ନୂଆପଡ଼ା, ୧୦।୪: ନୂଆପଡ଼ା ନିର୍ବାଚନମଣ୍ଡଳୀର ବିଜେପି ପ୍ରାର୍ଥୀ ଅଭିନନ୍ଦନ ପଣ୍ଡାଙ୍କ ଆଜି ନିର୍ବାଚନୀ ଷ୍ଟଣ୍ଟ ଦେଖିବାକୁ ମିଳିଛି । ଅପରାହ୍ନରେ ଟିକ୍ରାପଡ଼ା ପଞ୍ଚାୟତ ପଡ଼ିଆରେ ବିଜେପିର କର୍ମୀ ସମ୍ମିଳନୀ ହୋଇଥିଲା । ଏଠାରେ ନୂଆପଡ଼ା ବିଜେପି ବିଧାୟକ ପ୍ରାର୍ଥୀ ଅଭିନନ୍ଦନ ଯୋଗଦେଇ ନିର୍ବାଚନୀ ପ୍ରଚାର କରିଥିଲେ । ସେଠାରେ ନେତା ଓ କର୍ମୀଙ୍କ ପାଇଁ ମଧ୍ୟାହ୍ନ ଭୋଜନ ବ୍ୟବସ୍ଥା ହୋଇଥିଲା । ସଭାକାର୍ଯ୍ୟ ସରିବା ପରେ ନେତା ଓ କର୍ମୀମାନେ ମଧ୍ୟାହ୍ନ ଭୋଜନ କରିବାକୁ ଯାଇଥିଲେ । ଅଭିନନ୍ଦନ ମଧ୍ୟ ସମସ୍ତଙ୍କ ଭଳି ହାତରେ ଖଲି ଧରି ଧାଡ଼ିରେ ଛିଡ଼ା ହୋଇ ଭୋଜନ ମାଗିଥିଲେ ।
ପରେ ଭୋଜନ ଆଣି ପଡ଼ିଆରେ ତଳେ ବସି ଖାଇଥିଲେ । ମଧ୍ୟାହ୍ନ ଭୋଜନ ସାରି ଉଠିବା ବେଳକୁ ପଡ଼ିଆର ଚାରିପଟେ କାଗଜ ଖଲି ପୂର୍ଣ୍ଣହୋଇ ସାରିଥିଲା । ଲୋକେ ଭୋଜନକରି ଖଲିସବୁ ଏଣେତଣେ ଫିଙ୍ଗି ଚାଲିଯାଇଥିଲେ । ଏହାଦେଖି ଅଭିନନ୍ଦନ ନିଜେ ପଡ଼ିଆ ଭିତରେ ଲୋକଙ୍କ ଅଇଁଠା ଖଲି ଉଠାଇଥିଲେ । ତାଙ୍କୁ ଦେଖି କେତେକ ନେତା ଓ କର୍ମୀ ମଧ୍ୟ ଖଲି ଉଠାଇଥିଲେ । କିଛି ସମୟରେ ମଧ୍ୟରେ ଉକ୍ତ ପଡ଼ିଆକୁ ସଫା କରି ଦେଇଥିଲେ ।