ପୁଣେ, ୧୨।୨: ଦିନକୁ ଦିନ ବୃଦ୍ଧି ପାଇବାରେ ଲାଗୁଛି ଜିବିଏସ୍ ମାମଲା । ମହାରାଷ୍ଟ୍ରର ପୁନେରେ ଜିବିଏସ୍ ଭାଇରସ୍କୁ ନେଇ ଲୋକଙ୍କ ମନରେ କୋକୁଆ ଭୟ । ସ୍ୱାସ୍ଥ୍ୟ ବିଭାଗ ଅଧିକାରୀଙ୍କ କହିବାନୁସାରେ, ବର୍ତ୍ତମାନ ପର୍ଯ୍ୟନ୍ତ ପୁନେ ଅଞ୍ଚଳରେ ଜିବିଏସ୍ ମାମଲା ସଂଖ୍ୟା ୧୯୭ରେ ପହଞ୍ଚିଛି । ଏହି ସ୍ନାୟୁ ବିକାରରେ ଆକ୍ରାନ୍ତ ଆଉ ୫ ଜଣ ରୋଗୀଙ୍କୁ ଚିହ୍ନଟ କରାଯାଇଥିବା ଜଣାପଡ଼ିଛି । ସ୍ୱାସ୍ଥ୍ୟ ବିଭାଗର ଜଣେ ଅଧିକାରୀ କହିଛନ୍ତି ଯେ, ପୁନେର ୫ ଜଣ ରୋଗୀଙ୍କ ମଧ୍ୟରେ ୨ ଜଣ ନୂତନ ଏବଂ ପୂର୍ବ ଦିନର ୩ ଜଣ ଅନ୍ତର୍ଭୁକ୍ତ । ଅନ୍ୟପଟେ ଦେଶରେ ଏହି ରୋଗରେ ଏପର୍ଯ୍ୟନ୍ତ ମୋଟ ୭ ଜଣଙ୍କର ମୃତ୍ୟୁ ହୋଇଛି । ମୁମ୍ବାଇରେ ଜିବିଏସ୍ ସିଣ୍ଡ୍ରୋମ ଭାଇରସରେ ପ୍ରଥମ ମୃତ୍ୟୁ ହୋଇଛି । ମୁମ୍ବାଇର ନାୟାର ହସ୍ପିଟାଲରେ ୫୩ ବର୍ଷୀୟ ଜଣେ ବୃଦ୍ଧ ବ୍ୟକ୍ତିଙ୍କର ମୃତ୍ୟୁ ହୋଇଛି ।
ସ୍ୱାସ୍ଥ୍ୟ ବିଭାଗର ପ୍ରେସ୍ ବିଜ୍ଞପ୍ତିରେ କୁହାଯାଇଛି ଯେ, ୧୯୭ ଜଣଙ୍କ ମଧ୍ୟରୁ ୧୭୨ ଜିବିଏସ୍ ରୋଗୀଙ୍କୁ ଚିକିତ୍ସା କରାଯାଇଥିଲା । ଏଥିମଧ୍ୟରୁ ପ୍ରାୟ ୪୦ ଜଣ ରୋଗୀ ପୁଣେ ମୁନିସିପାଲ୍ କର୍ପୋରେସନ୍ ଅଞ୍ଚଳର ହୋଇଥିବା ବେଳେ ୯୨ ଜଣ ପିଏମସିରେ ନୂତନ ଭାବରେ ଯୋଡ଼ା ଯାଇଥିବା ଗାଁରୁ, ୨୯ ଜଣ ପିମ୍ପରି ଚିଞ୍ଚୱାଡ଼ ନାଗରିକ ସୀମାରୁ, ୨୮ ଜଣ ପୁନେ ଗ୍ରାମାଞ୍ଚଳରୁ ଏବଂ ୮ ଜଣ ଅନ୍ୟ ଜିଲ୍ଲାର ବୋଲି ଜଣାପଡ଼ିଛି । ବର୍ତ୍ତମାନ ପର୍ଯ୍ୟନ୍ତ ୧୦୪ ଜଣ ରୋଗୀଙ୍କୁ ଡିସଚାର୍ଜ କରାଯାଇଥିବା ବେଳେ, ୫୦ ଜଣ ଆଇସିୟୁରେ ଏବଂ ୨୦ ଜଣ ଭେଣ୍ଟିଲେଟର ସପୋର୍ଟରେ ଅଛନ୍ତି ।
ଏହି ଅଞ୍ଚଳରେ ଜିବିଏସ୍ ଯୋଗୁଁ ସନ୍ଦିଗ୍ଧ ମୃତ୍ୟୁ ସଂଖ୍ୟା ୭ ରହିଥିବା ସ୍ୱାସ୍ଥ୍ୟ ବିଭାଗ କହିଛି । ଜିବିଏସ୍ ରୋଗରେ ପୀଡ଼ିତ ରୋଗୀଙ୍କଠାରେ ପେରିଫେରାଲ୍ ସ୍ନାୟୁ ଉପରେ ରୋଗ ପ୍ରତିରୋଧକ ଶକ୍ତି ଆକ୍ରମଣ କରେ । ଫଳରେ ଦୁର୍ବଳ ମାଂସପେଶୀ, ଗୋଡ଼-ହାତ ଝିମ୍ଝିମ୍ ହେବା, ଖାଦ୍ୟ ଖାଇବା ବେଳେ କିମ୍ୱା ନିଶ୍ୱାସ ନେବାରେ ସମସ୍ୟା ଦେଖାଯାଏ । ଗୁଇଲେନ୍-ବେରି ସିଣ୍ଡ୍ରୋମ୍ (ଜିବିଏସ୍) ଏକ ବିରଳ ସ୍ନାୟୁ ରୋଗ । ଡାକ୍ତରଙ୍କ ମତରେ, ଏହି ରୋଗରେ ପେରିଫେରାଲ ସ୍ନାୟୁ କ୍ଷତିଗ୍ରସ୍ତ ହୁଏ । ଯେଉଁ କାରଣରୁ ହାତଗୋଡ଼ ଦୁର୍ବଳ ଲାଗେ । ଏହା ଏକ ଗମ୍ଭୀର ସ୍ନାୟୁ ରୋଗ । ଏପରି ପରିସ୍ଥିତିରେ, ଯଦି ଠିକ୍ ସମୟ ମଧ୍ୟରେ ପରୀକ୍ଷା କରିବା ସହ ତୁରନ୍ତ ଚିକିତ୍ସା କରାଯାଏ, ତେବେ ରୋଗୀ ସମ୍ପୂର୍ଣ୍ଣ ସୁସ୍ଥ ହୋଇପାରିବେ ।
ଜିବିଏସ୍ ରୋଗର ଲକ୍ଷଣ କ’ଣ ?
- ହାତ-ଗୋଡ଼-ପାଦ ଝିମ୍ଝିମ୍ ହେବା
- ଚାଲିବା ବେଳେ ଦୁର୍ବଳ ଲାଗିବା
- ଖାଇବା ବେଳେ ଗଳାରେ ଯନ୍ତ୍ରଣା ଅନୁଭବ ହେବା
- ଆଖିରେ ଯନ୍ତ୍ରଣା ଅନୁଭବ ହେବା
- ମାଂସପେଶୀରେ ଯନ୍ତ୍ରଣା
- ମଳମୂତ୍ର କରିବାରେ ସମସ୍ୟା
- ଶ୍ୱାସକ୍ରିୟୀରେ ସମସ୍ୟା
