ନୂଆଦିଲ୍ଲୀ: ଆମେରିକା ବଜାରରେ ଅଣ୍ଡାର ମୂଲ୍ୟରେ ଅହେତୁକ ବୃଦ୍ଧି ପରିଲକ୍ଷିତ ହୋଇଛି। ଯାହା ସାଧାରଣ ଉପଭୋକ୍ତାଙ୍କ ପାଇଁ ଗଭୀର ଚିନ୍ତାର ବିଷୟ ହୋଇପଡ଼ିଛି। ୟୁଏସରେ ଗୁରୁବାର ସୁଦ୍ଧା ଏକ ଡଜନ ଅଣ୍ଡାର ହାରାହାରି ମୂଲ୍ୟ ୬.୨୩ ଡଲାର (ଭାରତୀୟ ମୁଦ୍ରାରେ ପ୍ରାୟ ୫୨୦ ଟଙ୍କା) ଟଙ୍କାରେ ପହଞ୍ଚିଛି। ଗତ ବର୍ଷ ଏହି ସମୟ ତୁଳନାରେ ଚଳିତ ବର୍ଷ ଦର ବୃଦ୍ଧିରେ ନାଟକୀୟ ବୃଦ୍ଧି ପରିଲକ୍ଷିତ ହୋଇଛି। ଯାହା ଅଣ୍ଡା ଉତ୍ପାଦନରେ ଆସିଥିବା ବାଧା ଏବଂ ବଜାରରେ ଚାହିଦା ଓ ଯୋଗାଣ ମଧ୍ୟରେ ଅସନ୍ତୁଳନକୁ ସୂଚାଇଛି।
ଆମେରିକା ବଜାରରେ ଅଣ୍ଡା ମୂଲ୍ୟ ବୃଦ୍ଧିର ପ୍ରମୁଖ କାରଣ ହେଉଛି ଏଭିଆନ୍ ଇନ୍ଫ୍ଲୁଏଞ୍ଜା (ବାର୍ଡ ଫ୍ଲୁ) ମହାମାରୀ। ଏହି ରୋଗ ଆମେରିକାରେ ଅଣ୍ଡା ଉତ୍ପାଦନ କରୁଥିବା ଲକ୍ଷାଧିକ କୁକୁଡାଙ୍କୁ ପ୍ରଭାବିତ କରିଛି। ଯାହା ଫଳରେ ଅନେକ କୁକୁଡାଙ୍କୁ ମାରି ଦିଆଯାଇଛି। ଏଥିନିମନ୍ତ ଅଣ୍ଡାର ଯୋଗାଣରେ ବଡ଼ ଧରଣର ହ୍ରାସ ଘଟିଛି। ଏହା ସହିତ, ଖାଦ୍ୟ ଉଦ୍ୟୋଗରେ ଏକଚାଟିଆ ନିୟନ୍ତ୍ରଣ ଓ କିଛି ବଡ଼ ଉତ୍ପାଦକଙ୍କ ଦ୍ୱାରା ଅତିରିକ୍ତ ମୂଲ୍ୟ ନିର୍ଧାରଣ ମଧ୍ୟ ଏଥିରେ ଗୁରୁତ୍ୱପୂର୍ଣ୍ଣ ଭୂମିକା ନେଇଛି। ଉଦାହରଣ ସ୍ୱରୂପ, ଆମେରିକାର ସର୍ବବୃହତ ଅଣ୍ଡା ଉତ୍ପାଦକ କାଲ୍-ମେନ୍ ଫୁଡସ୍ର ଲାଭ ଗତ ବର୍ଷ ତୁଳନାରେ ଚଳିତ ବର୍ଷ ପ୍ରାୟ ଆଠ ଗୁଣ ବୃଦ୍ଧି ପାଇଛି। ଏହା ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି କରିବା ସହ ବିବାଦ ସୃଷ୍ଟି କରିଛି।
