୁ ନିଶୁଳ୍କ ସେବା ଯୋଗାଇବା ପାଇଁ ପ୍ରସ୍ତୁତି ଚଳାଇଛି । ଅସମୟ ବେଳେ ଗରିବ, ଅସହାୟ ଲୋକଙ୍କୁ ସହାୟତା ଯୋଗାଇ ଦିଆଯିବ । ବିଶେଷ କରି ଆପାତ୍ତକାଳୀନ ପରିସ୍ଥିତିରେ ଦୁର୍ଘଟଣାଗ୍ରସ୍ତ ଓ ଗୁରୁତର ରୋଗୀଙ୍କୁ ସଂଗଠନର ସ୍ୱେଚ୍ଛାସେବୀମାନେ ଆମ୍ବୁଲାନ୍ସରେ ବୋହି ନେଇ ହସ୍ପିଟାଲରେ ପହଞ୍ଚାଇବେ ବୋଲି ଟ୍ରଷ୍ଟ ପକ୍ଷରୁ ନିଷ୍ପତ୍ତି ହୋଇଛି ।
ବାତ୍ୟା ମୁକାବିଲା ପାଇଁ ସ୍ୱତନ୍ତ୍ର ମାର୍ଗଦର୍ଶିକା ଜାରି ହୋଇଛି । ଜଳପଥ ଓ ଉପକୂଳ ଅଞ୍ଚଳଗୁଡ଼ିକରେ ସୁରକ୍ଷାକୁ ବିଶେଷ ଧ୍ୟାନ ଦିଆଯିବାକୁ ନିର୍ଦ୍ଦେଶ ଦିଆଯାଇଛି । ପରିବହନ ବିଭାଗ ପ୍ରମୁଖ ଶାସନ ସଚିବ ଉଷା ପାଢ଼ୀ ବନ୍ଦର ଓ ଆଭ୍ୟନ୍ତରୀଣ ଜଳପଥ ପରିବହନ ନିର୍ଦ୍ଦେଶକ ପଦ୍ମଲୋଚନ ରାଉଳଙ୍କୁ ଏଭଳି ନିର୍ଦ୍ଦେଶ ଦେଇଛନ୍ତି । ନିହାତି ଆବଶ୍ୟକ ନଥିଲେ, ସଡ଼କ ଓ ଜଳପଥରେ ନ ଯିବାକୁ ସେ ଲୋକମାନଙ୍କୁ ପରାମର୍ଶ ଦେଇଛନ୍ତି । ଅନ୍ୟପଟେ ବିଏମ୍ସି ପକ୍ଷରୁ ୨୪ ଘଣ୍ଟିଆ କଣ୍ଟ୍ରୋଲରୁମ୍ ଖୋଲାଯାଇଛି । କମିଶନର ରାଜେଶ ପ୍ରଭାକର ପାଟିଲ ନିଜେ ଏହି ରୁମ୍ରୁ ବାତ୍ୟା ପ୍ରସ୍ତୁତି ଓ ପରିଚାଳନାର ଅପରେଟ୍ କରିବେ । ୧୨ ଜଣ କର୍ମଚାରୀ ଏହି କଣ୍ଟ୍ରୋଲରୁମ୍ରେ ୨୪ ଘଣ୍ଟିଆ ଡ୍ୟୁଟି କରୁଛନ୍ତି । ତାଙ୍କୁ ତଦାରଖ କରିବା ପାଇଁ ପ୍ରତି ସିଫ୍ଟରେ ଜଣେ ଲେଖାଏଁ ଅଧିକାରୀ ଅଛନ୍ତି । ବାତ୍ୟା ସମୟରେ କୌଣସି ଅସୁବିଧାରେ ପଡ଼ିଲେ ସଙ୍ଗେ ସଙ୍ଗେ ଫୋନ୍ କରିବାକୁ ବିଏମ୍ସି ଅନୁରୋଧ କରିଛି ।
