ଜଗତସିଂହପୁର, ୨୩/୩ : ଜଗତସିଂହପୁର ଜିଲ୍ଲା ରାହାମାଠାରେ ପାଞ୍ଚ ଦିନ ବ୍ୟାପି ଅନ୍ତର୍ଜାତୀୟ ଶ୍ରୀଜଗନ୍ନାଥ ମହୋତ୍ସବ ଆୟୋଜିତ ହୋଇଛି । ନାମାଚାର୍ଯ୍ୟ ବାୟା ବାବା ଭାଗବତ ପ୍ରଚାର ସମିତି ଆନୁକୂଲ୍ୟରେ ଆୟୋଜିତ ହୋଇଛି ଏହି କାର୍ଯ୍ୟକ୍ରମ । ଏଥିରେ ରାଜ୍ୟ ତଥା ରାଜ୍ୟ ବାହାରର ବହୁ ସାଧୁ ସନ୍ଥ, ପ୍ରବଚକ ଓ ବହୁ ବିଶିଷ୍ଠ ବ୍ୟକ୍ତିମାନେ ଯୋଗଦେଇ ଶ୍ରୀଜଗନ୍ନାଥ ସଂସ୍କୃତିକୁ କିପରି ବିଶ୍ଵସ୍ତରୀୟ କରାଯାଇପାରିବ ସେ ନେଇ ଆଲୋକପାତ କରିଥିଲେ ।
ଗତକାଲି ତୃତୀୟ ସନ୍ଧ୍ୟାରେ ପ୍ରମେୟ ଓ ନିୟୁଜ ସେଭେନର ସିଇଓ ସୁନୀଲ ଦାସ ଯୋଗଦେଇ ଜଗନ୍ନାଥ ମହାପ୍ରଭୁଙ୍କ ମହିମା ବାବଦରେ ଆଲୋକପାତ କରିବା ସହ ଏହି ସଂସ୍କୃତିର ମହାନତା ବାବଦରେ ଆଲୋକପାତ କରିଥିଲେ । ଶ୍ରୀଜଗନ୍ନାଥ ସଂସ୍କୃତିକୁ ସାରା ବିଶ୍ବରେ ପ୍ରସାରିତ କରିବାରେ ଗଣ ମାଧ୍ୟମର ଭୂମିକା ଓ ଦାୟିତ୍ବ ବାବଦରେ ଆଲୋକପାତ କରିଥିଲେ । ଶ୍ରୀଜଗନ୍ନାଥଙ୍କର ଭୁବନ ପ୍ରସିଦ୍ଧ ରଥଯାତ୍ରାଠାରୁ ଆରମ୍ଭ କରିବାର ମାସରେ ଆୟୋଜିତ ତେର ପର୍ବକୁ ବହୁଳ ଭାବରେ ପ୍ରଚାର ପ୍ରସାର କରିବାରେ ପ୍ରମେୟ ଓ ନିୟୁଜ ସେଭେନ ସବୁବେଳେ ଉଦ୍ୟମ କରିଆସିଛି ବୋଲି ଶ୍ରୀ ଦାସ କହିଥିଲେ ।
ଏହି ମହୋତ୍ସବରେ ଅନ୍ୟମାନଙ୍କ ମଧ୍ୟରେ ସନ୍ଥ ଶଙ୍କରାନନ୍ଦ ଗିରି ମହାରାଜ, ଶ୍ରୀଜଗନ୍ନାଥ ସଂସ୍କୃତିର ପ୍ରଚାରକ ବାବା ସତ୍ୟାନନ୍ଦ ଦାସ ମହାରାଜ, ଧୃତିଧର ଦାସ ଓ ଅଭିନନ୍ଦନ ଦାସଙ୍କ ସହ ବହୁ ବିଶିଷ୍ଠ ବ୍ୟକ୍ତିମାନେ ଯୋଗଦେଇଥିଲେ । ଉପସ୍ଥିତ ବ୍ୟକ୍ତିମାନେ ମହାପ୍ରଭୁ ଶ୍ରୀଜଗନ୍ନାଥ ଆମର ପରିଚୟ ଓ ତାଙ୍କ ବିନା ଏ ଜାତିର କୌଣସି ସତ୍ତା ନାହିଁ ବୋଲି ମତ ପ୍ରକାଶ କରିବା ସହ ମହାପ୍ରଭୁଙ୍କ ମହିମାକୁ ବିଶ୍ଵ ବ୍ୟାପି କରିବା ପାଇଁ ଆମ ସମସ୍ତଙ୍କ ନିଷ୍ଠା ଓ ଉଦ୍ୟମର ଆବଶ୍ୟକତା ରହିଛି ବୋଲି ଆଲୋକପାତ କରିଥିଲେ ।
ପ୍ରତିଦିନ ସନ୍ଧ୍ୟାରେ ଶ୍ରୀଜଗନ୍ନାଥଙ୍କ ମହିମା ବାବଦରେ ପ୍ରବଚନ, ପାଞ୍ଚ କୁଣ୍ଡିୟ ଯଜ୍ଞ ଓ ମହାପ୍ରଭୁଙ୍କର ୨୪ ବେଶ ଓ ୫୬ ଭୋଗ ପଦର୍ଶନ ସହ ପଞ୍ଚସଖାମାନଙ୍କର କାର୍ଯ୍ୟଧାରା ବାବଦରେ ପଦର୍ଶନ କରାଯାଇଛି । ପ୍ରତିଦିନ ଦୁରଦୂରାନ୍ତରୁ ବହୁ ଜଗନ୍ନାଥ ପ୍ରେମୀ ଯୋଗଦେଇ ମହୋତ୍ସବକୁ ସଫଳ କରିବାରେ ସହଯୋଗ ଯୋଗାଇ ଆସୁଛନ୍ତି ।
