ରାଇଘର,୩୧/୩: ଲୋ-ଭୋଲଟେଜ୍ ଏବଂ ଅଘୋଷିତ ବିଦ୍ୟୁତ୍କାଟକୁ ନେଇ ତାତିଛନ୍ତି ୬ ପଞ୍ଚାୟତର ଚାଷୀ । ସଦର ବ୍ଲକ ସରଗୁଲି ଛକ ଏବଂ ନିର୍ମାଣାଧୀନ ଭାରତମାଳା ପ୍ରକଳ୍ପ ରାସ୍ତା ଅବରୋଧ କରିଛନ୍ତି । ବିଦ୍ୟୁତ୍ ଯୋଗାଣ ବ୍ୟାହତ ଯୋଗୁ ସମଗ୍ର ବ୍ଲକ ଅନ୍ଧାରରେ ରହିଛି । ଆନ୍ଦୋଳନକାରୀଙ୍କ ଭୟରେ ମରାମତି ଲାଗି ଯାଉନାହାନ୍ତି ବିଦ୍ୟୁତ କର୍ମଚାରୀ । ଖବର ଲେଖା ହେବା ଅର୍ଥାତ ରାତି ୧୦ ପର୍ଯ୍ୟନ୍ତ ରାସ୍ତା ଅବରୋଧ ଜାରି ରହିଛି । ସମସ୍ୟା ସମାଧାନ ନହେବା ପର୍ଯ୍ୟନ୍ତ ଆନ୍ଦୋଳନ ଚାଲିବ ବୋଲି ଚାଷୀମାନେ କହିଛନ୍ତି । ଆଜି ଅପରାହ୍ଣ ଗୋଟାଏରେ ବିଦ୍ୟୁତ ଯୋଗାଣ ବ୍ୟାହତ ହୋଇଥିଲା । ଲୋ ଭୋଲଟେଲ୍ ସମସ୍ୟାର ପ୍ରତିବାଦରେ ଆନ୍ଦୋଳନକୁ ଓହ୍ଲାଇଥିଲେ ଚାଷୀ । ସରଗୁଲି ଛକ ଏବଂ ଭାରତାମାଳା ପ୍ରକଳ୍ପ ରାସ୍ତା ଅବରୋଧ କରିଥିଲେ । ଖବର ପାଇ ପହଞ୍ଚିଥିଲେ ତହସିଲଦାର ମୌସୁମୀ ସଜ୍ଜନ, ବିଡିଓ ଲକ୍ଷ୍ମୀସାଗର ମାଝୀ, ଆଇଆଇସି ରଘୁନାଥ ମାଝୀ ଏବଂ ଅନ୍ୟମାନେ । ଆନ୍ଦୋନଳକାରୀଙ୍କ ସହ ଆଲୋଚନା କରିଥିଲେ । ବୁଝଶୁଝା ପରେ ବି ମାନି ନଥିଲେ ଚାଷୀ । ନିଜ ଜିଦ୍ରେ ଅଟଳ ରହିଥିଲେ । ଏମିତିକି ଆନ୍ଦୋଳନ ସ୍ଥଳକୁ ରୋଷେଇ ସାମଗ୍ରୀ ଆଣିଥିଲେ । ରାତିରେ ରାସ୍ତାରେ ଶୋଇ ପ୍ରତିବାଦ କରିବେ ବୋଲି ଚେତାବନୀ ଦେଇଥିଲେ । ବିଦ୍ୟୁତ ସେବା ଠପ୍ ଯୋଗୁ ଅସହ୍ୟ ଯନ୍ତ୍ରଣା ଭୋଗିଛନ୍ତି ଜନସାଧାରଣ ।
ସୂଚନାଥାଉକି, ଗତ ୨୦ ତାରିଖରେ ଲୋ-ଭୋଲଟେଜ୍ ଏବଂ ବାରମ୍ବାର ବିଦ୍ୟୁତ କାଟ୍କୁ ନେଇ ଚାଷୀମାନେ ରାଜରାସ୍ତାକୁ ଓହ୍ଲାଇଥିଲେ । ୨ ଦିନ ଧରି ବିକ୍ଷୋଭ ପ୍ରଦର୍ଶନ କରିଥିଲେ । ଏଥିରେ ଆଖାପାଖର ୪ ପଞ୍ଚାୟତ ଚାଷୀ ସାମିଲ ହୋଇଥିଲେ । ସମସ୍ୟା ସାମଧାନ କରାଯିବ ବୋଲି ଲିଖିତ ପ୍ରତିଶ୍ରୁତି ମିଳିବା ପରେ ରାସ୍ତାରୁ ହଟିଥିଲେ ଚାଷୀ । କିଛିଦିନ ତଳେ ଗଣଶିକ୍ଷା ମନ୍ତ୍ରୀ ତଥା ସ୍ଥାନୀୟ ବିଧାୟକ ନିତ୍ୟାନନ୍ଦ ଗଣ୍ଡ ବ୍ଳକର ଯୋଡ଼ ିଗାଁରେ ଏକ ବିଦ୍ୟୁତ ଗ୍ରୀଡ୍ ଉଦ୍ଘାଟନ କରିଥିଲେ । ସମସ୍ତେ ଭାବିଥିଲେ ଆଉ ବିଦ୍ୟୁତ ସମସ୍ୟା ହେବନି । ନୂଆ ଗ୍ରୀଡ୍ ପରେ ବି ସମସ୍ୟା ଲାଗି ରହିଛି ।
