ନୂଆଦିଲ୍ଲୀ: ଭାରତୀୟ ଜନତା ପାର୍ଟି (ବିଜେପି) ବିରୋଧରେ ଆପତ୍ତିଜନକ ଟିପ୍ପଣୀ କରିଥିବା ଅଭିଯୋଗରେ ଆପ୍ ନେତ୍ରୀ ଆତିଶୀଙ୍କ ଅଡ଼ୁଆ ବଢ଼ିଛି । ଦିଲ୍ଲୀ ବିଜେପିର ମିଡିଆ ମୁଖ୍ୟ ପ୍ରବୀଣ ଶଙ୍କର କପୁରଙ୍କ ଅଭିଯୋଗ କ୍ରମେ ଆତିଶୀଙ୍କୁ ଦିଲ୍ଲୀ ରାଉଜ୍ ଆଭେନ୍ୟୁ କୋର୍ଟ ସମନ ପଠାଇଛନ୍ତି । ଜୁନ୍ ୨୯ରେ କୋର୍ଟରେ ହାଜର ହେବାକୁ ତାଙ୍କୁ ନିର୍ଦ୍ଦେଶ ଦିଆଯାଇଛି । ଏହା ପୂର୍ବରୁ ଆତିଶୀଙ୍କ ବିରୋଧରେ ମାନହାନୀ ନୋଟିସ୍ ଜାରି କରିଥିଲା ବିଜେପି ।
ସେତେବେଳେ ବିଜେପି ତାଙ୍କ ଉପରେ ଚାପ ପକାଉଛି ବୋଲି ଆତିଶୀ ଅଭିଯୋଗ କରିଥିଲେ । ବିଜେପିରେ ମିଶିବାକୁ ତାଙ୍କୁ ବିଜେପି କହୁଛି ବୋଲି ସେ ଦାବି କରିଥିଲେ । ଏକ ସମ୍ବାଦିକ ସମ୍ମିଳନୀରେ ଆତିଶୀ କହିଥିଲେ ଯେ, ବିଜେପିରେ ସାମିଲ ନହେଲେ ତାଙ୍କୁ ମାସେ ମଧ୍ୟରେ ଇଡି ଗିରଫ କରିବ । ବିଜେପିର ଦାବି ଅନୁସାରେ କାମ ନକଲେ ତାଙ୍କ ସମେତ ଅନ୍ୟ ଆପ ନେତାଙ୍କୁ ଗିରଫ କରାଯିବ ବୋଲି ସେ ଦାବି କରିଥିଲେ ।
କେବଳ ଆପ୍ ନୁହେଁ ‘ଅପରେସନ ପଦ୍ମ’ ନେଇ କିଛି ଆଞ୍ଚଳିକ ଦଳ ଅଭିଯୋଗ କରିଥିଲେ । ଏହି ସମୟରେ ପଞ୍ଜାବାର ଏକମାତ୍ର ଆପ୍ ସାଂସଦ ସୁଶିଲ କୁମାର ରିଙ୍କୁ ଏବଂ ଜଳନ୍ଧର ପଶ୍ଚିମ ବିଧାୟକ ଶୀତଲ ଅଙ୍ଗୁରାଲ୍ ବିଜେପିରେ ସାମିଲ ହୋଇଥିଲେ । ଏହା ପରେ ଆପ୍ ନେତା ସୌରଭ ଭରଦ୍ବାଜ ଅଭିଯୋଗ କରିଥିଲେ ଯେ, ଗେରୁଆ ଦଳ ଆପ ବିଧାୟକଙ୍କୁ ନିଜ ଦଳରେ ସାମିଲ କରିବାକୁ ଟଙ୍କା ଯାଚୁଛି ।
