ଜଟଣୀ,୦୧/୦୯: ଘରେ ଏକୁଟିଆ  ଥିଲେ । ସ୍ୱାମୀ ଓ ପରିବାରର ଅନ୍ୟ  ସଦସ୍ୟମାନେ କାର୍ଯ୍ୟରେ ବାହାରକୁ ଯାଇଥିଲେ । ଏହି ସମୟରେ ଜଣେ ଯୁବକ ପହଞ୍ଚି ମଦ ପିଇବା ପାଇଁ ପାଣି ମାଗିଲେ ।  ପାଣି ଦେବାକୁ ମନା କରିବାରୁ ଉତ୍‌କ୍ଷିପ୍ତ  ଯୁବକ ଜଣକ ମହିଳାଙ୍କୁ ଆକ୍ରମଣ କରିବା  ସହ ତାଙ୍କ ଶାଢ଼ୀରେ ନିଆଁ ଲଗାଇଥିଲେ ।  ଶନିବାର ଜଟଣୀ ମ୍ୟୁନିସିପାଲିଟିର ୧୦  ନମ୍ବର ୱାର୍ଡ ପାଇକରାପୁରରେ ଘଟିଥିବା ଏହି  ଅଭାବନୀୟ କାଣ୍ଡ ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି । ମହିଳା ଏବେ ଗୁରୁତର ଅବସ୍ଥାରେ ଏମ୍‌ସରେ ଚିକିତ୍ସାଧୀନ ଅଛନ୍ତି। 

ପୁଲିସ ସୂତ୍ରରୁ ପ୍ରକାଶ ଯେ, ଆହତ  ମହିଳାଙ୍କ ନାମ ପ୍ରତିମା ବେହେରା (୪୬)  । ଶନିବାର ସନ୍ଧ୍ୟାରେ ସେ ଘରେ ଏକୁଟିଆ  ଥିଲେ । ଏହି ସମୟରେ ମୋହନ ବାରିକ  ନାମକ ଯୁବକ ତାଙ୍କ ଘରେ ଅତର୍କିତ ଭାବେ  ପଶିଯାଇଥିଲେ । ମଦ ପିଇବା ପାଇଁ ପ୍ରତିମାଙ୍କୁ  ପାଣି ମାଗିଥିଲେ। ପ୍ରତିମା ମନା କରିବାରୁ  ମୋହନ ତାଙ୍କୁ ଆକ୍ରମଣ କରିଥିଲେ । ଏହାପରେ ମୋହନ ତାଙ୍କ ପିନ୍ଧା ଶାଢ଼ୀରେ  ନିଆଁ ଲଗାଇ ଦେଇଥିଲେ। ହୁତୁହୁତୁ ହୋଇ  ପ୍ରତିମା ଜଳିବା ସହ ଘରୁ ବାହାରି ଆସି ପାଟି  କରିଥିଲେ । ପାଟି ଶୁଣି ପଡ଼ୋଶୀମାନେ ପହଞ୍ଚି  ଖସି ପଳାଉଥିବା ମୋହନକୁ କାବୁ କରିଥିଲେ ।  ପରେ ଖବର ପାଇ ପହଞ୍ଚିଥିବା ପୁଲିସକୁ  ହସ୍ତାନ୍ତର କରିଥିଲେ । ପ୍ରତିମାଙ୍କୁ ଗୁରୁତର ଅବସ୍ଥାରେ ପ୍ରଥମେ ସ୍ଥାନୀୟ  ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।  ଡାକ୍ତରଙ୍କ ପରାମର୍ଶ କ୍ରମେ ତାଙ୍କୁ ଏମ୍‌ସକୁ  ସ୍ଥାନାନ୍ତରିତ କରାଯାଇଥିଲା। ତାଙ୍କ ଶରୀରର ୬୦  ଭାଗ ପୋଡ଼ିଯାଇଥିବା ଡାକ୍ତର କହିଛନ୍ତି । ଅଭିଯୁକ୍ତ ମୋହନଙ୍କ ଘର ସେହି ୧୦ ନମ୍ବର ୱାର୍ଡର ରଘୁନାଥ  ନଗରରେ ବୋଲି ପୁଲିସ କହିଛି । ଅଭିଯୁକ୍ତକୁ ଗିରଫ ପରେ ତନାଘନା କରୁଛି ପୁଲିସ।