ଲକ୍ଷ୍ନୌ,୧୫।୬: ଦୁବାଇରେ ଲୁଚିଥିବା ଖଣି ମାଫିଆ ତଥା ପୂର୍ବତନ ବିଏସ୍ପି ଏମ୍ଏଲସି ମହମ୍ମଦ ଇକବାଲଙ୍କ ଉପରେ ଇଡିର ବଡ କାର୍ଯ୍ୟାନୁଷ୍ଠାନ। ବିଏସ୍ପି ଏମଏଲସିଙ୍କ ଦ୍ୱାରା ନିର୍ମିତ ବେଆଇନ ବିଶ୍ୱବିଦ୍ୟାଳୟକୁ ଇଡି ଜବତ କରିଛି। ଇକବାଲ ହାଜିଙ୍କ ସହାରନପୁର ଗ୍ଲୋକଲ ୟୁନିଭର୍ସିଟିର ୪୪୪୦ କୋଟି ଟଙ୍କାର ୧୨୧ ଏକର ଜମି ଓ ବିଲ୍ଡିଂକୁ ସିଜ୍ କରିଛି ଇଡି। ଏହି ସମ୍ପତ୍ତି ଅବଦୁଲ ଓ୍ବାହିଦ ଏଜୁକେସନ୍ନାଲ ଆଣ୍ଡ ଚାରିଟେବଲ ଟ୍ରଷ୍ଟ୍ର ନାମରେ ପଞ୍ଜୀକୃତ ହୋଇଛି। ଏହି ବିଶ୍ୱବିଦ୍ୟାଳୟର ଦାୟିତ୍ୱ ତାଙ୍କ ଭାଇ ଏବଂ ପୁଅମାନଙ୍କ ଉପରେ ଥିଲା।
ଯାଞ୍ଚରେ ଜଣାପଡିଛି ମହମ୍ମଦ ଇକବାଲ ଅବଦୁଲ ୱାହିଦ ଏଜୁକେସନାଲ ଆଣ୍ଡ ଚାରିଟେବୁଲ ଟ୍ରଷ୍ଟ ମାଧ୍ୟମରେ ଏହି ଜମି କିଣିଥିଲେ ଏବଂ ଏହା ଉପରେ ଏହି ବିଶ୍ୱବିଦ୍ୟାଳୟ ତିଆରି କରିଥିଲେ। ଇକବାଲ ଗତ କିଛି ମାସ ଧରି ଫେରାର ଅଛନ୍ତି। ସେ ଦୁବାଇରେ ଥିବାର କୁହାଯାଉଛି। ଦେଶର ଅନେକ ଏଜେନ୍ସି ଇକବାଲଙ୍କ ବିରୋଧରେ ତଦନ୍ତ କରୁଛନ୍ତି। ଇକବାଲଙ୍କ ବିରୋଧରେ ମନି ଲଣ୍ଡରିଂ ଏବଂ ବେଆଇନ ଖଣି ଭଳି ଅନେକ ଗୁରୁତର ଅଭିଯୋଗ ରହିଛି। ମହମ୍ମଦ ଇକବାଲଙ୍କର ଚାରି ପୁଅ ଅଛନ୍ତି। ଜେଲରେ ଥିବା ପୁଅ ଓ ଭାଇଙ୍କ ବିରୋଧରେ ମଧ୍ୟ ଅନେକ ମାମଲା ରୁଜୁ ହୋଇଛି।
ବିଏସ୍ପି ସରକାର ସମୟରେ ଘଟିଥିବା ଚିନି ମିଲ ସ୍କାମରେ ଇକବାଲଙ୍କ ବିରୋଧରେ ଇଡି ଏହି ଆକ୍ସନ ନେଇଛି। ଇଡି କହିଛି ଯେ, ମହମ୍ମଦ ଇକବାଲ ୨୦୧୦ ରୁ ୨୦୧୨ମଧ୍ୟରେ ସାହାରନପୁର ତଥା ଏହାର ଆଖପାଖରେ ବେଆଇନ ଖଣିରୁ ୫୦୦କୋଟିରୁ ଅଧିକ ଟଙ୍କା ସଂଗ୍ରହ କରିଥିଲେ। ପରେ ସେ ଏହି ଟଙ୍କାକୁ ଗ୍ଲୋବାଲ ବିଶ୍ୱବିଦ୍ୟାଳୟରେ ଲଗାଇଥିବାର ଅଭିଯୋଗ ରହିଛି। ଏହି ମାମଲାରେ ଆଗରୁ ୨୦୨୧ରେ ଇକବାଲଙ୍କ ୧୦୯୭କୋଟି ଟଙ୍କା ମୂଲ୍ୟର ସମ୍ପତ୍ତି ଜବତ କରାଯାଇଛି।