ବର୍ଲିନ,୦୨/୦୭: ଫିଫା ମାନ୍ୟତାର ତୃତୀୟ ସ୍ଥାନରେ ରହିଥିବା ବେଲଜିୟମ୍ ଚଳିତ ୟୁରୋ ଚାମ୍ପିଅନସିପ୍ରୁ ବିଦାୟ ନେଇଛି । ଡୁସେଲଡର୍ଫରେ ଅନୁଷ୍ଠିତ ରାଉଣ୍ଡ-୧୬ର ଏକ ମ୍ୟାଚ୍ରେ ବେଲ୍ଜିୟମ୍ ୦-୧ ଗୋଲ୍ରେ ଫ୍ରାନ୍ସ ଠାରୁ ପରାଜିତ ହୋଇଥିଲା । ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ରହିଥିଲେ ହେଁ ଶେଷରେ ବେଲ୍ଜିୟମ୍ ଖେଳାଳି ଜାନ୍ ଭର୍ତୋଙ୍ଗେନଙ୍କ ଆତ୍ମଘାତୀ ଗୋଲ୍ ବଳରେ ଫ୍ରାନ୍ସ ବିଜୟ ହାସଲ କରିଥିଲା । ଫ୍ରାନ୍ସ ଏହି ବିଜୟ ସହ ଷଷ୍ଠ ଥର ପାଇଁ କ୍ୱାର୍ଟର ଫାଇନାଲ୍ରେ ପ୍ରବେଶ କରିଥିଲା । କେବଳ ସେତିକି ନୁହେଁ, ବିଶ୍ୱକପ୍ ଏବଂ ୟୁରୋକୁ ମିଶାଇ ବେଲ୍ଜିୟମ୍ ବିପକ୍ଷରେ ଏହା ଫ୍ରାନ୍ସର ପଞ୍ଚମ ବିଜୟ ରହିଥିଲା ।
୮୫ତମ ମିନିଟ୍ରେ ଫ୍ରାନ୍ସ ଖେଳାଳି କୋଲୋ ମୁଆନି ଗୋଲ ପାଇଁ ପ୍ରୟାସ କରିଥିଲେ । ଡିଫେନ୍ସରେ ରହିଥିବା ଭର୍ତୋଙ୍ଗେନ ବଲ୍ ଅଟକାଇବା ପାଇଁ ପ୍ରୟାସ କରୁଥିବାବେଳେ ତାଙ୍କ ଗୋଡରେ ବଲ୍ ବାଜି ନିଜ ଦଳର ଗୋଲ୍ ପୋଷ୍ଟ ଭିତରକୁ ଚାଲିଯାଇଥିଲା । ମ୍ୟାଚ୍କୁ ଫେରିବା ପାଇଁ ବେଲ୍ଜିୟମ୍ ନିକଟରେ ଆଉ ସମୟ ନଥିଲା ।
ମ୍ୟାଚ୍ ଆରମ୍ଭରୁ ଶେଷ ପର୍ଯ୍ୟନ୍ତ ସ୍ପେନ୍ ଘନ ଘନ ଆକ୍ରମଣ କରିଥିଲା । ସମ୍ପୂର୍ଣ୍ଣ ୯୦ମିନିଟ୍ ମଧ୍ୟରେ ଦଳ ମୋଟ୍ ୧୯ଟି ସୁଯୋଗ ସୃଷ୍ଟି କରିଥିଲା । ମାତ୍ର ଗୋଟିଏ ହେଲେ ଗୋଲ୍ କରିପାରି ନଥିଲା । କ୍ୱାର୍ଟର ଫାଇନାଲ୍ରେ ପହଞ୍ଚି ସାରିଥିଲେ ହେଁ ଫ୍ରାନ୍ସର କୌଣସି ଖେଳାଳି ଏପର୍ଯ୍ୟନ୍ତ ଗୋଲ୍ କରିନାହାନ୍ତି । ଅଷ୍ଟ୍ରିୟା ବିପକ୍ଷ ଲିଗ ମ୍ୟାଚ୍ରେ ଫ୍ରାନ୍ସ ଆତ୍ମଘାତୀ ଗୋଲ୍ ବଳରେ ଜିତିଥିଲା । ଏହାପରେ ନେଦରଲାଣ୍ଡ୍ସ ବିପକ୍ଷ ମ୍ୟାଚ୍ ଗୋଲ୍ ଶୂନ୍ୟ ରହିଥିଲା । ସେହିପରି ପୋଲାଣ୍ଡ ବିପକ୍ଷ ମ୍ୟାଚ୍ ମଧ୍ୟ ୧-୧ ଗୋଲ୍ରେ ଡ୍ର’ ରହିଥିଲା । ଉଭୟ ଦଳ ପେନାଲ୍ଟି ବଳରେ ଗୋଲ୍ କରିଥିଲେ ।
