ନୂଆଦିଲ୍ଲୀ,୦୪/୦୨: ଆସନ୍ତାକାଲି ଦିଲ୍ଲୀ ବିଧାନସଭା ନିର୍ବାଚନ । ୭୦ ଆସନ ବିଶିଷ୍ଟ କେନ୍ଦ୍ର ଶାସିତ ଅଞ୍ଚଳରେ ପଡ଼ିବ ଭୋଟ୍ । ମତଦାନକୁ ଆଉ ଗୋଟିଏ ରାତି ବାକି ଥିବା ବେଳେ ଗତକାଲି ସଂଧ୍ୟାରେ ସରିଛି ପ୍ରଚାର । ଆଉ ଏହି ନିର୍ବାଚନକୁ ନେଇ ଲାଗୁ ହୋଇଛି ଅନେକ ନିୟମ । ସେଥିମଧ୍ୟରୁ ଗୋଟିଏ ହେଉଛି ୪ ଦିନ ପାଇଁ ମଦ ନିଷେଧ କରିବାର ନିୟମ। ନିର୍ବାଚନ ଯୋଗୁଁ ଦିଲ୍ଲୀରେ ମଦ ଦୋକାନଗୁଡ଼ିକୁ ୪ ଦିନ ପାଇଁ ବନ୍ଦ ହୋଇଛି। ସେହି ସମୟରେ, ନିର୍ବାଚନ କମିଶନ ଉତ୍ତର ପ୍ରଦେଶ ଏବଂ ହରିୟାଣା ପାଇଁ କିଛି ନିର୍ଦ୍ଦେଶ ଜାରି କରିଛନ୍ତି। ଏହି ପ୍ରତିବନ୍ଧକ କେଉଁଠାରେ ଏବଂ କେତେ ସମୟ ପାଇଁ ଲାଗୁ ଜାଣନ୍ତୁ ।
ତେବେ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି, ଦିଲ୍ଲୀରେ ୪ ଦିନ ପାଇଁ ମଦ ଦୋକାନ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି। ଏହା ବ୍ୟତୀତ ଦିଲ୍ଲୀ ସଂଲଗ୍ନ ଅଞ୍ଚଳରେ ମଧ୍ୟ ମଦ ଦୋକାନ ବନ୍ଦ କରିବାକୁ ଘୋଷଣା କରାଯାଇଛି। ଏହାର ଅର୍ଥ ହେଉଛି ଆଗାମୀ ୪ ଦିନ ପାଇଁ ଦିଲ୍ଲୀ, ନୋଏଡା, ଗୁରୁଗ୍ରାମ ଏବଂ ଗାଜିଆବାଦରେ ମଦ ଉପଲବ୍ଧ ହେବ ନାହିଁ। ଏହି ନିୟମ ଫେବୃଆରୀ ୩ ସନ୍ଧ୍ୟାରୁ ଲାଗୁ ହୋଇଛି। ଯାହା ୪ ଏବଂ ୫ ତାରିଖ ପର୍ଯ୍ୟନ୍ତ ଜାରି ରହିବ। ଏହି ଦିନଗୁଡ଼ିକରେ ହୋଟେଲ ଏବଂ ରେଷ୍ଟୁରାଣ୍ଟ ବ୍ୟତୀତ ଅନ୍ୟ କୌଣସି ବାରରେ ମଦ ଉପଲବ୍ଧ ହେବ ନାହିଁ। ସେହିପରି, ଫେବୃଆରୀ ୮ ତାରିଖରେ ଭୋଟ ଗଣତି ସମୟରେ ଦିଲ୍ଲୀରେ ଡ୍ରାଏ ଡେ ଘୋଷଣା କରାଯାଇଛି। ଦିଲ୍ଲୀ ଅବକାରୀ ବିଭାଗର ନିର୍ଦ୍ଦେଶ ଅନୁସାରେ , ୫ ଫେବୃଆରୀରେ ମତଦାନ ଶେଷ ହେବା ପରେ ମଦ ଦୋକାନ ଖୋଲାଯିବ । ଯଦି ଏହା ପୂର୍ବରୁ କୌଣସି ବି ମଦ ଦୋକାନ ଖୋଲାଯିବ ତେବେ ସେହି ଦୋକାନ ମାଲିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଦିଲ୍ଲୀ ବିଧାନସଭା ନିର୍ବାଚନ ୨୦୨୫ ପାଇଁ ପ୍ରଚାର ପ୍ରସାର ଶେଷ ହୋଇଛି। କାଲି ନିର୍ବାଚନ ଥିବା ବେଳେ ଆସନ୍ତା ୮ ତାରିଖରେ ନିର୍ବାଚନୀ ଫଳାଫଳ ବାହାରିବ । ଏହି ନିର୍ବାଚନରେ ଭାରତୀୟ ଜନତା ପାର୍ଟୀ, ଆମ୍ ଆଦମୀ ପାର୍ଟୀ ,କଂଗ୍ରେସ ବ୍ୟତୀତ ଏଆଇଏମଆଇଏମ ମଧ୍ୟ ଜୋରଦାର ନିର୍ବାଚନୀ ପ୍ରଚାର କରିଛି।
