ନୂଆଦିଲ୍ଲୀ ୧୮/୦୪: ସନ୍ତାନଙ୍କର ଏକ ଆର୍ମି ଗଢ଼ିବା ପାଇଁ ସକ୍ରିୟ ଭାବେ ଲାଗିପଡ଼ିଛନ୍ତି ଏଲନ ମସ୍କ । ୱାଲ୍ ଷ୍ଟ୍ରିଟ୍ ପତ୍ରିକାର ରିପୋର୍ଟ ଅନୁସାରେ, ମସ୍କ ଏଥିପାଇଁ ସମ୍ଭାବ୍ୟ ମା’ମାନଙ୍କର ନିଯୁକ୍ତି ଲାଗି ନିଜର ସୋସିଆଲ ମିଡିଆ ପ୍ଲାଟ୍ଫର୍ମ ‘ଏକ୍ସ’ର ଉପଯୋଗ କରୁଛନ୍ତି । ଏହି ପ୍ରକ୍ରିୟାକୁ ଆଗକୁ ବଢ଼ାଇବା ପାଇଁ ସେ ସରୋଗେସୀର ପ୍ରସ୍ତାବ ଦେଉଛନ୍ତି । ଏହି ପ୍ରୟାସରେ ମସ୍କ ଆର୍ଥିକ ପ୍ରୋତ୍ସାହନ ଓ କଠୋର ଗୋପନୀୟ ଚୁକ୍ତି ଜରିଆରେ ନିଜ ସନ୍ତାନଙ୍କ ମା’ଙ୍କୁ ନିୟନ୍ତ୍ରଣରେ ରଖୁଛନ୍ତି ।
୨୬ ବର୍ଷୀୟା କନ୍ଜର୍ଭେଟିଭ୍ ଇନ୍ଫ୍ଲୁଏନ୍ସର ଆଶ୍ଲି ସେଣ୍ଟ୍ କ୍ଲେୟର ଗତ ସେପ୍ଟେମ୍ବରରେ ମସ୍କଙ୍କ ୧୩ତମ ସନ୍ତାନକୁ ଜନ୍ମ ଦେଇଥିଲେ । ସେ କହିଛନ୍ତି, ମସ୍କ ତାଙ୍କୁ ଅନେକ ମେସେଜ୍ ଦେଇଥିଲେ, ଯେଉଁଥିରେ ନିଜ ସନ୍ତାନଙ୍କର ଏକ ବିଶାଳ ପ୍ଲାଟୁନ୍ ଗଠନର ଇଚ୍ଛା ବିଷୟରେ ସେ ଆଲୋଚନା କରିଥିଲେ । ଗୋଟିଏ ମେସେଜ୍ରେ ସେ କହିଥିଲେ ‘ମୁଁ ପୁଣି ତୁମର ସାହାଯ୍ୟ ନେବାକୁ ଚାହୁଁଛି ।’ ପିଲାଙ୍କର ବିଶାଳ ଆର୍ମି ଗଢ଼ିବା ପାଇଁ ସେ ସରୋଗେଟ୍ଙ୍କ ଉପଯୋଗର ପ୍ରସ୍ତାବ ଦେଇଥିଲେ ।
୪ ଜଣ ମହିଳାଙ୍କଠୁ ମସ୍କ ଅତିକମ୍ରେ ୧୪ ସନ୍ତାନଙ୍କ ବାପା ଭାବେ ପରିଚିତ । ଏହି ୪ ମହିଳା ହେଉଛନ୍ତି ସେଣ୍ଟ୍ କ୍ଲେୟର, ଗାୟିକା ଗ୍ରାଇମ୍ସ, ନ୍ୟୁରାଲିଙ୍କ୍ କାର୍ଯ୍ୟନିର୍ବାହୀ ଅଧିକାରୀ ଶିଭନ୍ ଜିଲିସ୍ ଓ ତାଙ୍କ ପୂର୍ବତନ ପତ୍ନୀ ଜଷ୍ଟିନ୍ ମସ୍କ । କିନ୍ତୁ ତାଙ୍କ ସନ୍ତାନ ସଂଖ୍ୟା ଏହାଠୁ ଅଧିକ ବୋଲି ଅନୁମାନ କରାଯାଉଛି । ରିପୋର୍ଟ ଅନୁସାରେ, ଜଣେ ହାଇ-ପ୍ରୋଫାଇଲ ଜାପାନିଜ୍ ମହିଳାଙ୍କୁ ମସ୍କ ନିଜର ଶୂକ୍ରାଣୁ ପ୍ରଦାନ କରିଛନ୍ତି । ମସ୍କଙ୍କ ୪ ସନ୍ତାନ ଜନ୍ମ ଦେଇଥିବା ଶିଭନ୍ ଜିଲିସ୍ଙ୍କୁ ଅନ୍ୟ ମା’ଙ୍କ ମଧ୍ୟରେ ଖାସ୍ ସ୍ଥାନ ମିଳିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ବୈଠକ ଏବଂ ବିଶ୍ୱ ନେତା ଓ ଟେକ୍ ଗୁରୁଙ୍କ ଉପସ୍ଥିତିରେ ଆୟୋଜିତ ଏକ ରାତ୍ରିଭୋଜନ ଭଳି ଉଚ୍ଚ-ସ୍ତରୀୟ କାର୍ଯ୍ୟକ୍ରମରେ ସେ ମସ୍କଙ୍କ ସହ ସାମିଲ ହୋଇଛନ୍ତି ।
