ଛତ୍ରପୁର : ନିକଟରେ ବ୍ରହ୍ମପୁରରେ କାଳବୈଶାଖୀ ଜନିତ ବର୍ଷା ପରେ ଜଳ ନିଷ୍କାସିତ ହୋଇ ନପାରି ମୁଖ୍ୟ ରାସ୍ତାରୁ ଆରମ୍ଭ କରି ଗଳିକନ୍ଦିରେ ଜମା ହୋଇ ରହିଥିଲା। ବଡ଼ ଡାକ୍ତରଖାନା ଆଉଟ୍ଡୋର୍ରୁ ଆରମ୍ଭ କରି ମନ୍ଦିର, ବିଦ୍ୟାଳୟରେ ପାଣି ଭାସି ଥିଲା। ଏଭଳି ଦୃଶ୍ୟ ଆଉ କେତେକ ସହରରେ ନିୟମିତ ଦେଖିବାକୁ ମିଳୁଥିବା ଅଭିଯୋଗ ହେଉଛି। ସାମାନ୍ୟ ବର୍ଷା ହେଲେ ପାଣି ଜମି ରହିବା, ଡ୍ରେନେଜ୍ ଅଭାବରୁ ନାଳ ପାଣି ରାସ୍ତାରେ ଭାସିବା ନଜିର ବାରମ୍ବାର ସାମନାକୁ ଆସୁଛି।
ତେବେ କ୍ଷୋଭର ବିଷୟ ହେଉଛି ଜିଲ୍ଲାର ଏକମାତ୍ର ହିଞ୍ଜିଳିକାଟୁ ପୌରପାଳିକା ସମେତ ୧୪ଟି ଏନ୍ଏସିରେ ଡ୍ରେନେଜ୍ ବ୍ୟବସ୍ଥା ମଜବୁତ କରିବାକୁ ଆରମ୍ଭ ହୋଇଥିବା ସର୍ଭେ ସମ୍ପୂର୍ଣ୍ଣ ହୋଇ ପାରୁନି। ବର୍ଷାଜଳ ନିଷ୍କାସନ ପାଇଁ ସର୍ଭେ କରିବାକୁ ୭୩ ଲକ୍ଷ ଟଙ୍କା ଲେଖାଏଁ ଆସି ବିଭିନ୍ନ ଏନ୍ଏସିରେ ପଡ଼ି ରହିଛି। ବୁଗୁଡ଼ା ଓ ବେଲଗୁଣ୍ଠ ଏନ୍ଏସିକୁ ବାଦ୍ ଦେଲେ ୫ଟି ଏନ୍ଏସିରେ ଡିପିଆର୍ ପ୍ରସ୍ତୁତି ଅଧାରେ ଅଟକିଛି ତ ହିଞ୍ଜିଳି ପୌରପାଳିକା ସମେତ ୯ଟି ଏନ୍ଏସିର ସର୍ଭେ ଆରମ୍ଭ ବି ହୋଇ ପାରିନି।
ସେହିପରି ନାଳ ନିର୍ମାଣ ନିମନ୍ତେ ହିଞ୍ଜିଳିକାଟୁ ପୌରପାଳିକା ସମେତ ୫ଟି ଏନ୍ଏସିକୁ ମୋଟ ୮ କୋଟି ଟଙ୍କା ମଞ୍ଜୁର ହୋଇଥିଲେ ହେଁ ଟଙ୍କାଟିଏ ଖର୍ଚ୍ଚ ହୋଇ ନଥିବା ଜଣାଯାଇଛି । ଆଗାମୀ ବର୍ଷା ଋତୁରେ ଗଞ୍ଜାମର ବିଭିନ୍ନ ସହରାଞ୍ଚଳ ପୁଣି ମୌସୁମୀଜନିତ ବର୍ଷାରେ ବୁଡ଼ିବା କିମ୍ବା ଭାସିବା ଆଶଙ୍କା କରାଯାଉଛି।
