ୱାଶିଂଟନ, ୨୬।୭: ଭାରତର ଏପରି ସ୍ଥାନ ଯେଉଁଠାକୁ ଆସିପାରିବେନି ଆମେରିକୀୟ । ଏଠାକୁ ଆମେରିକୀୟ ପର୍ଯ୍ୟଟକଙ୍କୁ ଆସିବା ମନା । ଜୀବନ ପ୍ରତି ବିପଦ ଥିବାରୁ ନ ଯିବାକୁ ପରାମର୍ଶ ଦେଇଛି ଆମେରିକାର ବୈଦେଶିକ ମନ୍ତ୍ରଣାଳୟ । ତେବେ ଏହି ସ୍ଥାନ କେଉଁଠି ? ଯେଉଁଠାକୁ ଆସିବାକୁ ଭୟ କରୁଛନ୍ତି ଆମେରିକୀୟ । 

ଭାରତ ବୁଲିବାକୁ ଆସୁଥିବା ଆମେରିକୀୟମାନଙ୍କ ପାଇଁ ୱାଶିଂଟନ ପକ୍ଷରୁ ଜାରି କରାଯାଇଛି ମାର୍ଗଦର୍ଶିକା । ଭାରତ ପାଇଁ ସଂଶୋଧିତ ଆଡଭାଇଜରୀରେ ଆମେରିକାର ବୈଦେଶିକ ମନ୍ତ୍ରଣାଳୟ କହିଛି ଯେ, ଉତ୍ତର ରାଜ୍ୟଗୁଡ଼ିକ ସମ୍ପର୍କରେ ସୂଚନା ପାଇବା ପରେ ଏପରି ନୂଆ ପରାମର୍ଶ ଦିଆଯାଇଛି । ମନ୍ତ୍ରଣାଳୟ କହିଛି ଯେ, ଭାରତରେ ଏବେ ଅପରାଧ ଓ ଆତଙ୍କବାଦ ବଢ଼ୁଛି । କିଛି ଅଞ୍ଚଳରେ ବିପଦ ଅତ୍ୟଧିକ ମାତ୍ରାରେ ବଢ଼ିଛି । ଅନେକ ସ୍ଥାନରେ ଆତଙ୍କବାଦ ଓ ସାମାଜିକ ଅସ୍ଥିରତା ବଢ଼ିଛି । 

ରିପୋର୍ଟ ଅନୁସାରେ, ଭାରତରେ ଏବେ ଦୁଷ୍କର୍ମଜନିତ ଅପରାଧ ଦ୍ରୁତ ଗତିରେ ବଢ଼ିଛି । ବିଶେଷ କରି ପର୍ଯ୍ୟଟନସ୍ଥଳ ଓ ଅନ୍ୟସ୍ଥାନଗୁଡ଼ିକରେ ଦୁଷ୍କର୍ମ ଭଳି ହିଂସାତ୍ମକ ଅପରାଧ ଘଟୁଛି । ଆତଙ୍କବାଦୀମାନେ କୌଣସି ୱାର୍ଣ୍ଣିଂ ନ ଦେଇ ଆକ୍ରମଣ କରିପାରନ୍ତି । ସେମାନେ ପର୍ଯ୍ୟଟନ ସ୍ଥଳ, ପରିବହନ ହବ୍ସ, ମାର୍କେଟସ ସପିଂ ମଲ୍ ଓ ସରକାରୀ ପ୍ରତିଷ୍ଠାନଗୁଡ଼ିକ ଉପରେ ହମଲା କରୁଛନ୍ତି ବୋଲି ଆଡଭାଇଜରୀରେ କୁହାଯାଇଛି । 

ଭାରତକୁ ଲେବଲ-୨ ବର୍ଗରେ ରଖାଯାଇଛି । କିନ୍ତୁ, ଭାରତର ଏକାଧିକ ସ୍ଥାନକୁ ଲେଭଲ-୪ରେ ସ୍ଥାନ ମିଳିଛି । ସେଗୁଡ଼ିକ ହେଲା ଜମ୍ମୁ-କାଶ୍ମୀର, ଭାରତ-ପାକ୍ ସୀମା, ମଣିପୁର ଓ କେନ୍ଦ୍ରୀୟ ଓ ପୂର୍ବ ଭାରତ । ଲଦାଖ ଓ ଏହାର ରାଜଧାନୀ ଲେହ ବ୍ୟତୀତ କେନ୍ଦ୍ରଶାସିତ ଅଞ୍ଚଳ ଜମ୍ମୁ-କାଶ୍ମୀରକୁ ଗସ୍ତ କରନ୍ତୁ ନାହିଁ । ଭାରତ ଗସ୍ତରେ ଆସୁଥିବା ଆମେରିକୀୟମାନେ ମଣିପୁର, ଜମ୍ମୁ-କାଶ୍ମୀର, ଭାରତ-ପାକିସ୍ତାନ ଓ କେନ୍ଦ୍ରୀୟ ଏବଂ ପୂର୍ବପ୍ରାନ୍ତକୁ ଯାଆନ୍ତୁ ନାହିଁ ବୋଲି ଆମେରିକା ପକ୍ଷରୁ କୁହାଯାଇଛି । ସମ୍ଭାବ୍ୟ ଲଢ଼େଇ ପାଇଁ ଭାରତ-ପାକିସ୍ତାନର ୧୦ କିମି ପରିଧିଠାରୁ ଦୂରେଇ ରୁହନ୍ତୁ । କେନ୍ଦ୍ରୀୟ ଓ ପୂର୍ବ ଭାରତର ନକ୍ସଲ କାର୍ଯ୍ୟକ୍ରମ ବଢ଼ିଛି । ତେଣୁ ସେଠାକୁ ଯାଆନ୍ତୁ ନାହିଁ । ମଣିପୁରରେ ହିଂସା ଓ ଅପରାଧ ଚାଲିଥିବାରୁ ସେଠାକୁ ମଧ୍ୟ କେହି ଯାଆନ୍ତୁ ନାହିଁ । ଉତ୍ତରାଞ୍ଚଳ ରାଜ୍ୟଗୁଡ଼ିକରେ ମଧ୍ୟ ଆତଙ୍କବାଦ ଓ ହିଂସା ବଢ଼ୁଛି । ତେଣୁ ସେଠାକୁ ଯିବା ପାଇଁ କରିଥିବା ପୂର୍ବ ଯୋଜନାଗୁଡ଼ିକ ସମ୍ପର୍କରେ ଆମେରିକୀୟମାନେ ପୁନଃ ବିଚାର କରିବାକୁ ପରାମର୍ଶ ଦେଇଛି ଆମେରିକାର ବୈଦେଶିକ ମନ୍ତ୍ରଣାଳୟ ।