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୂର୍ବରୁ ଦାବି କରିଥିଲେ ଯେ ତାଙ୍କ ନୀତି ଅଣ୍ଡା ମୂଲ୍ୟକୁ ନିୟନ୍ତ୍ରଣରେ ରଖିବ। କିନ୍ତୁ ବର୍ତ୍ତମାନର ପରିସ୍ଥିତି ତାଙ୍କ ପ୍ରତିଶ୍ରୁତିର ବିପରୀତ ଚିତ୍ର ଦେଖାଉଛି। ଅନ୍ୟପଟେ, ସାଧାରଣ ମୂଲ୍ୟ ବୃଦ୍ଧି (ଇନ୍ଫ୍ଲେସନ୍) ୨.୪%କୁ ହ୍ରାସ ପାଇଥିବା ସତ୍ତ୍ୱେ, ଅଣ୍ଡା ମୂଲ୍ୟରେ ଏହି ଅସାଧାରଣ ବୃଦ୍ଧି ସରକାରୀ ନୀତି ଓ ବଜାର ଗତିବିଧି ଉପରେ ପ୍ରଶ୍ନ ଉଠାଇଛି। ଏହି ସଙ୍କଟର ସମାଧାନ ପାଇଁ ଆମେରିକା ଅନ୍ୟ ଦେଶରୁ ଅଣ୍ଡା ଆମଦାନୀ କରିବାର ଯୋଜନା କରୁଛି, କିନ୍ତୁ ନୂଆ ଟାରିଫ୍ ନୀତି ଏହାକୁ ଆହୁରି ଜଟିଳ କରିପାରେ ବୋଲି ଆଶଙ୍କା ପ୍ରକାଶ ପାଇଛି।
ଏହି ପରିସ୍ଥିତିର ପ୍ରଭାବ ସାଧାରଣ ଆମେରିକୀୟ ପରିବାର ଉପରେ ଗଭୀର ଭାବେ ପଡ଼ିଛି। ଅନେକେ ଅଣ୍ଡା କିଣିବା ବନ୍ଦ କରିଦେଇଛନ୍ତି କିମ୍ବା ଅନ୍ୟ ଖାଦ୍ୟ ବିକଳ୍ପ ଆଡ଼କୁ ମୁହାଁଇଛନ୍ତି। ସ୍ଥାନୀୟ ବଜାରରେ ଅଣ୍ଡାର ଅଭାବ ଏବଂ ଅଧିକ ମୂଲ୍ୟ ଯୋଗୁଁ ଲୋକମାନେ ନିଜର ଖାଦ୍ୟ ଅଭ୍ୟାସରେ ପରିବର୍ତ୍ତନ ଆଣିବାକୁ ବାଧ୍ୟ ହେଉଛନ୍ତି। ସରକାର ଏବଂ ଖାଦ୍ୟ ଉତ୍ପାଦକମାନେ ଏହି ସମସ୍ୟାର ସମାଧାନ ପାଇଁ ପଦକ୍ଷେପ ନେଉଥିବା ଦାବି କରୁଛନ୍ତି। କିନ୍ତୁ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ଏହି ସଙ୍କଟ ଶୀଘ୍ର ଶେଷ ହେବାର ସମ୍ଭାବନା ବହୁତ କମ୍ ରହିଛି।
ଏହି ଘଟଣା ଆମେରିକାର ଖାଦ୍ୟ ଶୃଙ୍ଖଳାର ଦୁର୍ବଳତାକୁ ପ୍ରକାଶ କରିଛି ଏବଂ ସ୍ଥାୟୀ ସମାଧାନ ପାଇଁ ଅଧିକ ଗବେଷଣା ଓ ନୀତି ପରିବର୍ତ୍ତନର ଆବଶ୍ୟକତା ଉପରେ ଜୋର ଦେଇଛି। ଲୋକମାନେ ମଧ୍ୟ ଏହାକୁ ବିରୋଧ କରି ଧିରେଧିରେ ରାସ୍ତାକୁ ଓହ୍ଲାଉଥିବା ଜଣାପଡିଛି।