ସେଣ୍ଟ୍ କ୍ଲେୟର କହିଛନ୍ତି, ତାଙ୍କ ସନ୍ତାନର ଜନ୍ମ ପ୍ରମାଣପତ୍ରରୁ ମସ୍କଙ୍କ ନାଁ ହଟାଇବା ପାଇଁ ଏବଂ ସେ ଉକ୍ତ ସନ୍ତାନର ବାପା ବୋଲି ସାର୍ବଜନୀନ ନ କରିବା ପାଇଁ ତାଙ୍କୁ ପ୍ରଥମେ ମାସକୁ ୧.୫ କୋଟି ଡଲାର ଓ ୧ ଲକ୍ଷ ଡଲାର ଅଫର୍ ହୋଇଥିଲା । କ୍ଲେୟର ପ୍ରସବ ପାଇଁ ଯିବାବେଳେ ମସ୍କଙ୍କ ଅତି ନିକଟତମ ସହଯୋଗୀ ଜାରେଡ୍ ବିର୍ଚହଲ୍ ତାଙ୍କୁ ଏହି ଅଫର୍ ଦେଇଥିଲେ । କିନ୍ତୁ ସେ ଗୋପନୀୟତା ପାଇଁ ରାଜି ହେଲେ ନାହିଁ । ତଥାପି ଔପଚାରିକ କାଗଜପତ୍ରରେ ଏବେ ବି ମସ୍କଙ୍କ ନାଁ ନାହିଁ । ଗତ ଫେବ୍ରୁଆରୀରେ କ୍ଲେୟର ମସ୍କଙ୍କ ସହ ନିଜ ସମ୍ପର୍କକୁ ସାର୍ବଜନୀନ କରିବା ପରେ ଆର୍ଥିକ ସମର୍ଥନ ମାସକୁ ୪୦ ହଜାର ଡଲାର ଏବଂ ପରେ ୨୦ ହଜାର ଡଲାରକୁ ହ୍ରାସ କରାଗଲା ।
ରିପୋର୍ଟ ଆହୁରି ଦର୍ଶାଇଛି, ସନ୍ତାନ ଜନ୍ମର ଅଫର୍ ନେଇ ମସ୍କ କ୍ରିପ୍ଟୋ ଇନ୍ଫ୍ଲୁଏନ୍ସର ଟିଫାନି ଫଙ୍ଗ୍ଙ୍କ ପାଖରେ ମଧ୍ୟ ପହଞ୍ଚିଥିଲେ । ଫଙ୍ଗ୍ ଏହି ମେସେଜ୍ ସାର୍ବଜନୀନ କରିବା ପରେ ମସ୍କ ତାଙ୍କୁ ଅନ୍ଫଲୋ କରିଦେଲେ । ସେଣ୍ଟ୍ କ୍ଲେୟରଙ୍କ ସମେତ ଅନେକ ମହିଳା ଦାବି କରନ୍ତି ଯେ ସନ୍ତାନ ଜନ୍ମ ମାମଲାରେ ନିୟନ୍ତ୍ରଣରେ ରହିବା ପାଇଁ ମସ୍କଙ୍କ ଟିମ୍ ଅର୍ଥ ଓ କଠୋର ଗୋପନୀୟତାର ଡିଲ୍ କରନ୍ତି । ସହଯୋଗୀ ଜାରେଡ୍ ବିର୍ଚହଲ୍ ମସ୍କଙ୍କ ମାମଲାରେ ମେସେଜ୍ କରନ୍ତି । ଜନ୍ମହାର ହ୍ରାସ ମାନବତାକୁ ସଙ୍କଟରେ ପକାଇବ, ଏହି ବିଶ୍ୱାସ ମସ୍କଙ୍କ ମନରେ ଅଧିକ ସଂଖ୍ୟକ ସନ୍ତାନ ଜନ୍ମର ଇଚ୍ଛାକୁ ଜାଗ୍ରତ କଲା । ସେ ଅନେକ ସମୟରେ କହିଛନ୍ତି, ଜନସଂଖ୍ୟା ବୃଦ୍ଧି ବିନା ସଭ୍ୟତା ଖଣ୍ଡ ଖଣ୍ଡ ହେବାକୁ ଯାଉଛି । ମାନବତାର ଭବିଷ୍ୟତକୁ ସୁରକ୍ଷିତ କରିବା ପାଇଁ ସ୍ମାର୍ଟ ଲୋକମାନେ ଅଧିକ ସନ୍ତାନ ଜନ୍ମ ଦେବା ଆବଶ୍ୟକ ବୋଲି ତାଙ୍କ ବିଶ୍ୱାସ ।
